ខេត្តព្រះសីហនុ ៖ បង្គោលភ្លើងមួយកន្លែងស្ថិតនៅចំណុចមុខបុរី BS អូ៥ ស្ថិតក្នុងភូមិ៦ សង្កាត់លេខ៤ ក្រុងព្រះសីហនុ បានឆ្លងចរន្តអគ្គិសនីឆេះសន្ធោសន្ធៅបង្កឱ្យមានការភ័យខ្លាចដល់អ្នករស់នៅជុំវិញ និងអ្នកធ្វើដំណើរឆ្លងកាត់ បើទោះបីជាការឆេះនេះត្រូវបានគ្រប់គ្រងទាំងស្រុងនៅប៉ុន្មាននាទីក្រោយមក ក្រោមការអន្តរាគមន៍ពីមន្ត្រីជំនាញពន្លត់អគ្គិភ័យ នៃស្នងការដ្ឋាននគរបាលខេត្តយ៉ាងណាក្តី ។
ជុំវិញអគ្គិភ័យនេះផងដែរ យោងតាមប្រភពព័ត៌មានបឋមបានឱ្យដឹងថា ហេតុការណ៍នេះពុំបានបណ្តាលឱ្យមានគ្រោះថ្នាក់ដល់ទ្រព្យសម្បត្តិ ឬអាយុជីវិតមនុស្សណាម្នាក់នោះទេ ប៉ុន្តែវាបានបង្កឱ្យមានការព្រួយបារម្ភ ពីសំណាក់អ្នកដែលកំពុងរស់នៅក្បែរៗបង្គោលអគ្គិសនីព្រោះបច្ចុប្បន្ននេះ តាមបង្គោលភ្លើងនីមួយៗនៅក្នុងក្រុងព្រះសីហនុ គេសង្កេតឃើញមានខ្សែភ្លើងធ្លាក់រប៉ាត់រប៉ាយស្ទើរដល់ដីគ្មានសណ្តាប់ធ្នាប់ ជាខ្សែអនាធិបតេយ្យ ប៉ុន្តែគេពុំដែលបានឃើញមន្ត្រីជំនាញចុះមកធ្វើការកែសម្រួលខ្សែបណ្តាញនោះទេ ។
ជាក់ស្តែងនាវេលាថ្ងៃត្រង់ថ្ងៃទី១០ ធ្នូ បើយោងតាមប្រភពអ្នកឃើញហេតុការណ៍បានបញ្ជាក់ថា ការឆ្លងចរន្តអគ្គិសនីនេះ អាចមកពីរថយន្តធំបើកទាក់ខ្សែភ្លើងដែលបានយាធ្លាក់មកក្រោម ប៉ុន្តែរថយន្តធុនធំនោះ ត្រូវបើកគេចខ្លួនក្រោយបង្កជាអគ្គិភ័យឆេះបង្គោលភ្លើងនោះ ។
ដោយឡែកយោងតាមប្រភព សមត្ថកិច្ចមូលដ្ឋានបានបង្ហើបឱ្យដឹងថា ភ្លើងឆេះខ្សែនេះ ត្រូវរលត់ទៅវិញ ត្រឹមតែ២០នាទីក្រោយកើតហេតុតែប៉ុណ្ណោះ ក្រោមការជួយអន្តរាគមន៍ពីស្ថាប័នពាក់ព័ន្ធក្នុងមូលដ្ឋាន និងមន្ត្រីជំនាញនៃស្នងការដ្ឋាននគរបាលខេត្ត ៕
ចែករំលែកព័តមាននេះ