ខេត្តព្រះសីហនុ ៖ ក្រុមយុវជនជាបុគ្គលិកកាស៊ីណូខ្សាច់មាសចំនួន៥នាក់វេលាម៉ោង៩និង១០នាទីយប់ ថ្ងៃទី១២ ខែមិថុនា ឆ្នាំ២០១៧ ត្រូវបានសមត្ថកិច្ចចាប់ខ្លួនបញ្ជូនទៅកាន់ស្នងការដ្ឋាននគរបាលខេត្តដើម្បីសាកសួរបន្ទាប់ពីពួកគេបានធ្វើសកម្មភាពអុកឡុកនៅតាមផ្លូវត្រង់ចំណុចក្រុមទី១៧ ភូមិ០៤ សង្កាត់លេខ០៤ ក្រុងព្រះសីហនុដោយក្រុមយុវជនទាំងនេះបានកាន់ដាវសាំម៉ូរ៉ៃបម្រុងដេញកាប់អ្នកធ្វើដំណើរតាមផ្លូវ ។
យោងតាមប្រភពពីសមត្ថកិច្ចល្បាតបានឱ្យឱ្យដឹងថា នៅយប់កើតហេតុខណៈក្រុមល្បាតរបស់ការិយាល័យព្រហ្មទណ្ឌនៃស្នងការដ្ឋានខេត្តព្រះសីហនុដើរល្បាតនៅតាមបណ្តោយផ្លូវសំខាន់ៗក្នុងក្រុងព្រះសីហនុបានប្រទះក្រុមយុវជនមួយក្រុមចំនួន៥នាក់កាន់ដាវសាំម៉ូរ៉ៃចំនួន២ដើម ដើរលើផ្លូវបំណងដេញកាប់អ្នកធ្វើដំណើរម្នាក់ជាកូនមន្ត្រីកងរាជអាវុធហត្ថខេត្តទើបក្រុមរបស់លោកបានសហការណ៏ជាមួយកំលាំងប៉ុស្តិ៍រដ្ឋបាលសង្កាត់លេខ៤ធ្វើការឡោមព័ទ្ធឃាត់ខ្លួនបានចំនួន៥នាក់រត់រួចមួយចំនួនរួមជាមួយដាវសាំម៉ូរ៉ៃចំនួន២ដើម ដបជក់ថ្នាំញៀនចំនួនផងដែរ ។
ប្រភពពីសមត្ថកិច្ចដដែលបានបញ្ជាក់ទៀតថា យុវជនទាំង៥នាក់ដែលបានឃាត់ខ្លួននេះមានទី១-ឈ្មោះ ទៀង រម្យ អាយុ២២ឆ្នាំ, ទី២-ឈ្មោះ ធឿត លីម អាយុ២១ឆ្នាំ, ទី ៣-ឈ្មោះទៀង ដា អាយុ២០ឆ្នាំ, ទី៤-ឈ្មោះ សូ ដា រ៉ា អាយុ២៣ឆ្នាំ និងទី៥-ឈ្មោះ ឈឿន ផារ៉ា អាយុ២៣ឆ្នាំ អ្នកទាំង៥នាក់បច្ចុប្បន្នស្នាក់បន្ទប់ជួលក្រុមទី១៧ ភូមិ០៤ សង្កាត់លេខ៤ ក្រុងព្រះសីហនុ ។ បច្ចុប្បន្នយុវជនជើងខ្លាំងទាំង៥នាក់កំពុងត្រូវបានកំលាំងសមត្ថកិច្ចជំនាញធ្វើការសាកសួរទៅតាមនីតិវិធីច្បាប់ ៕
ចែករំលែកព័តមាននេះ