ខេត្តកំពង់ស្ពឺ ៖ ប្រជាពលរដ្ឋជាច្រើនគ្រួសាររស់នៅក្នុងភូមិត្រពាំងពោធិ៍ ឃុំវល្លិ៍ស ស្រុកសំរោងទង ខេត្តកំពង់ស្ពឺ គ្រោងបិទផ្លូវមិនឲ្យក្រុមរថយន្តដឹកដីរបស់ក្រុមហ៊ុនមួយដែលបានសុំច្បាប់អស់ហើយ ប៉ុន្តែមិនគោរពតាមកិច្ចសន្យា បើទោះបីប្រជាពលរដ្ឋទាំងអស់នោះធ្វើការសំណូមពរដល់ម្ចាស់ក្រុមហ៊ុន និងតៃកុងរថយន្តសូមកុំឲ្យបើកកាត់ផ្លូវក្នុងភូមិ និងសុំផ្អាកដឹកដី២ទៅ៣ថ្ងៃ ដើម្បីពួកគាត់បូមទឹកដាក់ស្រូវ របស់ពួកគាត់ក៏គេមិនព្រមដែរ។
ក្រុមប្រជាពលរដ្ឋបានលើកឡើងថា ក្រុមថៅកែឡានដីបាន សុំប្រជាពលរដ្ឋរត់ផ្លូវខាងលិចភូមិស្រាប់តែអស់លោកតៃកុងរថយន្ត បើកកាត់ក្នុងភូមិបណ្តាលរងការ ខូចខាតផ្លូវក្នុងភូមិស្ទើរតែគ្រប់កន្លែង ដូចនេះពួកគាត់ប្រជាពលរដ្ឋរស់នៅក្នុងភូមិជាច្រើនគ្រួសារ សូមសំណូមពរដល់អស់លោកអាជ្ញាធរភូមិ ឃុំ ស្រុក ខេត្ត និងជំនាញពាក់ពន្ធ័មេត្តាជួយពិនិត្យមើលទង្វើ របស់ក្រុមឈ្មួញរកស៊ីជីកកាយអាចម៍ដីមួយក្រុមមនេះផង។ ជាពិសេសនៅពេលដែលថៅកែឡាន សុំច្បាប់បានហើយ ធ្វើអ្វីស្រេចតែអំពើចិត្តមិនគោរពតាមកិច្ចសន្យារបស់ជំនាញ និងថ្នាក់ខេត្តដែលបានកំណត់ទៀតផង។
ជួបជាមួយអ្នកយកពត៌មាននៅរសៀលថ្ងៃទី១៧ សីហា ២០១៨លោកតា ស៊ូ សំអន អាយុ៦២ឆ្នាំ មុខរបរកសិករ រស់នៅក្នុងភូមិត្រពាំងពោធិ៍ ឃុំវល្លិ៍ស ស្រុកសំរោងទង ខេត្តកំពង់ស្ពឺ បានរៀបរាប់ប្រាប់ក្រុមអ្នកយកព័ត៌មានឲ្យដឹងថា កាលពីមុនផ្លូវនៅក្នុងភូមិរបស់គាត់ ងាយស្រួលក្នុងការធ្វើដំណើរណាស់ តែចាប់តាំងពីជាងមួយខែមុននេះមានក្រុមហ៊ុនមួយបានមកទិញដី ពីប្រជាពលរដ្ឋ ហើយបានយកគ្រឿងចក្រមកជីកកាយដីដោយបានសុំច្បាប់ត្រឹមត្រូវហើយ ប៉ុន្តែគ្រាន់តែគាត់ជាប្រជាពលរដ្ឋសុំឲ្យក្រុមរថយន្តដឹកដីទាំងអស់នោះផ្អាក២ទៅ៣ថ្ងៃ ឲ្យពួកគាត់ដើម្បីបូមទឹកដាក់ស្រែស្រូវរបស់ពួកគាត់។
