រាជធានីភ្នំពេញ ៖ មានមនុស្សមិនតិចទេដែលមានបាន ហើយអ្នកខ្លះក្លាយជាសេដ្ឋីដោយសារដីឡើងថ្លៃ ។ ពេលខ្លះ ពួកគេមិនដែលគិតទេថា ដីដែលពួកគេបានទិញទុកចោលរយៈពេលជាច្រើនឆ្នាំនោះ អាចផ្តល់ផលចំណេញលើសពីការរំពឹងទុកបែបនេះ ។
«Land Banking» ជាយុទ្ធសាស្ត្រវិនិយោគលើវិស័យដីធ្លីមួយ ដោយទិញដីទុកក្នុងដំណាក់កាលមួយ រួចលក់ចេញនៅពេលដែលទីផ្សារចាប់មានតម្រូវការខ្លាំង និងទទួលបានតម្លៃខ្ពស់។ ទោះជាបែបនេះក្តី មានមនុស្សមិនច្រើនទេ ដែលមើលឃើញពីតម្លៃ ឬឱកាសក្នុងការវិនិយោគបែបនេះ ។
លោក ង៉ែត ជូ អ្នកសេដ្ឋកិច្ច និងជាទីប្រឹក្សាជាន់ខ្ពស់នៃក្រុមហ៊ុនប្រឹក្សាយោបល់វិនិយោគ បានគូសបញ្ជាក់ថា ការដែលពួកគេមើលមិនឃើញពីតម្លៃ ឬឱកាសក្នុងការវិនិយោគ ដោយសារតែអ្នកវិនិយោគភាគច្រើនចង់បានប្រាក់ចំណេញភ្លាមៗ ។
លោកគូសបញ្ជាក់ថា ៖« បញ្ហានៅត្រង់ថាអ្នកវិនិយោគជាច្រើនមិនមានចំណាប់អារម្មណ៍នឹងឱកាសនេះទេ ព្រោះពួកគេខ្វះការអត់ធ្មត់។ ពួកគេចង់បានប្រាក់ចំណេញភ្លាមៗ ហើយមិនចង់រង់ចាំទទួលបានផលចំណេញច្រើនក្នុងរយៈពេលវែង រហូតដល់រាប់ទសវត្សរ៍នោះទេ » ។
អ្នកជំនាញខាងវិនិយោគរូបនេះបានបញ្ជាក់ថា យុទ្ធសាស្ត្រ «Land Banking» នេះ មិនមែនជាយុទ្ធសាស្ត្រថ្មីទេ ។ តាមប្រវត្តិសាស្ត្រមានមហាសេដ្ឋីល្បីឈ្មោះនៅលើពិភពលោក មួយចំនួនក្លាយជាមានទ្រព្យច្រើន ដោយសារតែការទិញទុកនេះ ។
លោកបានពន្យល់ថា កាលពីជាង៥០០ឆ្នាំមុន អ្នកវិនិយោគជនជាតិអាមេរិកាំង ដើមកំណើតអាល្លឺម៉ង់ លោក John Jacop Aster បានប្រើយុទ្ធសាស្ត្រនេះ ដើម្បីប្រែខ្លួនលោកជាមហាសេដ្ឋីមានទ្រព្យរហូតដល់១១០ពាន់លានដុល្លារអាមេរិក និងជាមហាសេដ្ឋីជាប់លំដាប់លេខ៤ ក្នុងប្រវត្តិសាស្ត្ររបស់អាមេរិក ។ លោកJohn Jacop Aster បានទិញដីមានទំហំធំ ដែលសព្វថ្ងៃ ត្រូវបានគេស្គាល់ថា ជាទីក្រុងមែនហាថែន (Manhattan) ជាផ្នែកមួយនៃទីក្រុងញូវយ៉ក ។
