ខេត្តប៉ៃលិន ៖ រហូតមកដល់រសៀលថ្ងៃទី១២ ខែកុម្ភៈនេះ គេសង្កេតឃើញមានសិស្សសាលាសុទ្ធតែស្រីៗ ចំនួន៣នាក់ទៀតបានដួលសន្លប់ បន្ទាប់ពីសិស្សស្រី១១នាក់បានដួលសន្លប់ជាបន្តបន្ទាប់ កាលពីចុងសប្តាហ៍មុន ខណៈកំពុងអង្គុយរៀនសុខៗ ស្រាប់តែដួលសន្លប់ដោយមិនដឹងមូលហេតុ ហើយត្រូវបានដឹកតាមរថយន្តសង្គ្រោះដឹកទៅកាន់មន្ទីរពេទ្យបង្អែកខេត្ត ដើម្បីពិនិត្យ និងព្យាបាល និងជួយសង្គ្រោះទាន់ពេលវេលា។ គ្រាន់តែទៅដល់មន្ទីរពេទ្យភ្លាម ស្រាប់តែដឹងខ្លួនដូចធម្មតាឡើងវិញ ដោយគ្រូពេទ្យពិនិត្យទៅមិនឃើញមានមេរោគអ្វីនោះឡើយ។ ហេតុការនេះបានកើតឡើងកាលពីម៉ោង១ និង៣០នាទីរសៀលថ្ងៃទី១២ ខែកុម្ភៈនេះ នៅក្នុងអនុវិទ្យាល័យសន្តិភាព ស្ថិតនៅក្នុងភូមិអូរបេង ឃុំស្ទឹងកាច់ ស្រុកសាលាក្រៅ ខេត្តប៉ៃលិន។ សូមបញ្ជាក់ថា បើតាមប្រភពពីឪពុកម្តាយសិស្សទាំងនោះ បានឲ្យដឹងថា ការដួលសន្លប់របស់ក្មេងស្រីៗ ជាសិស្សសាលាទាំងនោះកើតឡើងតាំងពីដើមខែកុម្ភៈ មកម្លេះគឺ ថ្ងៃទី៦ មានសិស្សដួលសន្លប់ចំនួន៦នាក់ ថ្ងៃទី៧ដួលសន្លប់៥នាក់ និងដួលសន្លប់បន្តបន្ទាប់ ទៀត។
ចំណែកសិស្សខ្លះទៀត គ្រាន់តែឈឺក្បាលវិលមុខ ដើរត្រលប់ទៅផ្ទះវិញ ដោយខ្លួនឯង ដោយឡែកអ្នកដែលដួលសន្លប់ ត្រូវបានលោកនាយកសាលាយកទៅពេទ្យ ហើយក៏បានឈប់ សម្រាករហូតដល់ថ្ងៃទី៩ ខែកុម្ភៈ ទើបចូលរៀនវិញ ស្រាប់តែដល់ថ្ងៃទី១២ ខែកុម្ភៈនេះ មានសិស្សស្រី៣នាក់ទៀត បានដួលសន្លប់បន្តបន្ទាប់ ដោយគេឃើញមានខាងក្រសួងសុខាភិបាល ខាងមន្ទីរអប់រំ និងអាជ្ញាពាក់ព័ន្ធចុះទៅត្រួតពិនិត្យមើលផងដែរ។ ពាក់ព័ន្ធទៅនឹងបញ្ហានេះ លោក ស្រេង ងួនអេង នាយកអនុវិទ្យាល័យសន្តិភាព បានឱ្យដឹងថា មានសិស្សសុទ្ធតែស្រីៗ ដួលសន្លប់នៅក្នុងកន្លែង ថ្នាក់រៀន ចំនួន៣នាក់ជាបន្តបន្ទាប់ ហើយម្នាក់ទៀតគ្រាន់តែជិតដួលសន្លប់ ខាងលោកមិនរាប់បញ្ចូល នោះទេ ព្រោះកាលពីយប់នាងបានទៅហូបការមិត្តភក្តិបណ្តាលឱ្យរាគរូស។
លោកបន្តទៀតថា ពេលបញ្ជូនទៅដល់មន្ទីរពេទ្យ គ្រូពេទ្យប្រាប់ថា អត់មានអាការៈអ្វីគួរឱ្យកត់សម្គាល់នោះទេ ដោយអ្នកខ្លះដាក់សេរ៉ូមរួចជាដូចធម្មតា ខ្លះទៀតគ្រាន់តែបញ្ជូនដល់ពាក់កណ្តាលផ្លូវ ស្រាប់តែដឹងខ្លួនឡើងវិញ។ នៅថ្ងៃនេះ មានអាជ្ញាធរគ្រប់លំដាប់ថ្នាក់ បានចុះទៅត្រួតពិនិត្យមើលសភាព ការណ៍ ដ៏គួរឱ្យភ្ញាក់ផ្អើលខាងលើនេះ ហើយភាគច្រើនសិស្សប្រាប់ថា ពួកគេមានអាការៈថប់ៗ ពិបាកក្នុងការដកដង្ហើម ទើបដួលសន្លប់បែបនេះ។ សូមបញ្ជាក់ថា តាំងពីបង្កើតសាលារៀនខាងលើមក អស់រយៈពេលជិត២០ឆ្នាំមកហើយ មិនធ្លាប់មានបញ្ហាអ្វីកើតឡើងនោះឡើយ ទើបតែមានបញ្ហាកើតឡើង ដោយមិនដឹងមូលហេតុកាលពីពេលថ្មីៗនេះឯង។ ចំណែកអ្នកជិតខាងបានបង្ហើបឱ្យដឹងថា មានគេឃើញវិញ្ញាណចម្លែកនៅក្បែរៗ សាលាខាងលើនោះដែរមានទាំងស្លៀកពាក់សំពត់ស ខោអាវស ដើរចុះដើរឡើងៗជុំវិញនោះ តែគេមិនហ៊ាននិយាយប្រាប់នរណាឡើយ ព្រោះមានអ្នកខ្លះគេមិនជឿនោះឡើយ។ អ្នកខ្លះទៀតអះអាងថា មូលហេតុដែលក្មេងស្រីៗ ដួលសន្លប់នេះ ដោយសារអាការៈពួកគេខ្សោយ ហើយមកពីអាកាសធាតុប្រែប្រួលផងដែរ៕
https://youtu.be/mJ-TGLFan-0
ចែករំលែកព័តមាននេះ