រាជធានីភ្នំពេញ ៖ បុរសជាម្ចាស់ហាងលក់គ្រឿងក្លែមម្នាក់ត្រូវបានកម្លាំងនគរបាលប៉ុស្ដិ៍ចោមចៅ៣ឃាត់ខ្លួនពីបទរួមភេទជាមួយអនីតិជន បន្ទាប់ពីក្រុមគ្រួសាររបស់ក្មេងស្រីដាក់ពាក្យប្ដឹងទាមទារជំងឺចិត្តចំនួ៧ពាន់ដុល្លារ និងសុំឲ្យចាត់ការតាមផ្លូវច្បាប់ ។ ហេតុការណ៍នោះបានកើតឡើងកាលពីវេលាម៉ោង១១ព្រឹកថ្ងៃទី២ ខែកុម្ភៈ ឆ្នាំ២០១៨ នៅក្នុងផ្ទះសំណាក់យីហោ លីនណាអង្គរ ដែលមានទីតាំងស្ថិតនៅក្នុងភូមិព្រៃព្រីងខាងជើង សង្កាត់ចោមចៅ៣ ខណ្ឌពោធិ៍សែនជ័យ ។
ជនសង្ស័យខាងលើឈ្មោះ អឿន រតនា អាយុ២៩ឆ្នាំ មានស្រុកកំណើតនៅក្នុងភូមិក្រូច ឃុំអង្គរាជ្យ ស្រុកព្រះស្ដេច ខេត្តព្រៃវែង មានប្រពន្ធទើបសម្រាលកូនបានរយៈពេលកន្លះខែប៉ុណ្ណោះ មកស្នាក់នៅក្នុងភូមិព្រៃទា សង្កាត់ចោមចៅ៣ ។ ចំណែកក្មេងស្រីរងគ្រោះអាយុ១៦ឆ្នាំស្នាក់នៅក្នុងសង្កាត់ចោមចៅ៣ ខណ្ឌពោធិ៍សែនជ័យ ។
យោងតាមពាក្យបណ្ដឹងរបស់ក្រុមគ្រួសារក្មេងស្រីខាងលើបានចោទប្រកាន់ថា បុរសម្នាក់នោះបានលួងលោមកូនស្រីរបស់គាត់ទៅចូលផ្ទះសំណាក់ខាងលើ ។ បន្ទាប់ពីស៊ើបដឹងច្បាស់ហើយទើបពួកគាត់មកដាក់ពាក្យបណ្ដឹងនៅប៉ុស្តិ៍រដ្ឋបាលចោមចៅ ដើម្បីឲ្យនគរបាលជួយអន្តរាគមន៍ឃាត់ខ្លួនជននោះតែម្ដង ។ មិនតែប៉ុណ្ណោះក្រោយពេលឃាត់ខ្លួនក្រុមគ្រួសារបានទាមទារសំណងជំងឺចិត្តចំនួន៧ពាន់ដុល្លារ ប៉ុន្តែជននោះបានឲ្យត្រឹមតែ៣០០ដុល្លារប៉ុណ្ណោះ ទើបមិនត្រូវរ៉ូវគ្នាហើយនគរបាលប៉ុស្តិ៍បញ្ជូនសំណុំរឿង និងជននោះទៅកាន់ផ្នែកនគរបាលព្រហ្មទណ្ឌខណ្ឌពោធិ៍សែនជ័យដើម្បីចាត់ការបន្ត ។
ដោយឡែកជនសង្ស័យបាននិយាយថា រវាងរូបគេនិងនារីរងគ្រោះបានស្រឡាញ់គ្នាជាយូរមកហើយ និងធ្លាប់បានដឹកដៃគ្នាចូលផ្ទះសំណាក់រួមរ័កបានសម្រេចជាច្រើនដង ច្រើនលើកមកហើយដែរ មិនមែនទើបតែនៅលើកទី១ប៉ុណ្ណោះទេ ។
ទាក់ទិនទៅនឹងចម្លើយសារភាពខាងលើ ត្រូវបានបុរសជាឪពុករបស់នាងរងគ្រោះខឹងខ្លាំងណាស់ និងបានចាត់ទុកថាជាការបំផ្លើស ព្រោះតាមអ្វីដែលកូនស្រីគាត់និយាយមិនដូចសម្តីរបស់ជននោះឡើយ គឺគេបានលួងលោមកូនស្រីគាត់រហូតដល់លង់ខ្លួនបែបនេះ ៕
ចែករំលែកព័តមាននេះ