ករណីសិក្សាមួយផ្សេងទៀត គឺមហាសេដ្ឋីអចលនទ្រព្យរបស់ថៃ លោក Songsakdi ដែលបានទិញវាលស្រែជាង១៦០ហិកតាក្នុងកំឡុងឆ្នាំ១៩៨០ រួចអភិវឌ្ឍន៍ជាខុនដូ និងអគារពាណិជ្ជកម្មនៅឆ្នាំ២០០០ប្លាយ ។
អ្នកសេដ្ឋកិច្ចរូបនេះ បានសរសេរពន្យល់នៅលើគណនីហ្វេសប៊ុករបស់លោកថា ប្រភពនៃផលចំណេញពីការធ្វើ Land Banking មាន២គឺ ៖
១-ផលចំណេញពីការលក់ដីក្នុងតម្លៃខ្ពស់ជាងតម្លៃនៅពេលទិញ ។
២-ផលចំណេញពីការជួលដី ឬប្រកបរបរនានាដូចជា ការដាំឈើលក់ជាដើម ។
លោក ង៉ែត ជូ បានប្រាប់កោះសន្តិភាពបន្ថែមថា ដើម្បីអនុវត្តយុទ្ធសាស្ត្រ «Land Banking» នេះឲ្យកាន់តែជោគជ័យ និងទទួលបានផលចំណេញខ្ពស់ ត្រូវទិញដីទុករយៈពេលពី៥ទៅ១០ឆ្នាំ ហើយត្រូវវិនិយោគលើដីដែលមានតម្លៃទាប (ត្រឹម១ម៉ែត្រការ៉េក្រោម១០ដុល្លារ) ចម្ងាយមិនឆ្ងាយពីក្រុង អាចត្រឹម៥-១០ឆ្នាំ ការពង្រីកក្រុងនឹងទៅដល់ ជាដីជាប់ផ្លូវ និងមិនមែនជាដីទំនាបខ្លាំង ។
លោក ង៉ែត ជូ ថ្លែងថា ៖« កាលណាដីមានតម្លៃខ្ពស់ពេក រហូត១ម៉ែត្រការ៉េរាប់រយ រាប់ពាន់ដុល្លារ ដីនោះក៏កើនតម្លៃតិចដែរ ប៉ុន្តែបើដីថោកខ្លាំង នៅរាប់រយគីឡូម៉ែត្រពីក្រុង ក្រុងមិនអាចពង្រីកដល់នោះ ក៏ពិបាកនឹងទទួលបានផលចំណេញខ្ពស់ដែរ » ។
អ្នកសេដ្ឋកិច្ចវ័យក្មេងនេះបានប្រាប់ថា ការវិនិយោគនេះក៏អាចមានហានិភ័យផងដែរ វាអាចមានតិចឬច្រើន អាស្រ័យទៅលើការគ្រប់គ្រងវា ។ លោកបន្តថា ទោះបីជានៅកម្ពុជាមានអ្នករកស៊ីដីធ្លីច្រើន មិនមែនជាហានិភ័យទេ អ្វីដែលជាហានិភ័យ គឺការមិនអាចក្តាប់ពីព័ត៌មានតម្លៃទីផ្សារ ក៏ដូចជាការគ្រប់គ្រងលំហូរសាច់ប្រាក់ផ្ទាល់ខ្លួនមិនបានច្បាស់លាស់ ។
លោក ង៉ែត ជូ កំពុងតែអនុវត្តយុទ្ធសាស្ត្រនេះលើគម្រោងមួយមានឈ្មោះថា «គម្រោងមហាយាន» ដោយលោកគ្រោងចំណាយលុយ១០ម៉ឺនដុល្លារទិញដី១០ហិកតា ដែលមានចម្ងាយ១៦គីឡូម៉ែត្រពីព្រំប្រទល់ក្រុងភ្នំពេញ ដើម្បីដាំប្រភេទកូនឈើសម្រាប់ធ្វើគ្រឿងសង្ហារិម បង្កើតជារមណីយដ្ឋានធម្មជាតិលម្ហែនៅជិតក្រុង ក្នុងនោះមានសួនបន្លែធម្មជាតិ និងលក់ដីឡូតិ៍នៅតំបន់នោះ ដោយលោករំពឹងថា នៅ១០ឆ្នាំខាងមុខ តម្លៃដីនេះនឹងកើនឡើង៥ដងនៃតម្លៃដីបច្ចុប្បន្ន ។
