រាជធានីភ្នំពេញ ៖ ខណៈកំណើនប្រជាពលរដ្ឋនៅរាជធានីភ្នំពេញកាន់តែច្រើន តម្រូវការលំនៅឋាន និងដីសម្រាប់សាងសង់ក៏កាន់តែច្រើនដែរ។ ម្យ៉ាងវិញទៀត ការទិញលក់ដីឡូត៍កំពុងតែមានសកម្មភាពខ្លាំងនៅជាយរាជធានីភ្នំពេញ និងបានរាលដាលទៅដល់បណ្ដាខេត្តនានាជាប់រាជធានី និងខេត្តដែលមានសក្ដានុពលនៅក្នុងប្រទេសកម្ពុជា ។…
រាជធានីភ្នំពេញ ៖ ខណៈកំណើនប្រជាពលរដ្ឋនៅរាជធានីភ្នំពេញកាន់តែច្រើន តម្រូវការលំនៅឋាន និងដីសម្រាប់សាងសង់ក៏កាន់តែច្រើនដែរ។ ម្យ៉ាងវិញទៀត ការទិញលក់ដីឡូត៍កំពុងតែមានសកម្មភាពខ្លាំងនៅជាយរាជធានីភ្នំពេញ និងបានរាលដាលទៅដល់បណ្ដាខេត្តនានាជាប់រាជធានី និងខេត្តដែលមានសក្ដានុពលនៅក្នុងប្រទេសកម្ពុជា ។
ដោយឡែក តំបន់ភ្នំរាប និងភ្នំប្រសិទ្ធបានក្លាយជាតំបន់ពេញនិយមមួយសម្រាប់ជំនួញក្នុងវិស័យដីធ្លី ។ ជាក់ស្ដែង សកម្មភាពទិញដីស្រែ និងដីចម្ការពុះជាឡូត៍សម្រាប់លក់ពីសំណាក់ឈ្មួញដីធ្លី បានកើនឡើងខ្លាំង និងមានពលរដ្ឋពីរាជធានីភ្នំពេញ និងពីបណ្ដាខេត្តជិតខាងជាច្រើន សម្រុកទៅទិញសម្រាប់លក់បន្ត និងអភិវឌ្ឍន៍នៅពេលអនាគត ។
លោក ជា កុយ ប្រធានក្រុមហ៊ុនអភិវឌ្ឍន៍ ដីឡូត៍នៅតំបន់ភ្នំរាប និងភ្នំប្រសិទ្ធ បានឲ្យដឹងថា ដោយសារតែតំបន់ទាំងនេះគ្រោងនឹងកាត់ចូលក្នុងទឹកដីរាជធានីភ្នំពេញ ហើយតម្លៃដីនៅពេលនេះក៏នៅធូរថ្លៃផងនោះ ទើបពលរដ្ឋដែលចង់បានដីសម្រាប់សង់ផ្ទះ រកទិញច្រើន ជាពិសេស ពលរដ្ឋនៅរាជធានីភ្នំពេញ និងគ្មានលទ្ធភាពទិញផ្ទះស្នាក់នៅ ឬគ្មានលទ្ធភាពសូម្បីតែបង់រំលស់ផ្ទះ ។ ក្រៅពីនោះ ក៏មានពលករនៅក្រៅប្រទេសដូចជា ប្រទេសកូរ៉េ ជាដើម ទិញដីឡូត៍នៅតំបន់នេះដើម្បីសង់ផ្ទះ នៅពេលពួកគេត្រឡប់មកស្រុកវិញ ឬទុកលក់បន្តទៀតនៅថ្ងៃអនាគត ។
លោកថា ៖« នៅតំបន់ភ្នំរាប និងភ្នំប្រសិទ្ធនេះ ក្រៅពីការពុះដីឡូត៍លក់ហើយ យើងក៏មានគម្រោងជាច្រើនដើម្បីអភិវឌ្ឍន៍ទៅជាតំបន់មានសក្ដានុពលសម្រាប់ការរស់នៅផង និងសម្រាប់អាជីវកម្មផង ។ ជាក់ស្ដែង ពេលនេះ យើងបាននិងកំពុងអភិវឌ្ឍន៍ជាផ្សារ និងតំបន់ទេសចរណ៍កែច្នៃជាដើម ដោយសារតែបច្ចុប្បន្ន កន្លែងនេះជាតំបន់ទេសចរណ៍មួយបាត់ទៅហើយសម្រាប់អ្នកភ្នំពេញ និងអ្នកពីបណ្ដាខេត្តមកសម្រាកលំហែនៅថ្ងៃចុងសប្ដាហ៍ និងថ្ងៃឈប់សម្រាកជាដើម » ។
លោកបន្តថា បច្ចុប្បន្ន មានគម្រោងខ្យល់ជាច្រើនពាក់ព័ន្ធនឹងអាជីវកម្មដីឡូត៍នេះ ហើយនៅតំបន់នេះ ក៏មានអ្នកលក់គម្រោងមិនពិតប្រាកដជាច្រើនដែរ ។ ដូចនេះហើយ លោកចង់ឲ្យពលរដ្ឋដែលស្វែងរកដីឡូត៍ពិតប្រាកដទៅឲ្យដល់កន្លែងលក់ និងសួររកកម្មសិទ្ធិ ព្រមទាំងទីតាំងដីឲ្យបានច្បាស់លាស់ជាមុនសិន មុននឹងបោះលុយទិញដីឡូត៍នោះ ។
