ខេត្តកំពង់ស្ពឺ ៖ ឈើប្រណីតប្រភេទធ្នង់ ដែលក្រុមឈ្មួញដឹកតាមរថយន្តពណ៌ត្រេអុីរបស់ទាហានពេញមួយរថយន្តត្រូវបានកម្លាំងជំនាញរដ្ឋបាលព្រៃឈើខេត្តធ្វើការបង្ក្រាប ខណៈដែលក្រុមឈ្មួញប្រុងដឹកឆ្លងកាត់ ឆ្ពោះមករាជធានីភ្នំពេញ និងដឹកបង្ហួសទៅលក់នៅប្រទេសវៀតណាម ។
ការបង្ក្រាបរថយន្តទាហានដឹកឈើប្រណីតនេះបានកើតមាននៅវេលារំលងអធ្រាត្រឈានចូលថ្ងៃទី២០ សីហា នៅតាមបណ្តោយផ្លូវជាតិលេខ៥ ស្ថិតក្នុងភូមិក្រាំងពន្លៃ ឃុំវាំងចាស់ ស្រុកឧដុង្គ ។ រថយន្តពណ៌ត្រេអីុទាហាន មានដឹកឈើប្រណីតនោះជាប្រភេទរថយន្ត(ដំរីទឹក) ពាក់ផ្លាកលេខខេមរភូមិន្ទ០១៣-២៧៩៤RCAF មិនស្គាល់អត្តសញ្ញាណអ្នកបើកបរ និងមេឈ្មួញម្ចាស់ឈើប្រណីតនេះទេ ព្រោះរត់គេចខ្លួនបាត់ស្រមោល ។
លោក ឌុច វ៉ាន់ឌី នាយសង្កាត់រដ្ឋបាលព្រៃឈើឧដុង្គ បាននិយាយថា មុននឹងឈានដល់ការចាប់រថយន្តខាងលើនេះគឺលោកបានទទួលដំណឹងពីថ្នាក់លើបញ្ជាថា មានរថយន្តទាហានពណ៌ត្រេអុីពាក់ផ្លាកលេខដូចខាងលើ លោកក៏បានដឹកនាំមន្ត្រីធ្វើការស្ទាក់ចាប់ ប៉ុន្តែអ្នកបើកបររថយន្តដឹកឈើនោះមិនព្រមឈប់ទេ ។
ដោយសាររថយន្តមិនព្រមឈប់ លោកក៏បានសុំគោលការណ៍ពីថ្នាក់លើបន្ថែមកម្លាំងជំនាញនិងកម្លាំងសមត្ថកិច្ចខេត្តឱ្យសហការអន្តរាគមន៍ជិត៥០នាក់ ទើបអ្នកបើកបររថយន្តឈប់ចតរថយន្តទុកចោល ហើយរត់គេចខ្លួនបាត់ ពេលនោះជំនាញបានពិនិត្យឃើញសុទ្ធតែឈើប្រណីតប្រភេទធ្នង់ពេញរថយន្តតែម្តង ។ បន្ទាប់ពីឃាត់រថយន្តបានហើយក៏បញ្ជូនមកវាស់វែងនៅខណ្ឌរដ្ឋបាលព្រៃឈើកំពង់ស្ពឺ ដើម្បីចាត់ការតាមច្បាប់រដ្ឋបាលព្រៃឈើ ។
តាមប្រភពពីមជ្ឈដ្ឋានប្រជាពលរដ្ឋបានលើកឡើងថា រថយន្តពណ៌ត្រេអីុរបស់ទាហានដឹកឈើប្រណីតនេះមិនដឹងជាមានខ្នងបង្អែកប៉ុណ្ណាទេ ទើបហ៊ានដឹកឈើប្រណីតបែបនេះ ឬក៏ម្ចាស់ឈើប្រណីតនោះជាមន្ត្រីយោធាថ្នាក់ធំទើបគេហ៊ានដឹកមិនខ្លាចញញើតកម្លាំងសមត្ថកិច្ចនិងជំនាញបែបនេះ ។
តាមប្រភពមួយបានបង្ហើបឱ្យដឹងថាឈើប្រណីតពេញរថយន្តដំរីទឹកនេះជារបស់ឧត្តមសេនីយ៍យោធាម្នាក់ មានអំណាចខ្លាំងដែលនរណាៗក៏បានស្គាល់និងខ្លាចគាត់ដែរ។ ប្រភពបានបញ្ជាក់ថា រថយន្តរបស់ក្រុមឈ្មួញមិនមែនមានតែមួយគ្រឿងនោះទេ ដូច្នេះសមត្ថកិច្ចពាក់ព័ន្ធគប្បីបង្កើនការទប់ស្កាត់ ដើម្បីការពារព្រៃឈើកុំឱ្យហិនហោចដោយសារតែក្រុមឈ្មួញទាំងអស់នោះ ៕
ចែករំលែកព័តមាននេះ