រាជធានីភ្នំពេញ ៖ ជារៀងរាល់ឆ្នាំក្រសួងវប្បធម៌ និងវិចិត្រសិល្បៈ តែងតែប្រារព្ធមហោស្រពបង្ហើរខ្លែងខ្មែរ ក្នុងក្របខណ្ឌទូទាំងប្រទេស។ ក្នុងឆ្នាំ២០១៧នេះរដ្ឋបាលខេត្តកែប បានសហការជាមួយក្រសួងវប្បធម៌ និងវិចិត្រសិល្បៈ រៀបចំមហោស្រពបង្ហើរខ្លែងខ្មែរលើកទី២១ នៅថ្ងៃទី២៤ ខែធ្នូ ឆ្នាំ២០១៧ ស្ថិតនៅបរិវេណដីឡូត៍ជាប់ផ្លូវប្របមាត់សមុទ្រ ឆ្ពោះទៅឆ្នេរអង្កោល ។
ការរៀបចំមហោស្រពបង្ហើរខ្លែងនេះក្នុងគោលបំណងថែរក្សា ប្រពៃណី វប្បធម៌ ទំនៀមទម្លាប់ដ៏ល្អផូរផង់របស់ជាតិយើង និងជំរុញលើកកម្ពស់វិស័យទេសចរណ៍ខេត្ត ក៏ដូចជាបង្កការសប្បាយរីករាយជូនដល់ភ្ញៀវជាតិ និងអន្តរជាតិក្នុងឱកាសពិធីបុណ្យសមុទ្រឆ្នាំ២០១៧ ។
លោកកែន សត្ថា អភិបាលខេត្តកែប បានប្រាប់កោះសន្តិភាពនៅថ្ងៃទី៨ ខែធ្នូ ឆ្នាំ២០១៧តាមទូរស័ព្ទថាចំពោះខ្លែងដែលត្រូវចូលរួមមានដូចជា ខ្លែងឯក ឬខ្លែងព្នង និងខ្លែងដែលពេញនិយមប្រចាំតំបន់ ឬខ្លែងច្នៃប្រឌិត ផ្សេងៗ។ ចំពោះលក្ខខណ្ឌវិនិច្ឆ័យ គឺមានទម្រង់ និងបច្ចេកទេសផលិតល្អ សោភ័ណភាពល្អ(វិចិត្រកម្ម) បង្ហើរឡើង និងដាក់ចុះបានល្អ ។
នេះជាលើកទី១សម្រាប់ខេត្តកែប ដែលរាជរដ្ឋាភិបាលបានជ្រើសរើសសម្រាប់ប្រារព្ធពិធីបើកមហោស្រពបង្ហើរខ្លែងខ្មែរប្រចាំឆ្នាំ២០១៧ ។
ឆ្នាំ២០១៦ ខេត្តកែបបានប្រារព្ធពិធីបង្ហើរខ្លែងខ្មែរប្រចាំខេត្ត ដែលមានខ្លែងសរុប ១៨៤ខ្លែង ក្នុងនោះមានខ្លែងឯកចំនួន២៦ខ្លែង និងខ្លែងច្នៃប្រឌិត១៥៨ខ្លែង ដែលមានអ្នកចូលរួមជាង១ពាន់នាក់ ។
ការប្រារព្ធពិធីបង្ហើរខ្លែងខ្មែរ ប្រចាំឆ្នាំ២០១៧នេះ រដ្ឋបាលខេត្តកែបរំពឹងថា នឹងមានភ្ញៀវកើន១គុណនឹង២០ទៅ៣០ដងបើប្រៀបធៀបនឹងការប្រារព្ធប្រចាំខេត្ត ព្រោះវាជាការប្រកួតថ្នាក់ជាតិ ដែលមានអ្នកចូលរួមពីគ្រប់ខេត្ត-រាជធានីទាំងអស់ ។
លោកកែន សត្ថា ថា រដ្ឋបាលខេត្តមិនទាន់ដឹងពីចំនួនខ្លែង និងអ្នកចូលរួមទេ ព្រោះទើបតែចាប់ផ្ដើមទទួលពាក្យ ហើយក្រសួងក៏មិនទាន់បានផ្ដល់ទិន្នន័យមកដែរ ។
ក្រសួងវប្បធម៌ និងវិចិត្រសិល្បៈបានរៀបចំបើកមហោស្រពខ្លែងចំនួន៣លើកលក្ខណៈអន្តរជាតិ គឺនាឆ្នាំ២០០៤ នៅភ្នំពេញមានខ្លែងអន្តរជាតិ៥ប្រទេស ចូលរួម ។ ឆ្នាំ២០០៦ នៅខេត្តសៀមរាប មានខ្លែងអន្តរជាតិ១៧ប្រទេសចូលរួម ។ នៅឆ្នាំ២០១០ នៅខេត្តកោះកុង មានខ្លែងអន្តរជាតិ៩ប្រទេសបានចូលរួម ។
ខ្លែងខ្មែរធ្លាប់ចូលរួមមហោស្រពអន្តរជាតិចំនួន៦៥លើក នៅប្រទេសបារាំង១៣លើក អ៊ីតាលី៨លើក ម៉ាឡេស៊ី១៦លើក អង់គ្លេស៣លើក ឥណ្ឌូណេស៊ី៣លើក ឥណ្ឌា៦លើក វៀតណាម៥លើក ជប៉ុន២លើក ចិន៤លើក ព្រុយណេ១លើក កូរ៉េខាងត្បូង១លើក ថៃ១លើក និងប្រទេសសិង្ហបុរី២លើក ៕
ចែករំលែកព័តមាននេះ