រាជធានីភ្នំពេញ ៖ គណប្រជាជនកម្ពុជានៅតែនាំមុខសម្លេងគាំទ្រ២៦១១សម្លេង ខណៈដែលគណបក្សសង្គ្រោះជាតិបាន២៦០៩សម្លេង ចំពោះការរាប់សន្លឹកឆ្នោតចំនួន២៣ការិយាល័យនៅឃុំដួង ខេត្តស្វាយរៀង កាលពីថ្ងៃទី១២និង១៣ ខែមិថុនា ឆ្នាំ២០១៧ ។ នេះបើតាមលោក ហង្ស ពុទ្ធា អ្នកនាំពាក្យ គ.ជ.ប ថ្លែងប្រាប់អ្នកសារព័ត៌មាននៅទីស្តីការ គ.ជ.ប ។ អ្នកនាំពាក្យបានលើកឡើងថា សន្លឹកឆ្នោតចំនួន៦៦សន្លឹកត្រូវបានគណបក្សនយោបាយមិនទទួលយករួចបានប្តឹងបន្តដល់ គ.ជ.ប និងបានធ្វើការរាប់ឡើងវិញនៅតាមការិយាល័យចំនួន២៣ការិយាល័យក្នុងឃុំដួងទាក់ទងនឹងសុពលភាពនៃសន្លឹកឆ្នោតទាំងនោះ ។ លោកថា គ.ជ.ប បានបញ្ចប់ការពិនិត្យចំពោះសន្លឹកឆ្នោតទាំង៦៦សន្លឹកហើយកាលពីល្ងាចថ្ងៃទី១២ ខែមិថុនា ឆ្នាំ២០១៧ ។
លោក ហង្ស ពុទ្ធា បានថ្លែងថាក្នុងការិយាល័យចំនួន២៣នៅឃុំដូងខេត្តស្វាយរៀងការរាប់ឡើងវិញចំនួនសន្លឹកឆ្នោតបានការមានចំនួន៥៥០១សន្លឹក និងសន្លឹកឆ្នោតអត់បានការ១៤១សន្លឹក ។ ក្នុងនោះសន្លឹកឆ្នោតចំនួន៦៦សន្លឹកត្រូវបានប្តឹងនៅពេលកំពុងរាប់តែម្តង ហើយគជបបានកំណត់សន្លឹកឆ្នោតទាំង៦៦សន្លឹកនេះហើយ ។ បណ្តឹងនេះភាគច្រើនពាក់ព័ន្ធនឹងការរាប់ឡើងវិញសន្លឹក ។ លោកបានលើកឡើងទៀតថា នៅពេលនេះមានបណ្តឹងកើនចំនួន១៨បានប្តឹងមកដល់ គ.ជ.ប បន្ថែមទៀតសរុបមានបណ្តឹងចំនួន៣៤បណ្តឹងមកដល់ គ.ជ.ប ដែលត្រូវដោះស្រាយពីមុនមានតែ១៦បណ្តឹង ។ ជុំវិញការប្រកាសលទ្ធផលផ្លូវការនៃការបោះឆ្នោតឃុំ-សង្កាត់ដែលគ្រោងប្រកាសនៅថ្ងៃទី២៥ ខែមិថុនា ឆ្នាំ២០១៧ លោកថាមិនទាន់ហានកំណត់ទេ ខណៈដែល គ.ជ.ប មិនទាន់សម្រេច ។
មន្ត្រីអ្នកនាំពាក្យរូបនេះបានលើកឡើងទៀតថា ការរាប់សន្លឹកឆ្នោតនៅឃុំដួងដែលធ្វើឡើងនៅទីស្តីការ គ.ជ.ប រហូតដល់ម៉ោង៩យប់មិនទាន់ចប់បន្តនៅថ្ងៃទី១៣ ខែមិថុនា ឆ្នាំ២០១៧ ទៀត ។ ក្រោយពេលបញ្ចប់ការរាប់ឡើងវិញនៅឃុំដួង គ.ជ.ប នឹងរាប់ឡើងវិញនៅឃុំបឹងប្រាំ ស្រុកបាវិល ខេត្តបាត់ដំបងចំនួន៩ការិយាល័យតាមពាក្យបណ្តឹងរបស់គណបក្សនយោបាយ ។ លោកបានលើកឡើងថា ការរាប់ឡើងវិញនេះបានប្រើរយៈពេល២ថ្ងៃក្នុងនោះបានរកឃើញថា គណបក្សសម្ព័ន្ធដើម្បីប្រជាធិបតេយ្យទទួលបានចំនួន១៧១សម្លេង, គណបក្សសំបុកឃ្មុំសង្គមប្រជាធិបតេយ្យមាន១៦៧សម្លេង, គណបក្សប្រជាជនកម្ពុជា២៦១១សម្លេង និងគណបក្សសង្គ្រោះជាតិមាន២៦០៩សម្លេង ។
លោក ហង្ស ពុទ្ធា បានលើកឡើងថា ចំពោះការិយាល័យចំនួន៩នៅក្នុងឃុំបឹងស្រុកបាវិលខេត្តបាត់ដំបងនេះគណបក្សប្រជាជនកម្ពុជាជាអ្នកប្តឹងឲ្យរាប់ឡើងវិញ ពីដំបូងគណបក្សប្រជាជនកម្ពុជាមានសម្លេងនាំមុខ តែគណបក្សសង្គ្រោះជាតិបានប្តឹងទៅគណៈកម្មាខេត្តរៀបចំការបោះឆ្នោតរាប់ឡើងវិញគណបក្សនេះបានសម្លេងនាំវិញ ។ គណបក្សប្រជាជនកម្ពុជាមិនសុខចិត្តបន្តប្តឹងមក គ.ជ.ប ឲ្យរាប់ឡើងវិញដែលគ្រោងធ្វើនៅព្រឹកថ្ងៃទី១៤ ខែមិថុនា ឆ្នាំ២០១៧នេះ ៕
ចែករំលែកព័តមាននេះ