ខេត្តស្ទឹងត្រែង ៖ ស្ថានភាពកម្ពស់ទឹកនៅទន្លេមេគង្គខេត្តស្ទឹងត្រែង កំពុងបន្តហក់ឡើងខ្ពស់ និងស្ថានភាពអាកាសធាតុនៅតែបន្តភ្លៀងកាន់តែច្រើនឡើង ដែលនឹងបង្កឱ្យមានទឹកជំនន់គិតត្រឹមថ្ងៃទី២៩ កក្កដា ។ នេះបើយោងតាមការជូនដំណឹងរបស់រដ្ឋបាលខេត្តប្រកាសឱ្យដឹងនៅព្រឹកថ្ងៃ៣០ កក្កដា…
ខេត្តស្ទឹងត្រែង ៖ ស្ថានភាពកម្ពស់ទឹកនៅទន្លេមេគង្គខេត្តស្ទឹងត្រែង កំពុងបន្តហក់ឡើងខ្ពស់ និងស្ថានភាពអាកាសធាតុនៅតែបន្តភ្លៀងកាន់តែច្រើនឡើង ដែលនឹងបង្កឱ្យមានទឹកជំនន់គិតត្រឹមថ្ងៃទី២៩ កក្កដា ។ នេះបើយោងតាមការជូនដំណឹងរបស់រដ្ឋបាលខេត្តប្រកាសឱ្យដឹងនៅព្រឹកថ្ងៃ៣០ កក្កដា ។
ដើម្បីធានាបាននូវការការពារសន្តិសុខ សុវត្ថិភាព និងធានាដល់ការគ្រប់គ្រងទ្រព្យសម្បត្តិត្រៀមបង្ការផល
ប៉ះពាល់ប្រជាពលរដ្ឋក្នុងខេត្តស្ទឹងត្រែង ពិសេសប្រជាពលរដ្ឋរស់នៅប្រកបមុខរបរតាមដងទន្លេមេគង្គ និងទន្លេសេកុង ក្នុងខេត្តស្ទឹងត្រែង ។ រដ្ឋបាលខេត្តស្ទឹងត្រែងបានអំពាវនាវឱ្យមានការប្រុងប្រយ័ត្នខ្ពស់ចំពោះករណីទឹកជំនន់តាមទីតាំងនានា ដែលនឹងអាចបង្កឱ្យមានផលប៉ះពាល់ដល់ប្រជាពលរដ្ឋក្នុងមូលដ្ឋានភូមិ ឃុំសង្កាត់តាមដងទន្លេមេគង្គ និងទន្លេសេកុង ។
ជាមួយនឹងករណីនេះ រដ្ឋបាលខេត្តបានស្នើដល់អាជ្ញាធរមានសមត្ថកិច្ច កម្លាំងគ្រប់ផ្នែកទាំងអស់នៅថ្នាក់ភូមិ ឃុំ សង្កាត់ ក្រុង ស្រុក ក្នុងខេត្តស្ទឹងត្រែង ដាក់ចេញនូវផែនការត្រៀមបង្ការ និងត្រៀមជួយអន្តរាគមន៍សង្គ្រោះប្រជាពលរដ្ឋកំពុងរស់នៅ ប្រកបមុខរបរតាមមូលដ្ឋាន ដែលនឹងអាចរងផលប៉ះពាល់ដោយគ្រោះធម្មជាតិនេះ ឱ្យបានទាន់ពេលវេលា ធានាបានភាពកក់ក្តៅ និងសាមគ្គីភាព ។
យោងតាមការប្រកាសរបស់ក្រសួងធនធានទឹក និងឧតុនិយម នៅព្រឹកថ្ងៃដដែលបានឱ្យដឹងថា ទឹកទន្លេមេគង្គបានជន់លិចចូលតំបន់ទំនាបមួយចំនួនក្នុងសង្កាត់ចំនួន៤ ក្នុងក្រុងស្ទឹងត្រែង ជាបណ្តើរៗហើយគឺ សង្កាត់ព្រះបាទ សង្កាត់ស្រះឫស្សី សង្កាត់ស្ទឹងត្រែងនិងសង្កាត់សាមគី្គ ។
តាមសេចក្តីជូនដំណឹងស្តីពីការហក់ឡើងខ្លាំងនៃទឹកជំនន់ទន្លេមេគង្គលើរបស់ក្រសួងធនធានទឹក និងឧតុនិយមនៅថ្ងៃ៣០ កក្កដា បានប្រកាសឱ្យដឹងថា បន្ទាប់ពីបានធ្វើការតាមដាន ព្យាករណ៍លើស្ថានភាពអាកាសធាតុ និងស្ថានភាពទឹកជំនន់ទន្លេមេគង្គលើរួចមក គឺដោយសារមានការធ្លាក់ភ្លៀងជាបន្តបន្ទាប់ក្នុងកម្រិតពីមធ្យមទៅច្រើននៅក្នុងតំបន់អាងទន្លេមេគង្គក្នុងប្រទេសថៃ និងឡាវបានបង្កឱ្យទឹកទន្លេមេគង្គក្នុងប្រទេសកម្ពុជាបន្តកើនឡើង២-៣ថ្ងៃបន្ថែមទៀត ។
យោងតាមការព្យាករណ៍កម្ពស់ទឹកទន្លេមេគង្គលើនេះកម្ពុជាអាចនឹងកើនឡើងដល់ ៖នៅថ្ងៃទី៣ ខែសីហា ឆ្នាំ២០១៨ ទន្លេមេគង្គខេត្តស្ទឹងត្រែង ទឹកអាចនឹងកើនឡើងដល់កម្ពស់១១,៤០ម៉ែត្រ(កម្ពស់ប្រកាសឱ្យប្រុងប្រយ័ត្ន១០,៧០ម៉ែត្រ) ។
នៅថ្ងៃទី៤ ខែសីហា ឆ្នាំ២០១៨ ទន្លេមេគង្គខេត្តក្រចេះ ទឹកអាចនឹងកើនឡើងដល់កម្ពស់២២,១៥ម៉ែត្រ(កម្ពស់ប្រកាសឱ្យប្រុងប្រយ័ត្ន២២ម៉ែត្រ) ។ នៅថ្ងៃទី៥ ខែសីហា ឆ្នាំ២០១៨ ទន្លេមេគង្គខេត្តកំពង់ចាម ទឹកអាចនឹងកើនឡើងដល់កម្ពស់១៥,២៥ម៉ែត្រ(កម្ពស់ប្រកាសឱ្យប្រុងប្រយ័ត្ន១៥,២០ម៉ែត្រ) ។
ក្រសួងបានប្រកាសទៀតថា យោងលើស្ថានភាពទឹកដូចបានព្យាករណ៍ និងជម្រាបជូនខាងលើ សូមក្រសួង ស្ថាប័នពាក់ព័ន្ធ អាជ្ញាធរដែនដី និងសាធារណជន មេត្តាជ្រាបជាព័ត៌មាន និងបង្កើនការប្រុងប្រយ័ត្នខ្ពស់ដើម្បីចៀសវាងនូវគ្រោះថ្នាក់ផ្សេងៗដែលអាចកើតមានឡើងជាយថាហេតុ ៕
ចែករំលែកព័តមាននេះ