ខេត្តកំពង់ស្ពឺ ៖ ឈើហ៊ុបចំនួន៦ដុំ ស្មើនឹង៥,៦៥៣ម៉ែត្រគូប ដែលឈ្មួញលាក់ទុកក្នុងព្រៃមួយ កន្លែងត្រៀមបម្រុងដឹកចេញទៅលក់នៅក្រៅប្រទេសត្រូវបានសមត្ថកិច្ចរដ្ឋបាលព្រៃឈើបរសេដ្ឋតាមដានស្គាល់ទីតាំងចុះបង្ក្រាបទាន់ពេលវេលា ។ ទីតាំងលាក់ទុកឈើហ៊ុបខុសច្បាប់នេះស្ថិតក្នុងភូមិក្រាំងចេក(រំដួលថ្មី) ឃុំចំបក់ ស្រុកភ្នំស្រួច ខេត្តកំពង់ស្ពឺ កាលពីម៉ោង៩នឹង៤៥នាទីព្រឹកថ្ងៃទី០៩ ខែវិច្ឆិកា ឆ្នាំ២០១៧ ។ សមត្ថកិច្ចដែលចុះបង្ក្រាបឈើហ៊ុបខុសច្បាប់ខាងលើរួមមានលោក ជា សារ៉ន ផ្នែកបាលព្រៃឈើបរសេដ្ឋ មន្ត្រីខណ្ឌរដ្ឋបាលព្រៃឈើកំពង់ស្ពឺ លោកនាយសង្កាត់ត្រែងត្រយឹង កម្លាំងកងរាជ អាវុធហត្ថ ដោយអវត្តមានកម្លាំងនគរបាលប៉ុស្តិចំបក់ ។
លោកនាយផ្នែករដ្ឋបាលព្រៃឈើបរសេដ្ឋបានឲ្យដឹងថា ឈើទាំងហ៊ុបទាំង៦ដុំនេះជាប្រភេទឈើម្រេញត្រូវបានឈ្មួញដឹកមកលាក់ទុកក្នុងព្រៃក្រោយផ្ទះប្រជាពលរដ្ឋក្នុងភូមិកើតហេតុខាងលើដោយត្រៀមដឹកចេញទៅលក់នៅប្រទេសវៀតណាមតាមរថយន្តស្ទូច១គ្រឿងកាលពីម៉ោង២រំលងអធ្រាត្រឈានចូលថ្ងៃទី០៩ ខែធ្នូ ឆ្នាំ២០១៧ តែត្រូវបានបែកការណ៍ទើបលោកដឹកនាំកម្លាំងរដ្ឋបាលព្រៃឈើក្រោមឱវាទចុះពួនស្ទាក់ទាំងកណ្តាលយប់ ហើយឈ្មួញដឹងខ្លួនទាន់បានរំដោះយករថយន្តស្ទូចចេញវិញទុកឈើគរចោលក្នុងព្រៃខាងលើ ។ លោកនាយផ្នែកបញ្ជាក់ទៀតថា លុះដល់ម៉ោង៧ព្រឹកថ្ងៃដដែលលោកដឹកនាំកម្លាំងចុះរុករកឃើញឈើហ៊ុបទាំង៦ដុំមានចំនួន៥,៦៥៣ម៉ែត្រគូបក្នុងព្រៃ ។ ឈើទាំង៦ដុំត្រូវបានសមត្ថកិច្ចរដ្ឋបាលព្រៃឈើស្ទូចយកមករក្សាទុកនៅផ្នែករដ្ឋបាលព្រៃឈើបរសេដ្ឋទុកជាសម្បត្តិរដ្ឋ ដើម្បីកសាងសំណុំរឿងបញ្ជូនឡើងតុលាការចាត់ការតាមនីតិវិធី ។
ប្រជាពលរដ្ឋបានរិះគន់ទៅលើមន្ត្រីនគរបាលប៉ុស្តិ៍ចំបក់ថា អសមត្ថភាពក្នុងការទប់ស្កាត់បទល្មើសបណ្តោយឱ្យឈ្មួញដឹកជញ្ជូនឈើតាមអំពើចិត្តមិនដែលបង្ក្រាបបានមួយករណីណាឡើយជាពិសេសគឺក្រុមអង្គការអភិរក្សសត្វព្រៃតែម្តង សង្ស័យបង្ក្រាបបានតែលោកតាប្រាក់ ៕
ចែករំលែកព័តមាននេះ