ខេត្តបាត់ដំបង ៖ មូលហេតុដែលនាំឱ្យក្រសួងមហាផ្ទៃសម្រេចប្ដឹងទៅតុលាការកំពូលឱ្យរំលាយបក្សប្រឆាំង (CNRP) គឺមានមូលហេតុសំខាន់ចំនួន២ករណី ។ នេះបើតាមប្រសាសន៍សម្ដេចក្រឡាហោម ស ខេង ដែលបានថ្លែងប្រាប់ប្រជាពលរដ្ឋ…
ខេត្តបាត់ដំបង ៖ មូលហេតុដែលនាំឱ្យក្រសួងមហាផ្ទៃសម្រេចប្ដឹងទៅតុលាការកំពូលឱ្យរំលាយបក្សប្រឆាំង (CNRP) គឺមានមូលហេតុសំខាន់ចំនួន២ករណី ។ នេះបើតាមប្រសាសន៍សម្ដេចក្រឡាហោម ស
ខេង ដែលបានថ្លែងប្រាប់ប្រជាពលរដ្ឋ និងមន្ត្រីរាជការជាង១,០០០នាក់ កាលពីរសៀលថ្ងៃទី០៩ ធ្នូ ក្នុងពេលដែលសម្ដេច បានអញ្ជើញជាគណៈអធិបតី ក្នុងពិធីសម្ពោធសាលារៀន២ខ្នង នៅភូមិខ្នាចរមាស ឃុំខ្នាចរមាស ស្រុកបវេល ។
សម្ដេចក្រឡាហោម ស ខេង បានមានប្រសាសន៍ថា មូលហេតុទី១-គឺដោយសាររកឃើញថា គណបក្សប្រឆាំង បានឃុបឃិតជាមួយបរទេស ដើម្បីធ្វើផែនការផ្ដូលរំលំរដ្ឋាភិបាលស្របច្បាប់ ហើយយើងមានភស្ដុតាងគ្រប់គ្រាន់ចំពោះរឿងនេះ ។ សម្ដេចបានថ្លែងទៀតថា ពាក្យដែលថា «រដ្ឋាភិបាលស្របច្បាប់» គឺមានន័យថា រដ្ឋាភិបាលដែលកើតចេញពីការបោះឆ្នោត អញ្ចឹងបើគេផ្ដូលរំលំ ទាំងរដ្ឋសភា ទាំងព្រឹទ្ធសភា ក៏ត្រូវរំលំដែរ ។ ជាមួយនឹងការផ្ដូលរំលំនេះ ពួកគេ (បក្សប្រឆាំង) នឹងឡើងកាន់អំណាច តែមិនមែនតាមរយៈការបោះឆ្នោតទេ គឺតាមរយៈការពឹងពាក់ ឬឃុបឃិតជាមួយបរទេស ដើម្បីផ្ដូលរំលំរដ្ឋាភិបាលស្របច្បាប់នេះតែម្ដង ។
ដោយឡែក ករណីទី២សម្ដេច ស ខេង បានថ្លែងថា មូលហេតុទី២-គឺការរៀបចំការធ្វើបដិវត្តពណ៌ ក្នុងគោលដៅ ដើម្បីផ្ដូលរំលំរដ្ឋាភិបាលដូចគ្នា ។ សម្ដេចបានរំលឹកថា កាលពីមុនយើងធ្លាប់ឮពាក្យថា «ការធ្វើរដ្ឋប្រហារ» តែពេលនេះ មិនមែនរដ្ឋប្រហារទេ គឺការប្រមូលមហាជន ដើម្បីតវ៉ាទាមទារបញ្ហានេះ បញ្ហានោះ ។ ជាក់ស្ដែង ដូចពួកគេធ្លាប់ធ្វើកាលពីអំឡុងឆ្នាំ២០១៣ កន្លងទៅ ដែលបដិសេធ មិនទទូលស្គាល់លទ្ធផលបោះឆ្នោត បដិសេធមិនចូលប្រជុំសភា។ល។
