រាជធានីភ្នំពេញ ៖ ទីប្រឹក្សានាយករដ្ឋមន្ត្រីជប៉ុនឯកឧត្តម Kentaro SONOURA នឹងធ្វើទស្សនកិច្ចនៅកម្ពុជានៅថ្ងៃទី២៣ ខែមីនា ឆ្នាំ២០១៨ ដែលគោលបំណងនៃដំណើរទស្សនកិច្ចរបស់លោក គឺដើម្បីលើកកម្ពស់ការយល់ដឹងអំពីគោលនយោបាយការបរទេសរបស់នាយករដ្ឋមន្ត្រីជប៉ុនស្តីពី «យុទ្ធសាស្ដ្រសេរី និងបើកទូលាយឥណ្ឌូ – ប៉ាស៊ីហ្វិក» ដែលសម្តេចតេជោ ហ៊ុន សែន នាយករដ្ឋមន្ត្រីបានសម្តែងការគាំទ្ររបស់សម្តេចក្នុងកំឡុងដំណើរទស្សនកិច្ច របស់ប្រមុខដឹកនាំកម្ពុជាទៅកាន់ប្រទេសជប៉ុនកាលពីខែសីហាកន្លងទៅ ។
ក្នុងដំណើរទស្សនកិច្ចនេះឯកឧត្តម Kentaro SONOURA ក្នុងដំណើរទស្សនកិច្ចនេះ ឯកឧត្តម SONOURA នឹងថ្លែងសុន្ទរកថា នៅក្នុងកម្មវិធីបើកសិក្ខាសាលាស្តីពីកិច្ចសហប្រតិបត្តិការជប៉ុន-មេគង្គ ដែលរៀបចំដោយវិទ្យាស្ថានខែ្មរសម្រាប់សហប្រតិបត្តិការ និងសន្តិភាព(CICP) នៅសណ្ឋាគាររ៉ាហ្វលឡឺរ៉ូយ៉ាល់ ។ ឯកឧត្តមក៏នឹងជួបសម្តែងការគួរសមជាមួយនឹងមន្ត្រីរាជការជាន់ខ្ពស់ ក្នុងជួររាជរដ្ឋាភិបាលកម្ពុជា ដើម្បីផ្លាស់ប្តូរទស្សនវិស័យអំពីកិច្ចសហប្រតិបត្តិការ ទ្វេភាគី និងបញ្ហាក្នុងតំបន់ ។ ឆ្នាំនេះ គឺជាឆ្នាំនៃខួបអនុស្សាវរីយ៍៦៥ឆ្នាំ នៃទំនាក់ទំនងការទូតរវាងជប៉ុន និងកម្ពុជា ដូច្នេះយើងសង្ឃឹមថា តាមរយៈដំណើរទស្សនកិច្ចនេះទំនាក់ទំនង និងកិច្ចសហប្រតិបត្តិការរវាងប្រទេសទាំងពីរនឹងត្រូវបានពង្រឹងបន្ថែមទៀតលើគ្រប់វិស័យ ។
លោក Kentaro SONOURA បានពន្យល់បកស្រាយ«យុទ្ធសាស្ដ្រសេរី និងបើកទូលាយឥណ្ឌូ – ប៉ាស៊ីហ្វិក» ថា៖
១. តើអ្វីទៅជា «យុទ្ធសាស្ត្រឥណ្ឌាប៉ាស៊ីហ្វិកសេរី និងបើកចំហរ» ?
លោក Kentaro SONOURA ៖ សណ្តាប់ធ្នាប់អន្តរជាតិសេរី និងបើកចំហរប្រកបដោយនីតិរដ្ឋ គឺជាមូលដ្ឋានគ្រឹះដ៏សំខាន់សម្រាប់ស្ថេរភាព និងវិបុលភាពនៃសង្គមអន្តរជាតិ ជាពិសេសតំបន់ឥណ្ឌាប៉ាស៊ីហ្វិក ដែលក្នុងនោះរួមមានអាស៊ាន គឺជាស្នូលនៃសកម្មភាពពិភពលោកដែលមានប្រជាជនពាក់កណ្តាលនៃពិភពលោកទាំងមូល និងចលនានៃលំហូរសេដ្ឋកិច្ចយ៉ាងសកម្ម ។ ប្រទេសជប៉ុនជំរុញយុទ្ធសាស្ត្រនេះ ដើម្បីឲ្យតំបន់ឥណ្ឌាប៉ាស៊ីហ្វិកសេរី និងបើកចំហរប្រកប ដោយនីតិរដ្ឋក្លាយជាសម្បត្តិរួមរបស់អន្តរជាតិ ដែលនឹងផ្តល់ស្ថេរភាព និងវិបុលភាពក្នុងតំបន់ទាំងមូល ។
ជាក់ស្តែង យុទ្ធសាស្ត្រនេះមានគោលការណ៍សំខាន់ៗ៣ គឺ៖ ទី១- សេរីភាពនៃនាវាចរណ៍ ការផ្សព្វផ្សាយ និងលំនឹងនីតិរដ្ឋ ទី២- ការបង្កើនវិបុលភាពសេដ្ឋកិច្ច តាមរយៈការពង្រឹងភាពតភ្ជាប់គ្នា ក៏ដូចជាការរៀបចំហេដ្ឋារចនាសម្ព័ន្ធប្រកបដោយគុណភាពខ្ពស់ តាមស្តង់ដារអន្តរជាតិ ទី៣- ការធានានូវវិធានការ ដើម្បីរក្សាសន្តិភាព និងសេ្ថរភាពតាមរយៈការចូលរួមកសាងសមត្ថភាពក្នុងវិស័យអនុវត្តច្បាប់នៅលើសមុទ្រ និងវិស័យការពារគ្រោះមហន្តរាយ ។ ប្រទេសជប៉ុននឹងសហការជាមួយគ្រប់ប្រទេសដែលគាំទ្រដល់គំនិតបែបនេះ ដើម្បីសម្រេចឲ្យបាននូវឥណ្ឌា ប៉ាស៊ីហ្វិកសេរី និងបើកចំហរ ។
២. តើកម្ពុជាមានតួនាទីអ្វីខ្លះនៅក្នុងយុទ្ធសាស្ត្រមួយនេះ?
