អ្នកទទួលខុសត្រូវម្នាក់ខាងផ្នែកអាកាសចរណ៍រុស្ស៊ី លោកស័រហ្គេយអ៊ីស វ៉ុលស្គី ថ្លែងថា យន្តហោះដឹកអ្នកដំណើរមួយគ្រឿងបានរត់ចេញពីផ្លូវកាលពីថ្ងៃទី៤ ធ្នូ ពេលចុះចតជាបន្ទាន់នៅព្រលានយន្តហោះដូម៉ូដឺដូវ៉ូ ក្រុងម៉ូស្គូ បណ្តាលឱ្យមនុស្សស្លាប់២នាក់ និងរងរបួសជាច្រើនសិបនាក់។ យន្តហោះធុន TUPOLEV ១៥៤នៃក្រុមហ៊ុនដាហ្គេស្ថានអ៊ែរឡាញ បានហោះឡើងពីព្រលានយន្តហោះក្រុងម៉ូស្គូមួយទៀត គឺព្រលានយន្តហោះ VNOUKOVO ក៏ប៉ុន្តែយន្តហោះនោះបានហោះបកក្រោយវិញបន្តិចក្រោយមក ហើយចុះចតជាបន្ទាន់ក្រោយពីមានបញ្ហាគ្រឿងម៉ាសីុន។ លោកស័រហ្គេយ អ៊ីសវ៉ុលស្គី អះអាងថា មនុស្ស២នាក់បានត្រូវស្លាប់ហើយ យោងតាមទីភ្នាក់ងារព័ត៌មានរុស្ស៊ីថា អ្នកស្លាប់ទាំង២នាក់នោះជាអ្នកដំណើរ។ ម៉ាស៊ីន៣របស់យន្តហោះបានឈប់ដំណើរការនៅចំណុចមួយចំងាយ៨០គីឡូម៉ែត្រពីព្រលានយន្តហោះដូម៉ូដឺដូវ៉ូ ហើយប្រព័ន្ធបើកបរក៏ខូចដែរ។ គេពុំទាន់អាចកំណត់ដឹងពី មូលហេតុនៅឡើយ។ មនុស្សយ៉ាងតិច៨៧នាក់ត្រូវបញ្ជូនទៅកាន់មន្ទីរពេទ្យផ្សេងៗស្ថិតនៅក្បែរព្រលានយន្តហោះ។ យន្តហោះនេះដឹកអ្នកដំណើរ១៦៣នាក់ និងសមាជិកក្រុមបរាជិក៧នាក់។ រូបភាពបង្ហាញពីយន្តហោះនោះត្រូវបែកជា៣ក្រោយពីរត់ធ្លាក់ផ្លូវ ហើយបុកនឹងដើម
ឈើ។ យន្តហោះនេះត្រូវហោះទៅកាន់ទីក្រុង MAKHATCHKLA រដ្ឋធានីនៃសាធារណរដ្ឋដាហ្គេស្ថានរបស់រុស្ស៊ី។ យន្តហោះ TU-154 នោះជាប្រភេទដូចយន្តហោះដែលប្រធានាធិបតីប៉ូឡូញលោក ឡិច កាកហ្ស៊ីនស្គី ជិះហើយធ្លាក់បណ្តាលឱ្យលោកស្លាប់ ហើយឥស្សរជនប៉ូឡូញប្រមាណថា៩០នាក់ទៀតក៏ត្រូវស្លាប់ដែរនៅលើទឹកដីរុស្ស៊ី ៕
ចែករំលែកព័តមាននេះ