ខេត្តសៀមរាប ៖ ប្រាង្គប្រាសាទមួយដែលកសាងឡើងមុនដំបូងគេបង្អស់ដោយព្រះបាទជ័យវរ្ម័ទី៧ ហើយបច្ចុប្បន្ននេះមានសភាពទ្រុឌទ្រោម ប៉ុន្តែគេនៅតែកត់សម្គាល់ឃើញថាជាទីកន្លែងមួយដ៏មានភាពទាក់ទាញភ្ញៀវទេសចរណ៍គ្រប់ជាតិសាសន៍ដែលបានចូលមកទស្សនាតែងតែលាន់មាត់កោតសសើរពីស្នាដៃរបស់បុព្វបុរសខ្មែរជំនាន់ដើម។ មានទីតាំងបច្ចុប្បន្នស្ថិតនៅសង្កាត់នគរធំ ក្រុងសៀមរាបដែលមានចម្ងាយ១១គីឡូម៉ែត្រពីទីប្រជុំជនក្រុងសៀមរាប ។ ហើយនៅក្នុងតួប្រាសាទចំនួន១២ កំពូល១២ និងកំផែង១គីឡូម៉ែត្រ ព្រមទាំងមានកន្លែងសក្ការៈបូជាជាច្រើនទៀត។
ប្រាសាទបន្ទាយក្តី កសាងឡើងមុនគេបង្អស់ក្នុងចំណោមប្រាសាទដទៃទៀតដោយព្រះបាទជ័យវរ្ម័ទី៧នៅអំឡុងឆ្នាំ១១៨០ ក្នុងសតវត្សទី១២ដើមសតវត្សទី១៣ ហើយប្រាសាទនេះកសាងឡើងដើម្បីឧទិសដល់សាសនាមហាយាន(ព្រះពុទ្ធ)ធ្វើឡើងអំពីថ្មបាយក្រៀមនិងថ្មភក់ រចនាបថតាមបែប បាយ័ន,តាព្រហ្ម,ព្រះខ័ន,ក្រោលគោ ជាដើម។នារជ្ជកាលនោះ ព្រះបាទជ័យវរ្ម័ទី៧ ព្រះអង្គបានកសាងឡើងដើម្បីឧទិសដល់ព្រះរាជគ្រូរបស់ព្រះអង្គ ជាក់ស្តែង មានដូចជាក្លោងទ្វារ ចំនួន៤ ដែលតំណាងឱ្យព្រហ្មវិហាធម៌ទាំង៤នោះ។ប្រាសាទបន្ទាយក្តីនេះ ដែលមានទំហំទទឹង៥០០ម៉ែត្រ និងបណ្តោយ៧០០ម៉ែត្រ ព័ន្ធជុំវិញដោយស្រះទឹក ។
មគ្គុទេស៍ទេសចរណ៍ឯកទេសភាសាបារាំងលោក រ៉ា ឌី បានប្រាប់កោះសន្តិភាពតាមទូរស័ព្ទនៅល្ងាចនេះថា បច្ចុប្បន្ននេះភ្ញៀវទេសចរណ៍ មានការចាប់អារម្មណ៍យ៉ាងខ្លាំងព្រោះនៅខាងមុខប្រាសាទមាន តោ,នាគ ឃើញនៅស្រស់ញញឹម ដដែល ប៉ុន្តែនៅតួប្រាសាទទាំងមូលមានសភាពទ្រុឌទ្រោមស្ទើរតែ៥០%ទៅហើយ។លោកបន្តទៀតថា ប្រាសាទបន្ទាយក្តី នេះ ព្រះបាទជ័យវរ្ម័ទី៧កសាងឡើងដើម្បីឱ្យព្រះសង្ឃ និងនិស្សិត បានរៀនសូត្រមិនតែប៉ុណ្ណោះ ប្រាសាទនេះគឺជា បន្ទាយមួយកន្លែង សំរាប់កាត់ក្តី ផងដែរ។ លុះមកដល់សម័យសង្គមរាស្រ្តនិយម ព្រះបាទនរោត្តមសីហនុព្រះអង្គបានរៀបចំកន្លែងនេះជាកន្លែងសួនសត្វដើម្បីទាក់ទាញ ប៉ុន្តែរហូតមកដល់សម័យខ្មែរក្រហម ក៏បានខូចខាតមួយចំនួន ។
លោកបន្ថែមទៀតថា ប្រាសាទបន្ទាយក្តីនេះ កន្លងទៅត្រូវបានជួសជុលដោយជនជាតិបារាំងលុះមកដល់បច្ចុប្បន្ននេះត្រូវបានជួសជុលដោយជាងជំនាញមកពីប្រទេសជប៉ុន បន្តទៀត។ប្រាង្គប្រាសាទដែលមានវ័យចំណាស់មួយនេះមិនត្រឹមតែទាក់ទាញភ្ញៀវទេសចរណ៍ជាច្រើនាក់ប៉ុណ្ណោះទេ ថែមទាំងបានផ្តល់សេវាការងាររកប្រាក់កម្រៃដល់ប្រជាពលរដ្ឋជិតខាងនោះបានធូរធាផងដែរ ។
ចែករំលែកព័តមាននេះ