រាជធានីភ្នំពេញ ៖ ស្ត្រីជាជនជាតិអូស្ត្រាលី២នាក់ទើបតែចេញពីក្លឹបកម្សាន្តវិញត្រូវជនសង្ស័យឆក់កាបូបស្ពាយបានសម្រេចហើយជិះរត់គេចខ្លួនបាត់ស្រមោល កាលពីវេលាម៉ោង៣និង៤០នាទីទាបភ្លឺឈានចូលថ្ងៃទី៦ ខែមិថុនា ឆ្នាំ២០១៧ តាមបណ្តោយផ្លូវព្រះនរោត្តមកែងផ្លូវ១៤៤ ស្ថិតនៅក្នុងសង្កាត់ផ្សារថ្មី៣ ខណ្ឌដូនពេញ ។
ស្ត្រីជនជាតិអូស្ត្រាលីជាម្ចាស់កាបូបមានឈ្មោះ Ellen Mellssa Iynrg អាយុ២៣ឆ្នាំ ស្នាក់នៅសណ្ឋាគារ Payillion ផ្លូវ១៩ សង្កាត់ជ័យជំនះ ខណ្ឌដូនពេញ ។ រីឯម្នាក់ទៀតមិនស្គាល់អត្តសញ្ញាណ ។
តាមប្រភពព័ត៌មានពីជនរងគ្រោះទាំង២នាក់បានប្រាប់ឱ្យដឹងថា មុនពេលកើតហេតុខ្លួនទាំង២នាក់ត្រូវជាសង្សារនឹងគ្នាទើបតែចេញមកពីក្លឹបនៅម្តុំផ្សារសូរិយាម៉ល លុះពេលដែលពួកគេចេញមកវិញគោលបំណងដើរទៅសណ្ឋាគារដែលស្នាក់នៅវិញដោយធ្វើដំណើរមកតាមបណ្តោយផ្លូវព្រះនរោត្តមក្នុងទិសដៅពីជើងទៅត្បូង ខណៈកំពុងតែដើរក៏ស្រាប់តែលេចមុខជនសង្ស័យម្នាក់ជិះម៉ូតូម៉ាកស្តុបពី ពណ៌ខ្មៅ មិនចាំស្លាកលេខបានជិះមកជិតហើយធ្វើសកម្មភាពឆក់កាបូបស្ពាយរបស់ស្ត្រីជនជាតិអូស្ត្រាលី២នាក់បានសម្រេចហើយជិះរត់គេចខ្លួនបាត់ស្រមោលនៅក្នុងកាបូបរបស់ជនរងគ្រោះដែលបាត់ក្នុងនោះមានកាំមេរ៉ាចំនួន១, ទូរស័ព្ទដៃម៉ាក IPhone 5 មួយគ្រឿង, លុយចំនួន៤៥ដុល្លារ រួមនឹងសម្ភារមួយចំនួនទៀត ។
ក្រោយពេលកើតហេតុជនរងគ្រោះទាំង២នាក់បានទៅដាក់ពាក្យបណ្តឹងនៅប៉ុស្តិ៍នគរបាលផ្សារថ្មី៣ដើម្បីឱ្យសមត្ថកិច្ចតាមចាប់ជនសង្ស័យ ៕
ចែករំលែកព័តមាននេះ