ខេត្តកោះកុង ៖ បើតាមសេចក្តីរាយការណ៍បឋមបានឱ្យដឹងថា ប្រជាពលរដ្ឋបានប្រទះឃើញសាកសពមួយអណ្តែតទឹករសាត់មកអែបមាត់ច្រាំងនៃសមុទ្រក្បែរគល់ស្ពានស្រែអំបិល ហើយក៏ទៅរាយការណ៍ប្រាប់សមត្ថកិច្ចឱ្យចុះមកពិនិត្យនៅទីតាំងនោះ ហេតុការណ៍នេះបង្កឱ្យមានការភ្ញាក់ផ្អើលកាលពីម៉ោង៤រសៀលថ្ងៃទី០៩ ខែធ្នូ ឆ្នាំ២០១៧ ស្ថិតក្នុងភូមិសាលាម្នាង ឃុំស្រែអំបិល ស្រុកស្រែអំបិល ខេត្តកោះកុង។
លោកវរសេនីយ៍ឯក ម៉ា ទី អធិការនគរបាលស្រុកស្រែអំបិល បានប្រាប់តាមរយៈទូរស័ព្ទនៅព្រឹកថ្ងៃទី១០ ធ្នូ ថា សពបុរសខាងលើមានអាយុប្រហែល៣៥ឆ្នាំ បានស្លាប់ដោយលង់ទឹកច្រើនថ្ងៃមកហើយ ព្រោះសភាពសពឡើងហើមស្អុយ និងមិនមានស្លាកស្នាមអ្វីទាំងអស់នៅលើដងខ្លួន ។ ហើយពេលនេះសពត្រូវបានសមត្ថកិច្ចស្រង់យកមករក្សាទុកនៅក្នុងវត្តស្រែអំបិល ដើម្បីរង់ចាំក្រុមគ្រួសារមកទទួលយក ព្រោះព័ត៌មានចុងក្រោយសមត្ថកិច្ចទទួលបានថា សពបុរសខាងលើមានក្រុមគ្រួសាររស់នៅខេត្តកំពង់ស្ពឺ ហើយជនរងគ្រោះជាមនុស្សវិកលចរិតទៀតផង ៕
ចែករំលែកព័តមាននេះ