រាជធានីភ្នំពេញ ៖ តម្លៃដីធ្លីក្នុងខេត្តព្រះសីហនុបានហក់ឡើងលើសការរំពឹងទុកនៅរយៈពេលចុងក្រោយ បន្ទាប់ពីវិនិយោគិនចិនបានសម្រុកទៅវិនិយោគនៅខេត្តទេសចរណ៍ដ៏សំខាន់មួយនេះ ។ ការឡើងថ្លៃនេះ ក៏បានធ្វើឲ្យពលរដ្ឋដែលមានដីធ្លីច្រើនត្រេកអរ ហើយក៏មានវិនិយោគិនខ្លះទៀតបានទិញដីទុកសម្រាប់លក់បន្ត ដើម្បីស្វែងរកផលចំណេញផងដែរ ។…
រាជធានីភ្នំពេញ ៖ តម្លៃដីធ្លីក្នុងខេត្តព្រះសីហនុបានហក់ឡើងលើសការរំពឹងទុកនៅរយៈពេលចុងក្រោយ បន្ទាប់ពីវិនិយោគិនចិនបានសម្រុកទៅវិនិយោគនៅខេត្តទេសចរណ៍ដ៏សំខាន់មួយនេះ ។ ការឡើងថ្លៃនេះ ក៏បានធ្វើឲ្យពលរដ្ឋដែលមានដីធ្លីច្រើនត្រេកអរ ហើយក៏មានវិនិយោគិនខ្លះទៀតបានទិញដីទុកសម្រាប់លក់បន្ត ដើម្បីស្វែងរកផលចំណេញផងដែរ ។
ដោយសារតែសកម្មភាព និងតម្លៃមានសន្ទុះបែបនេះ អ្នកជំនាញក្នុងវិស័យអចលនទ្រព្យ បានលើកឡើងថា វាមានទាំងចំណុចល្អ និងចំណុចអាក្រក់ ដោយសារតែការឡើងថ្លៃនេះ គ្មានភាពច្បាស់លាស់ទៅលើការវិនិយោគអ្វីឲ្យពិតប្រាកដ ហើយសកម្មភាពបែបនេះ វាប្រៀបដូចជាដីធ្លីនៅរាជធានីភ្នំពេញកាលពី១០ឆ្នាំមុន ដែលអ្នកពាក់ព័ន្ធគួរចាប់អារម្មណ៍ ។
លោក គីម ហ៊ាង ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានឲ្យដឹងថា ការឡើងថ្លៃដីធ្លីនៅខេត្តព្រះសីហនុ នាពេលបច្ចុប្បន្ន គឺស្រដៀងគ្នាទៅនឹងតម្លៃដីធ្លីនៅភ្នំពេញ កាលពីឆ្នាំ២០០៥, ២០០៦ ឬ២០០៧ ។
លោកថា ៖« កាលណោះ ពេលកូរ៉េចូលមកវិនិយោគនៅកម្ពុជាដំបូង បានធ្វើឲ្យតម្លៃដីធ្លីនៅកម្ពុជា ជាពិសេសនៅភ្នំពេញឡើងទ្វេជាពីរជាបី។ បន្ទាប់មក នៅអំឡុងឆ្នាំ២០០៨, ២០០៩ កូរ៉េបានដកវិនិយោគខ្លះទៅវិញ បានធ្វើឲ្យវិស័យដីធ្លីទាំងមូលជាប់គាំង ដែលនេះជាបទពិសោធន៍មួយក្នុងវិស័យដីធ្លីនៅកម្ពុជា » ។
លោកលើកឡើងថា ៖« កាលនោះ អ្នកទិញក៏កូរ៉េ អ្នកលក់ក៏កូរ៉េ ដោយកូរ៉េបានទិញពីប្រជាជនកម្ពុជាទុកលក់ឲ្យខាងកូរ៉េគ្នាគាត់បន្ត ហើយនៅពេលដែលកូរ៉េដកទុនវិនិយោគវិញ ដីទាំងនោះត្រូវទុកចោល ហើយក៏មានបញ្ហាតែម្ដង » ។
ចំពោះស្ថានភាពដីធ្លីនៅខេត្តព្រះសីហនុនាពេលបច្ចុប្បន្នវិញ លោកមើលឃើញថា ក្រោយពីវិនិយោគិនចិនបានសម្រុកទៅបណ្ដាក់ទុនវិនិយោគនៅខេត្តមួយនេះ ក៏បានធ្វើឲ្យតម្លៃដីធ្លីឡើងថ្លៃទ្វេជាពីរជាបី ហើយមានកន្លែងខ្លះឡើងដល់ទៅ៥ដងក៏មាន ប៉ុន្តែបើក្រឡេកមើលស្ថានភាពសេដ្ឋកិច្ចនៅខេត្តនោះវិញ គឺនៅដដែល ចំនួនមនុស្សនៅដដែល គឺឡើងតែតម្លៃដី ។
