រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា បុរស៣នាក់សង្ស័យតែស្រវឹងស្រាបានបើករថយន្តដេញបុកម៉ូតូ១គ្រឿងដែលជិះម្នាក់ឯង ថែមទាំងដកកាំភ្លើងគំរាមដេញបាញ់ទៀត បណ្តាលឱ្យជនរងគ្រោះភ័យរត់គេចខ្លួនចោលម៉ូតូបាត់ បង្កឱ្យមានការភ្ញាក់ផ្អើលកាលពីម៉ោង១១និង៣០នាទីយប់ ថ្ងៃទី៧ ខែមករា ឆ្នាំ២០២០…
រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា បុរស៣នាក់សង្ស័យតែស្រវឹងស្រាបានបើករថយន្តដេញបុកម៉ូតូ១គ្រឿងដែលជិះម្នាក់ឯង ថែមទាំងដកកាំភ្លើងគំរាមដេញបាញ់ទៀត បណ្តាលឱ្យជនរងគ្រោះភ័យរត់គេចខ្លួនចោលម៉ូតូបាត់ បង្កឱ្យមានការភ្ញាក់ផ្អើលកាលពីម៉ោង១១និង៣០នាទីយប់ ថ្ងៃទី៧ ខែមករា ឆ្នាំ២០២០ នៅចំណុចផ្សារទួលពង្រ ក្នុងភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ ។
សេចក្តីរាយការណ៍បន្តថា រថយន្តជនបង្កខាងលើម៉ាកកាមរីបាឡែន ពណ៌ស ពាក់ស្លាកលេខភ្នំពេញ 2Z-0342 បើកបរពីត្បូងទៅជើង ចំណែកម៉ូតូជនរងគ្រោះម៉ាក វេវ ពណ៌ខ្មៅ ពាក់ស្លាកលេខភ្នំពេញ 1DH-4459 បើកបរពីជើងទៅត្បូងបញ្ច្រាសទិសគ្នា។
បើតាមប្រភពពីជនរងគ្រោះបាននិយាយប្រាប់ថា មុនពេលកើតហេតុ រូបគាត់បានជិះម៉ូតូ១គ្រឿង ម៉ាកវេវ ពណ៌ខ្មៅ ត្រឡប់ពីដើរលេងប្រគំតន្ត្រីមកផ្ទះវិញ លុះមកដល់ចំណុចកើតហេតុ ក៏ស្រាប់តែមានរថយន្ត១គ្រឿងម៉ាកកាមរីបាឡែន ពណ៌ស ជិះគ្នា៣នាក់ បើកបរក្នុងទិសដៅពីត្បូងទៅជើង គឺជិះបញ្ច្រាសទិសគ្នា រួចក៏បានបើកដេញបុករូបគាត់ ធ្វើឲ្យគាត់ភ័យយ៉ាងខ្លាំង ។
ជនរងគ្រោះបន្តថា ពេលនោះរូបគាត់ក៏ជិះម៉ូតូចុះគេចពីផ្លូវមួយទៅផ្លូវមួយ គឺពីផ្លូវផ្សារទួលពង្រ មកតាមផ្លូវលំខាងក្រោយផ្សារ ហើយគាត់ក៏ឈប់ រួចចុះពីម៉ូតូទៅសួរនាំ ដោយយកដៃវាយកញ្ចក់ តែមិនបែកនោះទេ ក៏ស្រាប់តែភាគីខាងរថយន្តបានបើកទ្វារចុះមក ដោយទាញយកកាំភ្លើងអាមេ មកគំរៀមបាញ់រូបគាត់ដែលជាជនរងគ្រោះទៀត ធ្វើឲ្យគាត់ភ័យខ្លាំងពេកក៏រត់គេចខ្លួនចោលម៉ូតូបាត់តែម្តង ក្រោយមកទើបទូរស័ព្ទទាក់ទងទៅសាច់ញាតិ ដើម្បីឱ្យមកជួយភ្លាមៗផងដែរ។
ក្រោយពេលកើតហេតុ សាច់ញាតិគ្រួសារជនរងគ្រោះបានទាក់ទងទៅសមត្ថកិច្ចនគរបាលប៉ុស្តិ៍ចោមចៅទី១ ឱ្យមកជួយអន្តរាគមន៍។ បន្ទាប់មកកម្លាំងសមត្ថកិច្ចបានចុះមកអន្តរាគមន៍ និងជួយឃាត់ខ្លួនម្ចាស់រថយន្ត ព្រមទាំងបក្សពួកខាងលើ ដើម្បីយកទៅសួរនាំនៅប៉ុស្តិ៍នគរបាលចោមចៅទី១។
ក្រោយពេលបានសំរបសំរួលរួចនៅនគបាលប៉ុស្តិ៍ ហើយដោយភាគីខាងម្ចាស់រថយន្តបង្កខាងលើដឹងខ្លួនខុស ដោយពួកគាត់មានជាតិស្រាផងនោះ ក៏សុំទោសចំពោះម្ចាស់ម៉ូតូរងគ្រោះ ដើម្បីបញ្ចប់រឿងនៅប៉ុស្តិ៍នគរបាលចោមចៅទី១ រួចធ្វើកិច្ចសន្យាចំពោះមុខច្បាប់តែម្តង ៕ (កែសម្រួលដោយ ៖ បុប្ផា)
ចែករំលែកព័តមាននេះ