លោក Kentaro SONOURA ៖ ប្រទេសកម្ពុជា គឺជាប្រទេសដែលជប៉ុនបានបញ្ជូនក្រុមកងកម្លាំងថែរក្សាសន្តិភាពរបស់ខ្លួនជាលើកទីមួយ ពោល គឺជាទីកន្លែងចាប់ផ្តើមនៃគោលនយោបាយ «ការចូលរួមសន្តិភាពយ៉ាងសកម្ម» ។ ប្រទេសជប៉ុនបានសហការគាំទ្រដល់ការកសាងប្រទេសកម្ពុជាឡើងវិញ សមស្របតាមលទ្ធិប្រជាធិបតេយ្យ ក្នុងគោលបំណងចង់ចូលរួមចំណែកក្នុងការសម្រេចឲ្យបាននូវសន្តិភាព ដែលជាមូលដ្ឋានគ្រឹះនៃសណ្តាប់ធ្នាប់អន្តរជាតិសេរី និងបើកចំហរប្រកបដោយនីតិរដ្ឋ ។ ខ្ញុំសូមថ្លែងអំណរគុណចំពោះការគាំទ្រយ៉ាងពេញទំហឹងរបស់ប្រទេសកម្ពុជាដល់យុទ្ធសាស្ត្រឥណ្ឌាប៉ាស៊ីហ្វិកនេះ ដែលសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានប្រកាសនៅអំឡុងពេលទស្សនកិច្ចរបស់សម្តេចតេជោនាខែសីហា កាលពីឆ្នាំមុន ។ យើងខ្ញុំនឹងបន្តខិតខំប្រឹងប្រែងជាមួយប្រទេសកម្ពុជា ដើម្បីសម្រេចបាននូវមហាសមុទ្រឥណ្ឌាប៉ាស៊ីហ្វិកសេរី និងបើកចំហរ។
ប្រទេសកម្ពុជាដែលស្ថិតនៅកណ្តាលនៃតំបន់មេគង្គមានសារៈសំខាន់ក្នុងការពង្រឹងភាពតភ្ជាប់គ្នា ក្នុង និងក្រៅតំបន់ ។ គម្រោងរៀបចំច្រករបៀងសេដ្ឋកិច្ចខាងត្បូង ដែលរួមមានផ្លូវអាស៊ានល្បឿនលឿនទី១ និងកំពង់ផែក្រុងព្រះសីហនុ ដែលជាកំពង់ផែធំ និងទឹកជ្រៅតែមួយគត់របស់កម្ពុជានោះ នាំឲ្យកម្ពុជាអាចធ្វើការអភិវឌ្ឍបន្ថែមជាច្រើនទៀត ដោយចូលរួមក្នុងចលនានៃលំហូរអភិវឌ្ឍក្នុងតំបន់ ។ ប្រទេសជប៉ុននឹងធ្វើការជាមួយកម្ពុជា ដើម្បីឲ្យមានសហប្រតិបត្តិការជាក់ស្តែងក្រោមយុទ្ធសាស្ត្រនេះ ។
៣. តើជប៉ុននឹងអភិវឌ្ឍយុទ្ធសាស្ត្រនេះដោយរបៀបណាក្នុងតំបន់អាស៊ាន ដែលក្នុងនោះរួមមានកម្ពុជាផងដែរ ហើយថា តើយុទ្ធសាស្ត្រនេះនឹងផ្តល់អត្ថប្រយោជន៍ដូចម្តេចខ្លះដល់ប្រទេសក្នុងតំបន់នីមួយៗ ?