លោកថា ៖« ក្នុងស្ថានភាពបែបនេះ ខ្ញុំបារម្ភខ្លាចវាវិវត្តន៍ទៅដូចកាលពី១០ឆ្នាំមុន ក្នុងពេលដែលកូរ៉េចុះមកទិញដីវិនិយោគនៅភ្នំពេញដូច្នោះដែរ ។ សម្រាប់យោបល់ខ្ញុំ អ្នកមានដីនៅកំពង់សោម បើមានគេរកទិញ គួរលក់ឲ្យហើយទៅ ព្រោះមិនអាចដឹងថា ស្ថានភាពដីធ្លីវានឹងក្លាយជាយ៉ាងណាទេ ។ បើសិនជាមានការដកទុនពីសំណាក់វិនិយោគិនចិន ដូចនឹងកូរ៉េដែរនោះ វានឹងធ្វើឲ្យវិស័យដីធ្លីនៅខេត្តនោះមានបញ្ហាដែរ » ។
លោក សន សៀប នាយកគ្រប់គ្រងក្រុមហ៊ុនអចលនទ្រព្យ ឃី រៀលអ៊ីស្ទេត ក៏បានឲ្យដឹងដែរថា អ្វីៗអាចឡើងថ្លៃទៅបាន ដោយសារតែមានតម្រូវការលើទីផ្សារ ទាំងការជួល និងការទិញ ហើយការឡើងថ្លៃដីធ្លីនៅខេត្តនេះ មានទាំងវិជ្ជមាន និងអវិជ្ជមាន ។
លោកនិយាយថា ៖« ការឡើងថ្លៃដីនៅកំពង់សោម មាន២ចំណុច ព្រោះនៅទីនោះ អ្នកដែលកំពុងវិនិយោគធំ គឺជនជាតិចិន ។ ចំណុចអវិជ្ជមាន គឺថា បើសិនជាចិនដកការវិនិយោគទៅវិញអស់ ឬមួយចំនួន វាអាចនឹងប៉ះពាល់ដល់វិស័យដីធ្លី និងគម្រោងនានាដែលស្ថិតនៅក្រោមការវិនិយោគរបស់ចិន ។ ចំណែកចំណុចវិជ្ជមានវិញ ខ្ញុំមើលឃើញថា រាល់គម្រោងរបស់វិនិយោគិន មិនទាន់មានគម្រោងណាមួយលុបចោល ឬជាប់គាំងទេ បើទោះបីជាមានមតិមួយចំនួនលើកឡើងថា ចិនជាវិនិយោគិនមិនប្រាកដប្រជាក៏ដោយ » ។
លោកបន្តថា បច្ចុប្បន្ន ការវិនិយោគនានា នៅក្នុងប្រទេសកម្ពុជា ភាគច្រើនជាជនជាតិចិន ហើយគម្រោងវិនិយោគរបស់ពួកគេសុទ្ធតែមានទំហំធំ និងយូរអង្វែង ។ ដូចនេះ លោកមិនរំពឹងថា វិនិយោគិននឹងដកទុនត្រឡប់ទៅវិញទេ ព្រោះបច្ចុប្បន្ន វិនិយោគិនបានវិនិយោគលើព្រលានយន្តហោះ រ៉ែ រោងចក្រឧស្សាហកម្មធំៗ និងអគារខ្ពស់ជាច្រើននៅកម្ពុជា ហើយសុទ្ធតែជាគម្រោងវិនិយោគយូរអង្វែងផងដែរ ជាពិសេសគោលជំហររបស់ប្រមុខថ្នាក់ដឹកនាំនៃប្រទេសទាំងពីរក្នុងការពង្រឹងមិត្តភាព និងចំណងការទូត ព្រមទាំងប្ដេជ្ញាធ្វើយ៉ាងណា ឲ្យទំហំពាណិជ្ជកម្ម វិនិយោគ និងទេសចរណ៍មានកំណើនទ្វេដង ។
លោកបញ្ជាក់ថា លំហូរវិនិយោគបរទេសធំៗមកក្នុងប្រទេសកម្ពុជា បានផ្ដល់ផលប្រយោជន៍ជាច្រើនដល់កម្ពុជា ជាពិសេស ប្រជាពលរដ្ឋតែម្ដង ព្រោះបើតាមស្ថានភាពជាក់ស្ដែង កម្ពុជាមិនទាន់មានលទ្ធភាពបោះទុនវិនិយោគគម្រោងធំៗរាប់រយ រាប់ពាន់លានដុល្លារបានទេ គឺមានតែពឹងផ្អែកលំហូរទុនវិនិយោគពីបរទេសប៉ុណ្ណោះ ។
ទេសរដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ លោក ជា សុផារ៉ា បានឲ្យដឹងដែរថា បច្ចុប្បន្ននេះ វិនិយោគិនបរទេសមកពី៣ប្រទេស ដែលកំពុងវិនិយោគធំជាងគេនៅក្នុងប្រទេសកម្ពុជា ក្នុងនោះ ចិនជាប់ចំណាត់ថ្នាក់លេខ១, ប្រទេសកូរ៉េ ជាប់ចំណាត់ថ្នាក់លេខ២ និងវិនិយោគិនជប៉ុនជាប់ចំណាត់ថ្នាក់លេខ៣ ៕
ចែករំលែកព័តមាននេះ