ខេត្តពោធិ៍សាត់ ៖ ប្រភពព័ត៌មានពីប្រជាពលរដ្ឋឱ្យដឹងថា រយៈពេលជាងមួយសប្តាហ៍កន្លងទៅនេះនៅស្រុកកណ្តៀង មានគោក្របីកើតជំងឺ និងងាប់ជាបន្តបន្ទាប់ ដែលធ្វើឱ្យបងប្អូនប្រជាកសិករខាតបង់ថវិកា បាត់បង់កម្លាំងអូសទាញ និងមានការព្រួយបារម្ភយ៉ាងខ្លាំង ។ ប្រភពឱ្យដឹងទៀតថា គោក្របីរាប់រយក្បាលបានងាប់ស្អុយពេញព្រៃរនាម និងរាប់រយក្បាលទៀតកំពុងឆ្លងជំងឺរាតត្បាតអុតក្តាម និងសាទឹក ពិសេសនៅឃុំកញ្ជរ ឃុំស្យា ឃុំស្រែស្តុក និងឃុំកោះជុំជាដើម ។
លោកខៀវ ណូន មេឃុំកញ្ជរ ឱ្យដឹងថា ពិតជាមានគោក្របីងាប់ និងឈឺប្រាកដមែន ប៉ុន្តែមិនច្រើនរាប់រយក្បាលដូចពាក្យចចាមអារ៉ាមនោះទេ ។ រយៈពេលជាងមួយសប្តាហ៍នេះនៅឃុំកញ្ជរ មានគោក្របីប្រមាណជាង៤០ក្បាលងាប់ និងជិត២០០ក្បាលទៀតកំពុងឈឺភាគច្រើនគឺក្របី ។ នេះគ្រាន់តែជាស្ថិតិដែលមេភូមិគ្រប់ភូមិរាយការណ៍មក ឯការឃើញជាក់ស្តែងនោះមានតែ៧ក្បាលប៉ុណ្ណោះ នៅភូមិកញ្ជរ ព្រែកត្របែក សំរោង និងភូមិរលាំង ។ ទន្ទឹមនឹងនេះ ក្នុងនាមអាជ្ញាធរឃុំលោកបានរាយការណ៍ជូនទៅស្រុកនិងជំនាញពេទ្យសត្វរួចអស់ហើយ ដើម្បីមានវិធានការទប់ស្កាត់ជាបន្ទាន់ ។
ទាក់ទិននឹងបញ្ហានេះ លោកម៉ែន ហុង អនុប្រធានការិយាល័យផលិតកម្ម និងបសុព្យាបាលខេត្ត បានបំភ្លឺជូនថា ការិយាល័យរបស់លោកមានភ្នាក់ងារសុខភាពសត្វភូមិគ្រប់ភូមិទូទាំងខេត្ត ដើម្បីផ្តល់សេវាវ៉ាក់សាំងព្យាបាលជំងឺសត្វជូនប្រជាពលរដ្ឋ និងផ្តល់ព័ត៌មានត្រឡប់មកវិញនូវជំងឺរាតត្បាតផ្សេងៗ ។ នៅស្រុកចំនួន៥ទៀត មិនទាន់មានបញ្ហាអ្វីទេ ទើបតែលេចឮនៅស្រុកកណ្តៀងនេះថា មានសត្វពាហនៈកើតជំងឺរាតត្បាត និងងាប់រាប់រយក្បាល ។ ប៉ុន្តែខណៈពេលយើងបញ្ជូនមន្ត្រីជំនាញចុះទៅដល់គោលដៅឃើញមានក្របីឈឺ និងងាប់៦តែទៅ៧ក្បាលប៉ុណ្ណោះ ។ ដូច្នេះការលេចឮព័ត៌មានថា នៅស្រុកកណ្តៀងមានសត្វពាហនៈឈឺ និងងាប់រាប់រយក្បាលនោះជាការលេចឮនិយាយតៗគ្នាប៉ុណ្ណោះ មិនមានភស្តុតាងច្បាស់លាស់ទេ ។
លោកម៉ែន ហុង ថ្លែងថា ទម្លាប់ប្រជាកសិករនៅតំបន់នោះពេលចប់ការងារធ្វើស្រែស្រូវតែងលែងគោក្របីឱ្យដើរស៊ីស្មៅពាសវាសពាសកាលតាមព្រៃ រនាម ។ លុះពេលភ្លៀងធ្លាក់ដើមរដូវវស្សាទើបនាំគ្នាទៅដើររកកៀងចូលភូមិវិញ ដើម្បីទឹមនង្គ័លភ្ជួរស្រែ។ ការលែងសត្វដោយពុំមានការថែទាំបែបនេះ ជួនកាលអាចចោរលួច ឬសត្វអាសិរពិសខាំ ឬស៊ិស្មៅពុលថ្នាំដែលគេដាក់បំពុលសត្វស្លាបជាដើម ព្រោះក្របីដែលឈឺ និងងាប់ប៉ុន្មានក្បាលខាងលើនោះសុទ្ធតែនៅព្រៃ រនាម អត់មាននៅក្នុងភូមិទេ ។
លោកម៉ែន ហុង សូមឱ្យបងប្អូនកៀងគោក្របីពីព្រៃរនាមចូលក្នុងស្រុកភូមិវិញ ឱ្យអស់ដើម្បីមន្ត្រីជំនាញពិនិត្យចាក់ថ្នាំព្យាបាលជូន ។ ទន្ទឹមនឹងនេះ ត្រូវទប់សា្កត់ការហូបសាច់សត្វពាហនៈដែលងាប់នោះ ឬវះចោលពាសវាលពាសកាល គឺ ត្រូវកប់ក្នុងដី ដើម្បីចៀសផុតពីជំងឺរាតត្បាតផ្សេងៗមកដល់មនុស្សទៀត ៕
ចែករំលែកព័តមាននេះ