ទីក្រុងញូវយ៉ក ៖ យោងតាមអ្នកវិភាគម្នាក់បានឲ្យដឹងថា សហរដ្ឋអាមេរិកអាចនឹងបាត់បង់ការងារដល់៣០ម៉ឺនកន្លែង, មើលឃើញតម្លៃភាគហ៊ុនធ្លាក់ចុះ និងបង្កឲ្យតម្លៃផលិតផលកើនឡើង ប្រសិនបើលោកប្រធានាធិបតី ដូណាល់ ត្រាំ បោះបង់កិច្ចព្រមព្រៀងពាណិជ្ជកម្មសេរីអាមេរិកខាងជើង…
ទីក្រុងញូវយ៉ក ៖ យោងតាមអ្នកវិភាគម្នាក់បានឲ្យដឹងថា សហរដ្ឋអាមេរិកអាចនឹងបាត់បង់ការងារដល់៣០ម៉ឺនកន្លែង, មើលឃើញតម្លៃភាគហ៊ុនធ្លាក់ចុះ និងបង្កឲ្យតម្លៃផលិតផលកើនឡើង ប្រសិនបើលោកប្រធានាធិបតី ដូណាល់ ត្រាំ បោះបង់កិច្ចព្រមព្រៀងពាណិជ្ជកម្មសេរីអាមេរិកខាងជើង (NAFTA) ។
ក្រុមហ៊ុនប្រឹក្សាយោបល់ Oxford Economics បានចេញរបាយការណ៍នេះមុនការប្រជុំចរចាកិច្ចព្រមព្រៀង NAFTA លើកទី៦ ។
ការបាត់បង់ការងារ៣០ម៉ឺនកន្លែងនេះ នឹងប៉ះពាល់ដល់ការបង្កើតការងារក្នុងប្រទេស។ យោងតាមសភាពាណិជ្ជកម្មអាមេរិក ការងារអាមេរិកប្រមាណ១៤លានកន្លែង គឺពឹងផ្អែកលើការធ្វើពាណិជ្ជកម្មជាមួយប្រទេសម៉ិកស៊ិក និងកាណាដា ។
ប្រសិនបើលោកត្រាំ សម្រេចដកអាមេរិកចេញពីកិច្ចព្រមព្រៀងនេះ លោកត្រូវតែផ្តល់ដំណឹង៦ខែមុន ។ ដូច្នេះ Oxford Economics គិតថា ការបាត់បង់ការងារនឹងចាប់ផ្តើមកើតមានក្នុងឆ្នាំ២០១៩ ។
ការចរចាអស់៥ដងកន្លងមកនេះ មិនបានបង្ហាញពីលទ្ធផលច្រើនឡើយទាក់ទងនឹងបញ្ហាធំៗដូចជា វិធី និងទីកន្លែងផលិតរថយន្ត ។
លោកត្រាំ បានបញ្ជាក់យ៉ាងច្បាស់ថា ប្រសិនបើអាមេរិកមិនទទួលបានកិច្ចព្រមព្រៀងល្អសម្រាប់ពួកគេទេនោះ លោកនឹងដកអាមេរិកចេញពីកិច្ចព្រមព្រៀងនេះ ដែលត្រូវបានអនុម័តតាំងពីឆ្នាំ១៩៩៤មក ។
Oxford Economics បន្តថា ការធ្វើដូច្នេះនឹងប៉ះពាល់ដល់ការលូតលាស់សេដ្ឋកិច្ចរបស់អាមេរិកក្នុងឆ្នាំ២០១៩ ឲ្យស្មើត្រឹម១,៥% ប៉ុណ្ណោះ ។ ប៉ុន្តែធនាគារជាតិអាមេរិកព្យាករថា ការលូតលាស់សេដ្ឋកិច្ចក្នុងឆ្នាំនេះនឹងស្មើ២,៥% ។
អ្នកវិភាគបន្តថា ការលូតលាស់នៃការវិនិយោគនឹងអន់ថយផងដែរ ព្រោះវិនិយោគិនបារម្ភពីវិធានការការពារនិយមផ្នែកពាណិជ្ជកម្ម ។
ជាមួយគ្នានេះ ប្រទេសម៉ិកស៊ិក និងកាណាដានឹងជួបទុក្ខលំបាក ។ Oxford Economics ព្យាករថា តម្លៃប្រាក់ផេសូរបស់ម៉ិកស៊ិកនឹងធ្លាក់ចុះ៨% ខណៈតម្លៃប្រាក់ដុល្លារកាណាដានឹងធ្លាក់ចុះ២,៥% ។
ប្រទេសទាំងពីរពឹងផ្អែកយ៉ាងខ្លាំងលើការធ្វើពាណិជ្ជកម្ម ហើយពួកគេអាចនឹងទទួលរងការបាត់បង់ការងារ និងវិនិយោគច្រើនជាងអាមេរិកទៅទៀត ។
Oxford ព្យាករទៀតថា ក្នុងឆ្នាំ២០២០ សេដ្ឋកិច្ចអាមេរិកនឹងងើបឡើងវិញពីការប៉ះពាល់នេះ ប៉ុន្តែអ្នកដឹកនាំម៉ិកស៊ិកព្រមានថា នឹងប៉ះពាល់យ៉ាងខ្លាំងផ្នែកអន្តោប្រវេសន៍ ។ ពួកគេគិតថា ការបញ្ចប់កិច្ចព្រមព្រៀងនេះ អាចនឹងជំរុញឲ្យជនជាតិម៉ិកស៊ិករត់ទៅធ្វើការនៅអាមេរិកដោយខុសច្បាប់កាន់តែច្រើនថែមទៀត ៕
ចែករំលែកព័តមាននេះ