រាជធានីភ្នំពេញ ៖ លោកម៉ម សំនៀង បានយកឈ្នះក្នុងការប្រឡងចម្រៀងវគ្គពាក់កណ្តាលផ្តាច់ព្រ័ត្រកាលពីរាត្រីថ្ងៃសៅរ៍ទី៩ ធ្នូ ឆ្នាំ២០១៧ ។ ជ័យជម្នះនេះធ្វើឱ្យលោកមានអារម្មណ៍រំភើបរីករាយយ៉ាងខ្លាំង ។…
រាជធានីភ្នំពេញ ៖ លោកម៉ម សំនៀង បានយកឈ្នះក្នុងការប្រឡងចម្រៀងវគ្គពាក់កណ្តាលផ្តាច់ព្រ័ត្រកាលពីរាត្រីថ្ងៃសៅរ៍ទី៩ ធ្នូ ឆ្នាំ២០១៧ ។ ជ័យជម្នះនេះធ្វើឱ្យលោកមានអារម្មណ៍រំភើបរីករាយយ៉ាងខ្លាំង ។
មុនការប្រកាសលទ្ធផល ក្នុងអំឡុងពេលផ្ញើសារបោះឆ្នោត ពិធីករបានផ្តល់សិទ្ធិឱ្យទស្សន៍ទាយសមត្ថភាពបេក្ខជន ។ ពេលនោះអ្នកនាងម៉េង កែវពេជ្ជតា ជាគណៈកម្មការបានទស្សន៍ទាយកូនក្រុមលោកណូយ វ៉ាន់ណេត ដែលមានលោកម៉ម សំនៀង និងប៊ិត ចន ហើយចុងក្រោយពេញចិត្តលោកសំនៀង ។
បេក្ខជនដែលបានបន្តទៅវគ្គចុងក្រោយមាន៤នាក់ គឺលោកម៉ម សំនៀង កូនក្រុមលោកណូយ វ៉ាន់ណេត កញ្ញាស៊ីជីង កូនក្រុមអ្នកនាងម៉េង កែវពេជ្ជតា កញ្ញាហ៊ុន សុរ៉ន កូនក្រុមអ្នកស្រីហ៊ឹម ស៊ីវន និងបេក្ខជននាង វិចិត្រ កូនក្រុមរបស់លោកហួរ ឡាវី ។
លោកម៉ម សំនៀង ជាបងប្រុសតារាចម្រៀងដួង វីរៈសិទ្ធិ ហើយលោកគឺជាអ្នកអត្ថាធិប្បាយព្រឹត្តិការណ៍ព័ត៌មានម្នាក់ប្រចាំស្ថានីយទូរទស្សន៍បាយ័ន ។ ពេលនេះលោកបានវិវឌ្ឍខ្លួនជាបេក្ខជនប្រឡងចម្រៀងមួយរូបនៅក្នុងកម្មវិធី «សំនៀងឯក ខារ៉ាបាវ» របស់ស្ថានីយទូរទស្សន៍បាយ័ន ។
លោកម៉ម សំនៀង ធ្វើឱ្យប្រិយមិត្តដែលធ្លាប់ស្គាល់លោកតាមទូរទស្សន៍ភ្ញាក់ផ្អើលជាខ្លាំង តាមរយៈការបង្ហើរសំនៀងយ៉ាងពីរោះដែលពីមុនគេមិនដែលធ្លាប់បានដឹងសោះថាអ្នកអត្ថាធិប្បាយរូបនេះច្រៀងបានពីរោះបែបនេះឡើយ ដោយគេឃើញតែលោកឈរ ឬអង្គុយមុខកាមេរ៉ាអធិប្បាយព្រឹត្តិការណ៍ព័ត៌មាន ។
លោកម៉ម សំនៀង បានសន្យាថានឹងជួយលើកស្ទួយបទចម្រៀងមរតកដើមដែលមានតម្លៃកាត់ថ្លៃមិនបាន ហើយនឹងបញ្ចេញស្នាដៃតែងនិពន្ធបទចម្រៀងដោយខ្លួនឯងឱ្យមហាជនបានស្គាល់ ។
ម៉ម សំនៀង បញ្ជាក់ថា ការប្រកួតដែលចាប់ផ្តើមនៅវេលាម៉ោង៨យប់តាមកញ្ចក់ទូរទស្សន៍បាយ័ននោះ គឺជាវគ្គដ៏ក្តៅគគុក ដោយលោកប៉ះដៃគូប្រកួតជាបេក្ខជនមួយរូបទៀត ដើម្បីដណ្តើមឱកាសឡើងទៅកាន់វគ្គផ្តាច់ព្រ័ត្រ ហើយលោកក៏ធ្វើបានសម្រេច ៕
ចែករំលែកព័តមាននេះ