សហរដ្ឋអាមេរិកបានអះអាងថា ខ្លួនបន្តពង្រឹងកិច្ចសហប្រតិបត្តិការល្អជាកម្ពុជាផ្នែកសន្តិសុខ ព្រមទំាងការខិតខំជាបន្តនៅក្នុងការរក្សាអធិបតេយ្យភាពរបស់កម្ពុជា។
ការអះអាងរបស់សហរដ្ឋអាមេរិកដូច្នេះ បានធ្វើឡើងក្រោយពីមានជំនួបពិភាក្សាការងារមួយ រវាង លោក W. Patrick Murphy ឯកអគ្គរដ្ឋទូតសហរដ្ឋអាមេរិក នៅកម្ពុជា ជាមួយសម្តេចពិជ័យសេនា ទៀ បាញ់ ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ កម្ពុជានៅរសៀលថ្ងៃទី២២ ខែកញ្ញានេះ ។
ក្រោយជំនួបនេះ ស្ថានទូតអាមេរិកនៅកម្ពុជា បានផ្សាយថា« លោកឯកអគ្គរដ្ឋទូត W. Patrick Murphy មានការប្រជុំប្រកបដោយផ្លែផ្កាមួយ ជាមួយសម្តេចពិជ័យសេនា ទៀ បាញ់ ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ ដើម្បីពិភាក្សាពីវិស័យជាសក្តានុពលមួយចំនួន នៃកិច្ចសហប្រតិបត្តិការរឹងមាំផ្នែកសន្តិសុខ ព្រមទាំងការខិតខំជាបន្តក្នុងការរក្សាអធិបតេយ្យភាពរបស់ប្រទេសកម្ពុជា» ។
ចំណែកខាងភាគីកម្ពុជា តាមរយៈបណ្តាញសង្គមFacebook ផ្ទាល់របស់សម្តេចពិជ័យសេនា ទៀ បាញ់ បានផ្សាយត្រឹមថា« រសៀលថ្ងៃទី២១ ខែកញ្ញា ឆ្នាំ២០២០ ខ្ញុំបានទទួលស្វាគមន៍ ឯកឧត្តម W.Patrick Murphy ឯកអគ្គរដ្ឋទូតសហរដ្ឋអាមេរិក ប្រចាំព្រះរាជាណាចក្រកម្ពុជា ចូលជួបសម្តែងការគួរសម និងពិភាក្សាការងារ នៅអគារមិត្តភាព ទីស្ដីការគណៈរដ្ឋមន្ត្រី»។
បើតាមរូបភាពដែលបង្ហាញទំាងខាងស្ថានទូតអាមេរិកប្រចំានៅកម្ពុជានិងខាងសម្តេចពិជ័យសេនា ទៀ បាញ់ សមភាគីទំាងពីរបានបង្ហាញពីភាពសិទ្ធិស្នាលនិងគ្នា ។ ការផ្សាយព័ត៌មានពីជំនួបលោកឯកអគ្គរដ្ឋទូតអាមេរិកប្រចំានៅកម្ពុជា និងសម្តេចពិជ័យសេនា ទៀ បាញ់ សម្រាប់អ្នកចូលទស្សនា Facebook page របស់ស្ថានទូតអាមេរិកបានសាទរចំពោះដំណឹងជាវិជ្ជមាននៃកិច្ចសហប្រតិបត្តិការប្រទេសទំាងពីរនេះ។ ចំណែកអ្នកចូលទស្សនា Facebook page របស់សម្តេចពិជ័យសេនាទៀ បាញ់ ភាគច្រើនបានជួនពរសម្តេចឲ្យមានសុខភាព៕
ចែករំលែកព័តមាននេះ