ខេត្តរតនគិរី ៖ នគរបាលការិយាល័យព្រហ្មទណ្ឌកម្រិតស្រាល សហការជាមួយនគរបាលស្រុកអូរយ៉ាដាវ បានព័ទ្ធចាប់ខ្លួនបុរសម្នាក់ ខណៈទៅបើកលុយនៅកន្លែងវេរលុយវីង កាលពីវេលាម៉ោង១២និង៣០នាទីថ្ងៃត្រង់ថ្ងៃទី៦ ខែធ្នូ នៅភូមិដែស ឃុំបរខាំ…
ខេត្តរតនគិរី ៖ នគរបាលការិយាល័យព្រហ្មទណ្ឌកម្រិតស្រាល សហការជាមួយនគរបាលស្រុកអូរយ៉ាដាវ បានព័ទ្ធចាប់ខ្លួនបុរសម្នាក់ ខណៈទៅបើកលុយនៅកន្លែងវេរលុយវីង កាលពីវេលាម៉ោង១២និង៣០នាទីថ្ងៃត្រង់ថ្ងៃទី៦ ខែធ្នូ នៅភូមិដែស ឃុំបរខាំ ស្រុកអូរយ៉ាដាវ។
ការរចាប់ខ្លួនបុរសរូបនេះ គឺពីបទកំហែងយកដែលបានគំរាមស្រីស្នេហ៍របស់ខ្លួនយកប្រាក់១.០០០ដុល្លារ ជាថ្នូរមិនបង្ហោះវីដេអូដែលខ្លួនបានរួមរ័កជាមួយ ។ជនរូបនេះឈ្មោះ ម៉ាត់ អារី អាយុ៣៤ឆ្នាំ ជាខ្មែរអ៊ិស្លាម និងជាកម្មករ មានទីលំនៅក្នុងភូមិដែស ឃុំបរខាំ រីឯជនរងគ្រោះ មានអាយុ២៨ឆ្នាំ ជាខ្មែរអ៊ិស្លាមដូចគ្នា នៅឃុំលំជ័រ ស្រុកអូរយ៉ាដាវ ។
លោក ម៉ៅ សាន់ អធិការនគរបាលស្រុកអូរយ៉ាដាវ បានឲ្យដឹងថា បុរសដែលត្រូវចាប់ខ្លួននិងស្ត្រីរងគ្រោះ ពួកគេសុទ្ធតែមានប្ដីមានប្រពន្ធរៀងៗខ្លួន តែបានលួចមានទំនាក់ទំនងសហាយស្មន់នឹងគ្នា ។ ក្រោយមក ប្រហែលជាជននេះបានខ្លួនប្រាណហើយមិនទាន់ស្កប់ស្កល់ក៏បែកគំនិតជំរិតទារប្រាក់ ដោយបានគំរាមទៅ
ស្រីស្នេហ៍លួចលាក់ថា ខ្លួនមានរូបភាពវីដេអូត្រៀមនឹងបង្ហោះលើបណ្តាញសង្គម ហើយពេលនោះរឿងអាស្រូវសហាយស្មន់នឹងត្រូវល្បីសុសសាយ ។ គ្រាន់តែឮបែបនេះ ស្ត្រីរូបនោះក៏បានអង្វរជនគំរក់នេះថា បើមានឃ្លីបវីដេអូនោះមែនកុំបង្ហោះអី ទើបជនរូបនេះទារប្រាក់ចំនួន១ពាន់ដុល្លារជាថ្នូរមិនបង្ហោះវីដេអូ ។
ដោយសារតែត្រូវប្រឈមមុខនឹងការគំរាមទារប្រាក់នេះ ស្ត្រីរងគ្រោះបានសម្រេចចិត្តឱ្យប្រាក់ទៅប្រុសសហាយនោះ តែបន្ទាប់ពីដាក់ប្រាក់ហើយក៏បានប្ដឹងទៅអធិការដ្ឋាននគរបាលស្រុក ។ បន្ទាប់ពីទទួលបានពាក្យបណ្ដឹង លោកអធិការក៏បានរាយការណ៍ទៅស្នងការដ្ឋានខេត្ត ។បន្ទាប់មក មន្ត្រីនគរបាលការិយាល័យព្រហ្មទណ្ឌកម្រិតស្រាល ក៏បានសហការជាមួយនគរបាលស្រុកអូរយ៉ាដាវ ចុះទៅលំនៅឋានជនសង្ស័យនិងឃាត់ខ្លួនតែម្ដង ។
លោកអធិការបន្តថា ជាមួយនឹងការឃាត់ខ្លួននេះ សមត្ថកិច្ចបានដកហូតវត្ថុតាងរួមមាន ប្រាក់១.០០០ដុល្លារ(វេរតាមវីង) ទូរស័ព្ទដៃ១គ្រឿងម៉ាកអាយហ្វូន ដែលមានសារគំរាមនៅក្នុងទូរស័ព្ទនោះ ។ជនគម្រក់នេះ ត្រូវបានឃាត់ខ្លួននៅស្នងការដ្ឋាននរគបាលខេត្ត ដើម្បីបំពេញសំណុំរឿងបញ្ជូនទៅសាលាដំបូង ៕
ចែករំលែកព័តមាននេះ