តើរាជសង្គហធម៌មានសេចក្តីដូចម្តេច ? បើតាមទ្រឹស្តីព្រះពុទ្ធសាសនាបានពន្យល់ថាជាធម៌ដែលព្រះរាជាគួរសង្គ្រោះ នេះជាគោលធម៌ក្នុងការដាក់ផែនការនយោបាយគ្រប់គ្រងកិច្ចការរបស់រដ្ឋ ដើម្បីសង្គ្រោះប្រជាពលរដ្ឋឲ្យមានជីវភាពប្រសើរឡើង ប្រទេសជាតិរុងរឿង ។ រាជសង្គហធម៌មាន៥ប្រការគឺ ៖
១- វៃឆ្លាតក្នុងការដឹកនាំប្រទេសជាតិឲ្យចម្រើនរុងរឿងខាងផ្នែកសេដ្ឋកិច្ច ដែលតម្រូវឱ្យអ្នកគ្រប់គ្រងត្រូវជាមនុស្សឆ្លាតខាងផ្នែកសេដ្ឋកិច្ចមានកម្រិតខ្ពស់ ដើម្បីជីវភាពប្រជារាស្ត្ររស់នៅដោយសុខសាន្ត ។
២- ឆ្លាតក្នុងការទំនុកបម្រុងមន្ត្រីរាជការ ឱ្យមានជីវភាពសមរម្យ ចេះជ្រើសរើសមនុស្សចូលមកធ្វើការឱ្យចំមុខនាទីច្បាស់លាស់ និងចាត់ចែងមុខតំណែងឲ្យបានត្រឹមត្រូវទៅតាមសកម្មភាពជាក់ស្តែង ស្របទៅនឹងសមត្ថ ភាពដោយមិនរើសអើង ។
៣- ចងសម្ព័ន្ធប្រជាករដោយមានទំនាក់ទំនងល្អ វៃឆ្លាតក្នុងការកែខៃបញ្ហាសង្គម ចេះរួមចិត្ត រួមគំនិតរបស់ប្រជារាស្ត្រ ដើម្បីទ្រទ្រង់អាជីវកម្មដោយការផ្តល់ប្រាក់កម្ចីទៅបណ្តាក់ទុន ឬប្រកបរបរផ្សេងៗក្នុងអត្រាការប្រាក់ទាបជាដើម ។
៤- មានវាចាពីរោះគួរជាទីសណ្តាប់ ប្រកបដោយសាមគ្គីភាព ចេះប្រើពាក្យសម្តីជាមួយអ្នកស្តាប់ឲ្យបានសមរម្យ តាមវ័យ តាមឋានៈ ចេះទាក់ទាញឲ្យមនុស្សធ្វើល្អ លើកតម្កើងសេចក្តីល្អ ។
៥- កម្ចាត់ឥទ្ធិពលអាក្រក់ផ្សេងៗដូចជា ពួកអ្នកមានអំណាចនៅពីលើច្បាប់ ចោរលួចចោរប្លន់ និងអបាយមុខផ្សេងៗ ដើម្បីឲ្យប្រជាពលរដ្ឋរស់នៅដោយសុខសាន្ត ។ ដោយសាន សារិន
ចែករំលែកព័តមាននេះ