លោកថ្លែងថា ៖« យើងមានបំណងវិនិយោគក្នុងរយៈពេល១០ឆ្នាំ ទើបលក់ចេញ ឬអភិវឌ្ឍន៍ជាគម្រោងផ្សេងៗ ។ ១០ឆ្នាំទៅមុខទៀត ទីនោះនឹងក្លាយជាផ្នែកមួយនៃទីក្រុងភ្នំពេញ ។ យើងមានក្តីរំពឹងថា តម្លៃក្នុងពេល១០ឆ្នាំក្រោយយ៉ាងហោចណាស់ ស្មើនឹង៥ដងនៃតម្លៃនាពេលបច្ចុប្បន្ន » ។
លោកបានឱ្យដឹងថា នេះជាគម្រោង Land Banking ខ្នាតតូច ហើយលោកមានទស្សនវិស័យអភិវឌ្ឍន៍ជាគម្រោងខ្នាតធំនៅថ្ងៃអនាគតផងដែរ ។
អ្នកស្រី សារិន លក្ខិណា ដែលបានទិញដី៣ប្លង់ជាដីចម្ការនៅតំបន់សាលាលេខប្រាំ ជិតបន្ទាយលង្វែក ខេត្តកំពង់ឆ្នាំង បានប្រាប់ថា ដំបូងឡើយ អ្នកស្រីមិនបានចាប់អារម្មណ៍ទិញដីយកមកវិនិយោគ ឬទុកលក់យកចំណេញទេ ប៉ុន្តែប៉ុន្មានឆ្នាំក្រោយមក តម្លៃដីដែលអ្នកស្រីបានទិញ ត្រូវបានគេឱ្យតម្លៃ៣ដងលើតម្លៃបានទិញ ប៉ុន្តែអ្នកស្រីមិនទាន់លក់ទេ ដោយអ្នកស្រីយល់ថា ដីនេះនឹងលក់បានថ្លៃជាងនេះនៅពេលខាងមុខ ។
បើទោះជាដីទាំង៣ប្លង់ដែលអ្នកស្រីបានទិញមានទំហំតូច និងតម្លៃមិនដល់១ម៉ឺនដុល្លារ ប៉ុន្តែអ្នកស្រីរំពឹងថា នៅប៉ុន្មានឆ្នាំទៅមុខទៀត នៅពេលតំបន់នេះមានការអភិវឌ្ឍជាងនេះ ដីរបស់អ្នកស្រី នឹងអាចលក់បានពី៥ម៉ឺនទៅ១០ម៉ឺនដុល្លារ ។ ខណៈដីនេះទុកទំនេរចោលអស់ជាច្រើនឆ្នាំមកហើយ អ្នកស្រីមានគម្រោងដាក់ជួលឱ្យគេផងដែរ ។
ស្ត្រីវ័យ៣៦ឆ្នាំរូបនេះ បានគាំទ្រយុទ្ធ សាស្ត្រ«Land Banking» របស់លោក ង៉ែត ជូ ។ អ្នកស្រីបានលើកឡើងថា គម្រោងទិញដី ហើយទុកលក់នៅដំណាក់កាលណាមួយពិតជាចំណេញបានច្រើន ហើយប្រសិនបើអ្នកស្រីមានលុយច្រើន អ្នកស្រីនឹងទិញដីដើម្បីទុកលក់នៅពេលដីមានតម្រូវការ និងមានតម្លៃខ្ពស់ ៕
ចែករំលែកព័តមាននេះ