ពាក់ព័ន្ធនៃមូលហេតុទាំង២ ដែលនាំឲ្យតុលាការកំពូលរំលាយបក្សប្រឆាំងនេះ សម្ដេចក្រឡាហោម ស ខេង បានលើកឡើងអំពីច្បាប់ថា នៅក្នុងរដ្ឋធម្មនុញ្ញនៃព្រះរាជណាចក្រកម្ពុជាយើង បានហាមឃាត់ដាច់ខាត មិនអនុញ្ញាតឱ្យបក្សនយោបាយណា ឃុបឃិត ឬទទូលយកការជ្រៀតជ្រែកណាមួយផ្នែកនយោបាយពីខាងក្រៅ (បរទេស) ហូរហែចឹងទេ ។ ប៉ុន្តែផ្ទុយទៅវិញនេះ ពួកគេ (បក្សប្រឆាំង) បានដើរប្រកាសជាចំហឱ្យបរទេសជួយពីខាងក្រៅ ដើម្បីធ្វើកម្មវិធីនយោបាយសម្រប់បក្សប្រឆាំង ។ ដូច្នេះ សកម្មភាពបែបនេះ ប្រសិនទុកបន្តទៀត អនាគតប្រទេសកម្ពុជា នឹងក្លាយជាប្រទេសមានសង្គ្រាមជាមិនខាន អញ្ចឹងក្រសួងមហាផ្ទៃ ត្រូវតែស្វែងរក និងប្រមូលភស្ដុតាង ដើម្បីប្ដឹងទៅតុលាការឱ្យរំលាយបក្សនេះតែម្ដង ។
សូមបញ្ជាក់ថា ក្រសួងមហាផ្ទៃបានដាក់ពាក្យបណ្ដឹងទៅតុលាការកំពូល អមដោយវត្ថុតាងមួយចំនួនជា
ឃ្លីបវីដេអូផង ដែលក្រសួងមហាផ្ទៃអះអាងថា ជាភស្ដុតាងដែល មានជាប់ពាក់ព័ន្ធនឹងការឃុបឃិតជាមួយបរទេស ដើម្បីរៀបចំផែនការផ្ដូលរំលំរដ្ឋាភិបាលស្របច្បាប់បច្ចុប្បន្ន ដែលដឹកនាំដោយគណបក្សប្រជាជនកម្ពុជា ។ ដោយយោងលើភស្ដុតាងជាច្រើន តុលាការកំពូលបានសម្រេចបើកសវនការជំនុំជំរះលើសំណុំរឿងនេះ ដោយបានសម្រេចប្រកាសសាលក្រមជាស្ថាពរ រំលាយគណបក្សប្រឆាំង កាលពីល្ងាចថ្ងៃទី១៦ វិច្ឆិកាកន្លងទៅនេះ ហើយថែមទាំងប្រកាសបិទផ្លូវតវ៉ាទៀតផង ។
ការប្រកាសរំលាយបក្សប្រឆាំងតាមបណ្ដឹងរបស់ក្រសួងមហាផ្ទៃនេះ បានធ្វើឲ្យមន្ត្រីគ្រប់ជាន់ថ្នាក់នៃបក្សប្រឆាំងស្រែកឡាំប៉ាកើតទុក្ខមិនសុខចិត្ត ។ ថ្នាក់ដឹកនាំរបស់បក្សប្រឆាំងដ៏ធំមួយនេះ ស្ទើរទាំងបាននាំគ្នារត់ចេញទៅក្រៅស្រុក ជ្រកកោននៅប្រទេសនានា ដើម្បីស្នើដល់សហគមន៍អន្តរជាតិឱ្យជួយអន្តរាគមន៍ និងបានគៀងគរសហគមន៍ខ្មែររស់នៅបរទេសឱ្យជួយធ្វើការតវ៉ាជំទាស់នឹងសាលដីកាតុលាការកំពូលនេះទៀតផង ។ ប៉ុន្តែការតវ៉ានេះ គេសង្កេតឃើញបក្សជំទាស់បានធ្វើសកម្មភាពខ្លាំងនៅខាងក្រៅស្រុកតែប៉ុណ្ណោះ រីឯនៅក្នុងស្រុកវិញ ស្ងាត់ដូចចោរលួចសេះ ។
ចែករំលែកព័តមាននេះ