រាជធានីភ្នំពេញ៖ គណៈកម្មាធិការអចិន្ត្រៃយ៍រដ្ឋសភាបានជ្រើសរើសបេក្ខភាពគណៈកម្មាធិការជាតិរៀបចំការបោះឆ្នោត (គ.ជ.ប) បានចំនួន ៣រូបថ្មី ជំនួសអ្នកចាស់ដែលមកពីកូតាអតីត CNRP ដែលលាលែងពីតំណែងកន្លងមក ទន្ទឹមនឹងនេះរដ្ឋសភាគ្រោងនឹងបោះឆ្នោតផ្តល់សេចក្តីទុកចិត្តនៅថ្ងៃទី៧ ខែធ្នូ…
រាជធានីភ្នំពេញ៖ គណៈកម្មាធិការអចិន្ត្រៃយ៍រដ្ឋសភាបានជ្រើសរើសបេក្ខភាពគណៈកម្មាធិការជាតិរៀបចំការបោះឆ្នោត (គ.ជ.ប) បានចំនួន ៣រូបថ្មី ជំនួសអ្នកចាស់ដែលមកពីកូតាអតីត CNRP ដែលលាលែងពីតំណែងកន្លងមក ទន្ទឹមនឹងនេះរដ្ឋសភាគ្រោងនឹងបោះឆ្នោតផ្តល់សេចក្តីទុកចិត្តនៅថ្ងៃទី៧ ខែធ្នូ ខាងមុខនេះ។ នេះបើតាមការឲ្យដឹងពីអ្នកនាំពាក្យរដ្ឋសភា ។
លោក ឈាង វុន អ្នកនាំឱ្យក្រុមអ្នកតំណាងរាស្ត្រគណបក្សប្រជាជនកម្ពុជានៅរដ្ឋសភា បានឲ្យដឹងក្រោយកិច្ចប្រជុំគណៈកម្មាធិការអចិន្ត្រៃយ៍រដ្ឋសភា នៅព្រឹកថ្ងៃទី៣០ វិច្ឆិកា ក្រោមអធិបតីភាពសម្តេច ហេង សំរិន ប្រធានរដ្ឋសភាថា អចិន្ត្រៃយ៍បានសម្រេចកំណត់ថ្ងៃទី៧ ខែធ្នូ ឆ្នាំ២០១៧ខាងមុខ ដើម្បីបោះ ឆ្នោតផ្តល់សេចក្តីទុកចិត្តបេក្ខភា គ.ជ.ប. ថ្មីចំនួន៣ រូប ជំនួសសមាជិក គ.ជ.ប ដែលបានលាលែងពីតំណែង ។
លោកថា បេក្ខភាព គ.ជ.ប ថ្មីនោះត្រូវអគ្គលេខាធិការដ្ឋានរដ្ឋសភាជ្រើសរើសរួចហើយ ដោយអ្នកទាំង៣រូបនេះ មានលក្ខខណៈគ្រប់គ្រាន់សម្រាប់បំពេញតួនាទីក្នុងការបំរើការងារនៅស្ថាប័ន គ.ជ.ប. ។ អ្នកទាំងរូបដែលរដ្ឋសភា នឹងបោះឆ្នោតផ្តល់សេចក្តីទុកចិត្តនោះមាន៖ លោក នុត សុខុម បេក្ខភាពមកពីគណបក្សហ៊្វុនស៊ិនប៊ិច ជាអនុប្រធាន គ.ជ.ប, លោក ឌឹម សុវណ្ណារុំ អនុប្រធានគណៈកម្មាធិការសិទ្ធិមនុស្សកម្ពុជា និងជាប្រធានផ្នែកទំនាក់ទំនងសាធារណៈនៃសាលាក្តីខ្មែរក្រហម និងលោក ហ៊ែល សារ៉ាត់ មកពីគណបក្សសញ្ជាតិកម្ពុជា ។
បើតាមការលោក ឈាង វុន ក៏បានឲ្យដឹងថា រដ្ឋសភាក៏នឹងប្រកាសសុពលភាពអ្នកតំណាងរាស្ត្រថ្មីចំនួន១១រូបផងដែរ ។ លោកបញ្ជាក់ថា៖ «នៅថ្ងៃទី៧ ធ្នូខាងមុខនេះ សភាពេញអង្គនឹងធ្វើប្រកាសសុពលភាពអ្នកតំណាងរាស្ត្រថ្មី ចំនួន១១រូប ហើយនឹងអនុម័តដោយបោះឆ្នោតសមាជិក គ.ជ.ប. ថ្មី៣រូប ។ អ្នកទាំងអស់នេះនឹងចូលស្បថនៅព្រះបរមរាជវាំងនៅថ្ងៃនោះផងដែរ»។
សូមរម្លឹកថា ការបោះឆ្នោតផ្តល់សេចក្តីទុកចិត្តដល់សមាជិក គ.ជ.ប. ថ្មី នេះធ្វើឡើងបន្ទាប់ពីរដ្ឋសភាបើកសម័យប្រជុំពេញអង្គ ប្រកាសសុពលភាពអ្នកតំណាងរាស្ត្រចំនួន៤៤ រូបកាលពីថ្ងៃទី២៧ វិច្ឆិកា ដែលមកពីគណបក្សហ៊្វុនស៊ិនប៉ិច, គណបក្សសញ្ជាតិកម្ពុជា និងគណបក្សខ្មែរអភិវឌ្ឍន៍សេដ្ឋកិច្ច។ អ្នកតំណាងរាស្ត្រទាំង៤៤រូប បានចូលស្បថនៅព្រះបរមរាជវាំងរួចហើយកាលពីថ្ងៃទី ២៨ វិច្ឆិកាឆ្នាំ២០១៧ រួមហើយ ដើម្បីទទួលបានសមាជិកសភាពេញសិទ្ធិ ៕
ចែករំលែកព័តមាននេះ