ប៉ុន្តែលោកមេការឈ្មោះ ហឹម (ដែលគេស្គាល់ថាជាមេភូមិតាគាំ) មិនអនុញាតឡើយមិនត្រឹមតែមិនអនុញ្ញាតឲ្យប៉ុណ្ណោះទេ ថែមទាំងមិនស្រោចទឹក បណ្តោយឲ្យហុយ ប៉ះពាល់សុខភាពប្រជាពលរដ្ឋ ជាពិសេសក្មេងតូចៗ ដែលងាយជួបជំងឺទៀតផង។ ជាងនេះទៅទៀតផ្លូវក៏រងការខូចខាតហើយក្រុមរថយន្តដឹកដីខាងលើ ទាំងអស់នេះដឹកលើសទ្រុងធ្លាក់ដី និងថែមទាំងមិនគ្របតង់ទៀតផង។ ដូចនេះក្នុងនាមលោកតា ជាប្រជាពលរដ្ឋសូមសំណូមពរដល់លោកមេភូមិ មេឃុំ អភិបាលស្រុក ជំនាញរ៉ែ និងថាមពលខេត្ត និង ឯកឧត្តមអភិបាលមេត្តាជួយចាត់ជំនាញចុះពិនិត្យមើលទង្វើរបស់ក្រុមឈ្មួញជីកកកាយដី យកប្រយោជន៍ខ្លួនឯង បំផ្លាញផ្លូវសាធារណៈរបស់ប្រជាពលរដ្ឋ ដែលថ្នាក់លើកសាងសម្រាប់ ប្រជាពលរដ្ឋផងទាន បើបណ្តែតបន្តោយតទៅទៀតផ្លូវនេះប្រាកដជាខូចលើសដើម ជាក់ជាមិនខានឡើយ។
ដោយឡែកអ្នកស្រី ស៊ឹម អូន អាយុ៤៥ឆ្នាំ មុខរបរកសិករ និងលោកយាយ ប៉ុល វ៉ន អាយុ៧២ឆ្នាំ រស់នៅក្នុងភូមិត្រពាំងពោធិ៍ ឃុំវល្លិ៍ស ស្រុកសំរោងទង ខេត្តកំពង់ស្ពឺ បាននិយាយស្រដៀងគ្នាថា រាល់ថ្ងៃពួកគាត់មានការព្រួយបារម្ភយ៉ាងខ្លាំងដោយសារតែក្រុមរថយន្តដឹកដី តៃកុងរថយន្តបើកលឿន បើទោះបីពួកគាត់បាននិយាយប្រាប់ បានហាមឃាត់សំណូមពរនោះ ក៏ក្រុមតៃកុងរថយន្តទាំងអស់នោះ គឃ្លើនឌឺដងដាក់ពួកគាត់ថែមទៀតផង។ ហើយរាល់ថ្ងៃក្រុមហ៊ុន ខាងលើមិនសូវដែលស្រោចទឹកនោះ ឡើយ មានពេលខ្លះប្រជាពលរដ្ឋចង់បិទផ្លូវទើបឃើញក្រុមថៅកែឡានដី ទាំងនោះឲ្យឡានមកស្រោច ម្តងៗដែរ។
ការដែលក្រុមឡានដឹកដីទាំងនោះបើកកាត់ភូមិដោយមិនបានស្រោចទឹកបណ្តាឲ្យដីហុយខ្លាំង ជាជាហេតុធ្វើឲ្យប៉ះពាល់សុខភាពរស់នៅប្រចាំថ្ងៃ ជាពិសេសកូន ចៅតូចៗរបស់ពួកគាត់តែម្តង។ ម្យ៉ាងខ្លាចជួបគ្រោះថ្នាក់ជាយថាហេតុ ណាមួយនៅពេលដែលឡានដឹកដីហុយសំពោងម្តងៗ។ ដូចនេះពួកគាត់សំណូមពរឲ្យថ្នាក់លើមេត្តាជួយពិនិត្យមើល និងជួយទប់ស្កាត់ក្រុមហ៊ុនអាងអំណាច លោក ហឹម ដែលជាមេភូមិតាគាំផង និងជាមេការ(កាង)រណ្តៅដីថែមផង។ប្រជាពលរដ្ឋបានបន្តទៀតថា ប្រសិនបើក្រុមហ៊ុន និងក្រុមតៃកុងរថយន្តមិនព្រមគោរពតាមកិច្ចសន្យា និងសំណូមពររបស់ប្រជាពលរដ្ឋទេនោះពួកគាត់នឹងនាំគ្នាធ្វើការបិទផ្លូវមិនឲ្យបើកបរកាត់ភូមិរបស់ពួកគាត់ឡើយ។