លោក Kentaro SONOURA ៖ តំបន់អាស៊ានដែលស្ថិតនៅចំចំណុចកណ្តាលនៃមហាសមុទ្រឥណ្ឌា និងមហាសមុទ្រប៉ាស៊ីហ្វិក មានតួនាទីដ៏សំខាន់ ដើម្បីធានាសន្តិភាព សេ្ថរភាព និងវិបុលភាពនៃតំបន់ទាំងមូល ហើយបណ្តាប្រទេសអាស៊ាន គឺជាដៃគូសំខាន់ក្នុងវិស័យសេដ្ឋកិច្ច សន្តិសុខ និងវិស័យផ្សេងៗទៀត ។ យោងតាមយុទ្ធសាស្ត្រឥណ្ឌាប៉ាស៊ីហ្វិកសេរី និងបើកចំហរ ប្រទេសជប៉ុននឹងបន្តចូលរួមក្នុងការអភិវឌ្ឍប្រទេសកម្ពុជា ក៏ដូចជាតំបន់ទាំងមូលដោយគោរពដល់មជ្ឈការ និងភាពរួបរួមគ្នានៃអាស៊ាន ។
ចំពោះប្រទេសកម្ពុជា គម្រោងសហប្រតិបត្តិការនៃការរៀបចំច្រករបៀងសេដ្ឋកិច្ចខាងត្បូង (ផ្លូវជាតិលេខ១ និងលេខ៥) និងការអភិវឌ្ឍកំពង់ផែក្រុងព្រះសីហនុនៅកម្ពុជា មានសន្តិភាពជាមួយនឹងគោលការណ៍នៃយុទ្ធសាស្ត្រឥណ្ឌាប៉ាស៊ីហ្វិកសេរី និងបើកចំហរ ។ ប្រទេសជប៉ុនបន្តជួយជំរុញការអភិវឌ្ឍសេដ្ឋកិច្ច តាមរយៈកិច្ច សហប្រតិបត្តិការ រៀបចំហេដ្ឋារចនាសម្ព័ន្ធប្រកបដោយគុណភាពខ្ពស់ និងការអភិវឌ្ឍតំបន់ជុំវិញ ។
ខ្ញុំសូមបញ្ជាក់ថា ប្រទេសជប៉ុននឹងធានាស្តង់ដារអន្តរជាតិក្នុងការអនុវត្តកិច្ចសហប្រតិបត្តិការទាំងនោះគឺ ទី១ – ភាពបើកចំហរ, ទី២ – តម្លាភាព ទី៣- សក្តានុពលសេដ្ឋកិច្ច ទី៤- ស្ថេរភាពហិរញ្ញវត្ថុនៃប្រទេសទទួលជំនួយ ទី៥- សុវត្ថិភាព ទី៦ – ការបង្កើតការងារ និងកសាងសមត្ថភាព និងទី៧ – ការយកចិត្តទុកដាក់បរិស្ថាន និងសង្គម ។ ទន្ទឹមនឹងនេះ ប្រទេសជប៉ុននឹងជំរុញកិច្ចសហប្រតិបត្តិការ ព្រមទាំងការផ្លាស់ប្តូររវាងស្ថាប័នការពារជាតិនៃប្រទេសយើងទាំងពីរ ដើម្បីសន្តិភាព និងសេ្ថរភាពព្រមទាំងចូលរួមចំណែកក្នុងការពង្រឹងអភិបាលកិច្ចល្អ តាមរយៈកិច្ចសហប្រតិបត្តិការបច្ចេកទេសនៅក្នុងវិស័យការរៀបចំប្រព័ន្ធច្បាប់ ដើម្បីពង្រឹងនីតិរដ្ឋ ។
ក្នុងនាមជាមិត្តដែលបានចូលរួមចំណែកក្នុងការកសាងប្រទេសកម្ពុជាឡើងវិញសមស្របតាមលទ្ធិប្រជាធិបតេយ្យប្រទេសជប៉ុនសង្ឃឹមថា ការបោះឆ្នោតសកលនាឆ្នាំនេះនឹងប្រព្រិត្តឹទៅដោយឆ្លុះបញ្ចាំងមតិរបស់ប្រជាជន ហើយតាមរយៈការបោះឆ្នោតនេះ ប្រទេសកម្ពុជានឹងរៀបចំស្ថានភាព ដើម្បីអភិវឌ្ឍប្រទេសឆ្ពោះទៅរកប្រទេសចំណូលមធ្យម និងខ្ពស់នៅឆ្នាំ២០៣០ ដោយមានសាមគ្គីភាពរបស់ប្រជាជនទាំងអស់គ្នា ។
ខ្ញុំសង្ឃឹមថា ក្នុងឱកាសដ៏វិសេសវិសាលនៃខួបអនុស្សាវរីយ៍៦៥ឆ្នាំ នៃការបង្កើតទំនាក់ទំនងការទូតរវាង ជប៉ុន និងកម្ពុជា ទំនាក់ទំនងមិត្តភាពនៃប្រទេសយើងទាំងពីរដែលជាដៃគូយុទ្ធសាស្ត្រនោះ នឹងរីកចម្រើនបន្ថែមទៀត ៕
ចែករំលែកព័តមាននេះ