ស្តេចប្រដាល់ហ្វ៊ីលីពីន ម៉ានី ប៉ាក់គីអាវបានតាំងចិត្តថានឹងដណ្តើមឲ្យបាននូវជ័យជំនះជាលើកទី១៤ជាប់ៗគ្នាក្នុងរយៈពេល៦ឆ្នាំនេះ ពោលគឺចាប់ពីពេលដែលរូបគេបានបរាជ័យក្រោមថ្វីដៃកីឡាករអេរីក ម៉ូរ៉ាល់ក្នុងឆ្នាំ២០០៥។
ប៉ាក់គីអាវ ដែលចាប់ផ្តើមធ្វើការហ្វឹកហាត់នៅទីក្រុងភាគខាងជើងហ្វ៊ីលីពីនBaguio City ជាមួយលោកហ្វ្រេដឌី រ៉ូច បានប្តេជ្ញាចិត្តថានឹងយកឈ្នះកីឡាករសេន ម៉ូស្លីឲ្យខាងតែបានក្នុងពេលដែលពួកគេជួបគ្នានៅសង្វៀនMGM Grand Garden ទីក្រុងឡាសវេហ្គាស រដ្ឋនេវ៉ាដា សហរដ្ឋអាមេរិកនាថ្ងៃទី៧ខែឧសភាខាងមុខនេះ។
ចាប់តាំងពីការបរាជ័យដោយពិន្ទុជាឯកច្ឆន្ទក្រោមថ្វីដៃកីឡាករម៉ូរ៉ាល់ក្នុងឆ្នាំ២០០៥មក ប៉ាក់គីអាវបានចំណាយពេលរបស់ខ្លួនស្ទើរតែទាំងអស់ហ្វឹកហាត់ជាមួយលោកហ្វ្រេដឌី រ៉ូច។ ប៉ាក៉គីអាវ បានកែលំអជំនាញប្រកួតរបស់ខ្លួនបានមួយកម្រិតធំ។ ការផ្លាស់ប្តូរមួយក្នុងចំណោមការផ្លាស់ប្តូរដ៏សំខាន់ គឺសន្ទុះកណ្តាប់ដៃស្តាំរបស់គេជាលទ្ធផលនៃការជួយជ្រោមជ្រែងដោយលោករ៉ូច ។
វិធីដែលលោករ៉ូចបានប្រែក្លាយដៃស្តាំប៉ាក់គីអាវឲ្យទៅជាអាវុធដ៏មានប្រសិទ្ធិភាពមួយនោះ គឺជាការសម្ងាត់ផ្នែកពាណិជ្ជកម្មដែលគាត់បានរក្សាទុកដ៏ល្អបំផុត ។ គូប្រកួតរបស់ប៉ាក់គីអាវទាំងឡាយពិតជាបានស្គាល់ពីកណ្តាប់ដៃមច្ចុរាជនេះ។ មកដល់ពេលនេះ មិនត្រឹមតែកណ្តាប់ដៃស្តាំទេ ដែលខ្លាំងនោះ ដៃឆ្វេងក៏មិនចាញ់ដៃស្តាំដែរ។ កណ្តាប់ដៃទាំងពីររបស់ប៉ាក់គីអាវញាប់និងរហ័សស្ទើរមើលមិនទាន់ ។
យោងតាមលោកអាល់ បឺនស្ទេនថា នៅក្នុងការប្រកួត១លើក ប៉ាក់គីអាវវាយចេញជាមធ្យមបានចំនួន១.០០០ដៃ ។ អ្នកយកព័ត៌មានកីឡារូបនេះបាននិយាយទៀតថា ខ្លួនប្រាថ្នាឲ្យមានការជួបគ្នារវាងមេវេដឌ័រនិងប៉ាក់គីអាវ។
នៅក្នុងបទសម្ភាសន៍ជាមួយBleacher Report Columnist Kingលោកបឺនស្ទេនបានបញ្ជាក់ថា៖«ខ្ញុំហ៊ានទាយចំពោះការប្រកួតនោះគឺប៉ាក់គីអាវនឹងឈ្នះដោយពិន្ទុ។ ក្នុងការប្រកួត១លើកវាយចេញបាន១.១០០ដៃឬ១.២០០ដៃ។ ឯមេវេដឌ័រវិញក្នុង១ប្រកួតវាយចេញបានតែ៥០០ដៃប៉ុណ្ណោះ។ ដូច្នេះបញ្ហាសម្រាប់ប៉ាក់គីអាវ ដែលធ្វើឲ្យគេចាញ់មេវេដឌ័រនោះគឺថា គេអាចត្រូវសន្លប់ឬក៏មេវេដឌ័រធ្វើឲ្យគេមានរបួសមិនអាចបន្តការប្រកួតបាន ។ ទោះជាយ៉ាងណា សម្រាប់ខ្ញុំ ខ្ញុំគិតថាមេវេដឌ័រគឺជាកីឡាករដ៏គ្រោះថ្នាក់មួយរូប»។
សម្រាប់កីឡាករសេន ម៉ូស្លីវិញ កណ្តាប់ដៃវាយចេញរបស់គេក៏រហ័សណាស់ដែរ តែបើប្រៀបធៀបជាមួយប៉ាក់គីអាវ គេនៅយឺតជាងបន្តិច។ ទោះជាយ៉ាងណា ប៉ាក់គីអាវមិនហ៊ានមើលស្រាលលើសមត្ថភាពរបស់ម៉ូស្លីទេ ហើយគេនឹងហ្វឹកហាត់ឲ្យបានហ្មត់ចត់បំផុតដើម្បីយកជ័យជំនះឲ្យខាងតែបាន ។ ចំពោះឯតទគ្គកម្មប្រកួត ប៉ាក់គីអាវនៅក្នុងការប្រកួត៥៧លើក ឈ្នះ៥២ ចាញ់៣ ស្មើ២ ផ្តួលដៃគូឲ្យសន្លប់៣៨លើក។ ឯម៉ូស្លីប្រកួត៥៤លើកឈ្នះ៤៦ចាញ់៦ ស្មើ១ឈ្នះដោយគ្មានដៃគូ១លើក ផ្តួលដៃគូឲ្យសន្លប់៣៩លើក ៕
ចែករំលែកព័តមាននេះ