បុរសម្នាក់ដែលតាំងខ្លួនមេការ និងជំនួសមុខម្ចាស់ក្រុមហ៊ុនជីកកាយដីខាងលើបាននិយាយថា មុននឹងពួកគេជីកាយដីនេះបានសុំច្បាប់រួចរាល់ហើយ គឺរណ្តៅដីមានទំហំ១ហិកតា ជម្រៅនោះលោកមិន ដឹងទេ បើចង់ដឹងអស់លោកអ្នកកាសែតសួរទៅជំនាញរ៉ែ និងថាមពលខេត្តទៅដឹងហើយ។ ជាងនេះទៅទៀតក្នុង១ថ្ងៃៗ ក្រុមហ៊ុនគេបានស្រោចទឹកក្នុង១ថ្ងៃ១០រថយន្តឯណោះ ដូចនេះសូម្បីតែដឹកក៏គ្របតង់ដែរ។ ការឆ្លើយបែបនេះគ្រាន់តែជាការឆ្លើយយករួចខ្លួនតែប៉ុណ្ណោះ ខណៈអ្នកយកព័ត៌មានចុះទៅផ្តិតយករូបថតខាងមុខរណ្តៅក្នុងភូមិត្រពាំងពោធិ៍នោះមិនឃើញមានរថយន្តដឹកដីណាមួយគ្របតង់ឡើយ។
នៅពេលដែលឃើញអ្នកយកពត៌មានធ្វើការថតផ្តិតយករូបភាពស្រាប់តែ លេចមុខបុរសម្នាក់ដែលប្រជាពលរដ្ឋជាច្រើនបានស្គាល់ឈ្មោះ ហឹម អាយុជាង៤០ឆ្នាំ គឺជាមេភូមិតាគាំ និងជាមេការរណ្តៅដីទៀតផងបានចេញមុខមកកាងមិនឲ្យអ្នកយកពត៌មានថតរូបឡាន ដែលអត់គ្របតង់ទៀត។ មិនតែប៉ុណ្ណោះ លោកមេភូមិតាគាំដែលជាមេការរណ្តៅដី ថែមទាំងយកទូរស័ព្ទ មកថតរូបអ្នកយកពត៌មានយើងហើយថែមទាំងនិយាយគំរាមកំហែងរកមុខប្រជាពលរដ្ឋណាដែលរាយការណ៍ឲ្យអ្នកកាសែតទៀតផង។
ប្រជាពលរដ្ឋបានលើកឡើងថា លោក ហឹម មេភូមិតាកាំ និងជាមេការរណ្តៅដី មិនគួរណាប្រើពាក្យអសុរសមកលើប្រជាពលរដ្ឋតាមចិត្តនោះទេ ទង្វើរបស់លោក ហឹម នេះសបញ្ជាក់ឲ្យឃើញថា កំពុងតែយកអំណាចជាមេភូមិមកកាងរណ្តៅដីក្រុមហ៊ុនឯកជនយ៉ាងច្បាស់ក្រឡែត។ មានការលើកឡើងថា តើឯណាទៅពាក្យថាបម្រើរាស្ត្រនោះក្រែងលោកមេភូមិបានឡើងធំដោយសារមានរាស្ត្រគាំទ្រ តែនេះពេលបានឡើងធំមិនត្រឹមតែមិនបម្រើរាស្ត្រនោះទេថែមទាំងធ្វើបាបប្រជារាស្ត្រតាមរយៈកាងឡានដឹកដឹកដែលធ្វើឲ្យខូចប្រយោជន៍រាស្ត្រថែមទៀតផង៕
ចែករំលែកព័តមាននេះ