លោកថា ៖« មានអ្នកលក់ដីឡូត៍ជាច្រើន ដែលរកស៊ីចង់ចំណេញ ហើយនិយាយបំផ្លើសពីអ្វីដែលពិតដើម្បីអូសទាញអ្នកទិញ ឲ្យមកទិញគម្រោងរបស់ខ្លួន ។ ទាំងនេះហើយដែលធ្វើឲ្យខូចឈ្មោះដល់អ្នករកស៊ីត្រឹមត្រូវ និងអាចធ្វើឲ្យវិស័យដីធ្លីទាំងមូលកាន់តែមានបញ្ហា » ។
លោកបញ្ជាក់ថា អ្នកធ្វើអាជីវកម្មលើវិស័យដីធ្លីភាគច្រើនធ្វើតាមគ្នា ដោយឃើញគេធ្វើជោគជ័យ ក៏ធ្វើតាមគេដែរ ទាំងដែលខ្លួនគ្មានទុនគ្រប់គ្រាន់សម្រាប់ធ្វើអាជីវកម្មមួយនេះ ហើយក៏ទៅយកលុយពីធនាគារ ដើម្បីមកពុះជាឡូត៍លក់។ ម្យ៉ាងទៀត ការធ្វើអាជីវកម្មដីឡូត៍បច្ចុប្បន្ននេះ បានផ្ដល់លក្ខខណ្ឌបង់រំលស់ទៅអតិថិជន ទាំងនេះហើយធ្វើឲ្យម្ចាស់អាជីវកម្មដីឡូត៍ ដែលគ្មានទុនគ្រប់គ្រាន់ត្រូវជួបហានិភ័យ ជាមួយការប្រាក់ពីធនាគារ ។
លោក ហ៊ីម ស៊ុយ អ្នកប្រកបអាជីវកម្មដីឡូត៍នៅតំបន់នេះ ក៏បានឲ្យដឹងដែរថា បច្ចុប្បន្ន ក្រុមហ៊ុនរបស់លោកលក់ដីឡូត៍បានប្រមាណ១០០ឡូត៍ក្នុង១ខែ ទៅអតិថិជនមកពីគ្រប់ទីសទី ទាំងអតិថិជនចង់ស្នាក់នៅតំបន់នោះផ្ទាល់ និងអតិថិជនទិញសម្រាប់វិនិយោគនៅថ្ងៃអនាគត ។
លោកថា ៖« យើងមានគម្រោងជាច្រើនទៀតដែលត្រូវអភិវឌ្ឍន៍ ព្រោះបើចង់ឲ្យតំបន់នេះមានសក្ដានុពល ចង់ឲ្យតំបន់នេះក្លាយជាតំបន់មានភាពអ៊ូអរ ត្រូវតែបង្កើតគម្រោងអភិវឌ្ឍន៍សម្រាប់អតិថិជនមកពីឆ្ងាយ និងនៅទីនេះផ្ទាល់ » ។
លោកបន្តថា កាលពីមុន ភ្នំរាប និងភ្នំប្រសិទ្ធ គឺជាតំបន់ដែលមិនសូវមានការចាប់អារម្មណ៍ពីសំណាក់មនុស្សម្នា ឬអ្នកវិនិយោគទេ ក៏ប៉ុន្តែបច្ចុប្បន្ន វាបានក្លាយជាតំបន់ពេញនិយមសម្រាប់ជំនួញដីធ្លី ដោយមានអ្នករកទិញដីធ្លីជាច្រើនបានចុះមកផ្ទាល់ដើម្បីសាកសួរ និងដាក់ទុន ។
លោកនិយាយថា ៖« អ្នកប្រកបអាជីវកម្មដីឡូត៍នៅភ្នំរាប និងភ្នំប្រសិទ្ធមានច្រើនពិតមែន ក៏ប៉ុន្តែក្នុងចំណោមនោះ មិនមែនសុទ្ធតែជោគជ័យទាំងអស់ទេ ម្នាក់ៗត្រូវមានយុទ្ធសាស្ត្ររៀងៗ ខ្លួន ហើយអ្វីដែលធ្វើពលរដ្ឋទុកចិត្តនោះ គឺភាពស្មោះត្រង់ មិនបំផ្លើស និងមិនបោកប្រាស់អតិថិជន » ។
បើតាមប្រសាសន៍លោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានក្រើនរំឭកដល់ពលរដ្ឋទាំងអស់ឲ្យប្រុងប្រយ័ត្នចំពោះការវិនិយោគលើវិស័យដីធ្លី ជាពិសេស ពលរដ្ឋដែលមានបំណងស្វែងរកដីឡូត៍សម្រាប់សង់លំនៅឋាន ។ លោកថា ៖«បើចង់មានបាន គួរទិញហើយសង់ខ្ទមនៅ ប្រសើរជាងទិញផ្ទះទាំងដែលខ្លួនមិនមានលទ្ធភាព » ៕
ចែករំលែកព័តមាននេះ