ខេត្តកំពង់ចាម ៖ ប្រជាកសិករដែលកំពុងប្រកបរបរដាំម្រេចនៅខេត្តកំពង់ចាម បានធ្វើសំណូមពរដល់សហគមន៍អឺរ៉ុប ឱ្យជួយរកទីផ្សារនៅបណ្តាប្រទេសអឺរ៉ុប ខណៈដែលទីផ្សារក្នុងស្រុកមានតម្លៃថោក និងមិនអាចទប់ទល់ការចំណាយបាន ។ លោកកៅ វណ្ណី អាយុ៣២ឆ្នាំ តំណាងអាជីវករដាំម្រេចនៅភូមិស្អំ ឃុំពញាក្រែក ស្រុកមេមត់ ខេត្តកំពង់ចាម បាននិយាយថា បច្ចុប្បន្ននេះដំណាំម្រេចនៅតំបន់នោះមានប្រមាណជាង៨០០ហិកតា និងជិតដល់ពេលប្រមូលផលហើយ ។ ប៉ុន្តែប្រជាពលរដ្ឋមានការព្រួយបារម្ភយ៉ាងខ្លាំងចំពោះទីផ្សារម្រេច ដែលលក់ក្នុងស្រុកមានតម្លៃថោកហើយពួកឈ្មួញកណ្តាលកំពុងតែវាយតម្លៃបន្ទាបថែមទៀត ។
លោកគិតថា បើលក់ក្នុងតម្លៃទាបពេកដូចតម្លៃដែលឈ្មួញកណ្តាលដើរប្រមូលទិញ គឺប្រជាកសិករប្រាកដជាជួបនូវការខាតបង់ប្រាក់ដើមមិនខាន ។ លោកបញ្ជាក់ថា ម្រេចនៅខេត្តកំពង់ចាមនិងម្រេចនៅខេត្តកំពត គឺមានគុណភាពខ្ពស់ដូចគ្នា នៅពេលដែលប្រជាកសិករបានបោះបង់ចោលការប្រើប្រាស់ជីគីមី និងងាកមកប្រើប្រាស់ជីធម្មជាតិជំនួសវិញ ។ លោកទទួលស្គាល់ថា មុននេះកសិកររបស់យើងបានប្រើប្រាស់ជីគីមី លើដំណាំម្រេចដែលធ្វើឱ្យគុណភាពមានកំរិតទាប ហើយលំបាករកទីផ្សារ ។ ប៉ុន្តែដំណាំម្រេចក្រោយនេះ (៨០០ហិកតា) គឺកសិករយើងបានងាកមករកការប្រើប្រាស់ជីធម្មជាតិនិងមានការថែទាំបែបធម្មជាតិ ដែលធ្វើឱ្យគុណភាពម្រេចកើនឡើងខ្ពស់មិនខុសពីម្រេចដែលកសិករដាំនៅខេត្តកំពតឡើយ ។
លោកកៅ វណ្ណី បាននិយាយថា ពេលលោកបានអានសារព័ត៌មានកោះសន្តិភាពដែលចុះផ្សាយអំពីដំណាំម្រេចនៅខេត្តកំពតទទួលបានការគាំទ្រពីសហគមន៍អឺរ៉ុបទាំងមូលនិធិនិងទីផ្សារក្រៅប្រទេស ធ្វើឱ្យរូបលោកនិងប្រជាកសិករមានការចាប់អារម្មណ៍យ៉ាងខ្លាំង និងសំណូមពរដល់សហគមន៍អឺរ៉ុបមេត្តាចុះពិនិត្យដំណាំម្រេចនៅសហគមន៍ខេត្តកំពង់ចាមនិងជួយរកទីផ្សារផលិតផលម្រេចដល់ពួកគាត់ផង ។ លោកអះអាងថា របៀបដាំម្រេចនិងការប្រើប្រាស់ជីលើដំណាំម្រេចរួមទាំងការថែទាំផងគឺដូចគ្នានឹងការដាំម្រេចរបស់ប្រជាកសិករនៅខេត្តកំពតដែលសហគមន៍អឺរ៉ុបជួយនោះដែរ ។ ឯគុណភាពវិញគឺកំរិតខ្ពស់ចំណាត់ថ្នាក់ស្តង់ដាអន្តរជាតិដូចគ្នា ។
លោកបញ្ជាក់ជាចុងក្រោយថា ចំពោះជីធម្មជាតិដែលប្រើប្រាស់លើដំណាំម្រេចនៅខេត្តកំពង់ចាម ជាប្រភេទជីធម្មជាតិឈ្មោះវែគ(WEHG) ផលិតនៅសហរដ្ឋអាមេរិកដែលគុណភាពដីរបស់វាគឺជួយកែលំអគុណភាពនិងមិនប៉ះពាល់ដល់សុខភាពសត្វនិងមនុស្សឡើយ ។ យ៉ាងណាក៏ដោយ ប្រជាកសិករដាំម្រេចនៅខេត្តកំពង់ចាម បានទទូចសុំឱ្យសហគមន៍អឺរ៉ុបមេត្តាជួយស្វែងរកទីផ្សារក្រៅប្រទេសសំរាប់ផលិតផលម្រេចរបស់ពួកគាត់ផង ព្រោះក្រៅពីបរិមាណម្រេចដែលមានចំនួនច្រើនលំបាករកទីផ្សារក្នុងស្រុក តម្លៃម្រេចក្នុងស្រុកក៏មានតម្លៃទាបពេក ដែលអាចនាំឱ្យប៉ះពាល់ដល់ជីវភាពប្រជាកសិករ ។ ប្រជាកសិករមានសង្ឃឹមថា មន្ត្រីនៃសហគមន៍អឺរ៉ុបប្រចាំប្រទេសកម្ពុជានឹងចាប់អារម្មណ៍ចំពោះសំណូមពររបស់ប្រជាកសិករដាំម្រេចនៅខេត្តកំពង់ចាមជាមិនខាន ៕
ចែករំលែកព័តមាននេះ