ប្រទេសរុស្ស៊ី ៖ ប្រទេសអូស្ត្រាលីនាថ្ងៃទី២៧ មីនា បានចូលរួមក្នុងចលនាដោយប្រកាសពីការបណ្តេញអ្នកការទូតរុស្ស៊ី២នាក់ចេញពីប្រទេសខ្លួនធ្វើឱ្យចំនួនអ្នកការទូតរុស្ស៊ីត្រូវបណ្តេញពីប្រទេស២៣ ក្នុងនោះមានប្រទេស១៦ជាសមាជិកសហភាពអឺរ៉ុបឡើងដល់យ៉ាងតិច១១៦នាក់ហើយ ។
ក្រុងមូស្គូដែលបដិសេធថា ខ្លួនពុំមែនជាប្រភពនៃការបំពុលអតីតចារបុរសរុស្ស៊ីលោក SERGEI SKRIPAL និងកូនស្រីគេ នាង IOULIA កាលពីថ្ងៃទី៤ មីនា នៅទីក្រុង SALISBURY ភាគខាងត្បូងអង់គ្លេសបានបរិហារភ្លាមៗថា នេះជាកាយវិការបង្កហេតុមួយ ហើយសន្យាតបតវិញដែលនាំឱ្យមានគ្រោះថ្នាក់នៃការជំរុញសង្គ្រាមទណ្ឌកម្ម ។ វិមានក្រឹមឡាំងអះអាងជាថ្មីថា រុស្ស៊ីដាច់ខាតពុំមានការទាក់ទិនជាមួយរឿងនេះទេ ។
ក្រុងវ៉ាស៊ីនតោនក្នុងរឿងចោទប្រកាន់នេះបាននាំមុខគេដោយប្រកាសពីការបណ្តេញអ្នកការទូតរុស្ស៊ី៦០នាក់ ចាត់ទុកជាភ្នាក់ងារស៊ើបការណ៍ ដោយក្នុងចំណោមអ្នកការទូតរុស្ស៊ីត្រូវបណ្តេញចេញទាំងនេះ៤៨នាក់ ធ្វើការក្នុងស្ថានបេសកកម្មផ្សេងៗនៅសហរដ្ឋអាមេរិក ហើយ១២នាក់ធ្វើការនៅស្ថានបេសកកម្មការទូតរុស្ស៊ីប្រចាំ អ.ស.ប ។ អាមេរិកក៏ប្រកាសដែរពីការបិទស្ថានកុងស៊ុលរុស្ស៊ីប្រចាំក្រុង SEATTLE ដោយលើកហេតុផលថា ស្ថិតនៅក្បែរមូលដ្ឋាននាវាមុជទឹកនុយក្លេអ៊ែរអាេមរិកធំជាងគេ ។
សកម្មភាពបែបនេះជាការសម្តែងសាមគ្គីភាពរបស់អាមេរិក និងរបស់បណ្តាប្រទេសលោកខាងលិចជាមួយអង់គ្លេសក្រោយពីមានរឿងបំពុលអតីតចារបុរសរុស្ស៊ី និងកូនស្រីដែលក្រុងឡុងដ៍ចោទដាក់រុស្ស៊ី ។
ឯកអគ្គរដ្ឋទូតរុស្ស៊ីប្រចាំសហរដ្ឋអាមេរិក លោកអាណាតូលី អានតូណូវ វាយតម្លៃថា ក្រុងវ៉ាស៊ីនតោនកាត់បន្ថយឱ្យអស់នូវអ្វីដែលនៅសល់ក្នុងទំនាក់ទំនងរុស្ស៊ី-អាមេមរិក ។
សេតវិមានធ្វើអត្ថាធិប្បាយថា សហរដ្ឋអាមេរិកត្រៀមរួមសហការដើម្បីកសាងទំនាក់ទំនងល្អប្រសើរមួយជាមួយរុស្ស៊ី ក៏ប៉ុន្តែរឿងនេះអាចកើតមាន លុះត្រាតែរដ្ឋាភិបាលរុស្ស៊ីផ្លាស់ប្តូរឥរិយាបថរបស់ខ្លួន ។
ចំណែកប្រធានក្រុមប្រឹក្សាអឺរ៉ុប លោក DONALD TUSK បានព្រមានថា ការបណ្តេញថ្មីៗទៀតពុំបដិសេធឡើយ ក្រោយកិច្ចសហប្រតិបត្តិការដែលមានការសម្របសម្រួលគ្នា ។ រីឯប្រមុខការទូតអាល្លឺម៉ង់លោក HEIKO MAAS គូសបញ្ជាក់ថា ជាលើកដំបូងចាប់តាំងពីសង្គ្រាមលោកលើកទី២មក ដែលអាវុធគីមីត្រូវបានប្រើនៅអឺរ៉ុប ។
បារាំង អាល្លឺម៉ង់ និងប៉ូឡូញស្នើបណ្តេញអ្នកការទូតរុស្ស៊ី៤នាក់ក្នុងប្រទេសនីមួយៗឱ្យចាកចេញ ។ បន្ទាប់មកដល់វេនបណ្តាប្រទេសនៅតំបន់បាល់ទិក ប្រទេសហុងគ្រី ឬអេស្ប៉ាញ ។ អ៊ុយក្រែនដែលកំពុងមានសង្គ្រាមជាមួយពួកបំបែកខ្លួននិយមស្និទ្ធរុស្ស៊ីចាប់ពីឆ្នាំ២០១៤មក បណ្តេញអ្នកការទូតរុស្ស៊ី១៣នាក់ ។ ប្រទេសច្រើនទៀតភាគច្រើនជាសមាជិកអូតង់ក៏ប្រកាសពីការបណ្តេញអ្នកការទូតរុស្ស៊ីដែរ ។
អង់គ្លេសដែលបណ្តេញអ្នកការទូតរុស្ស៊ី២៣នាក់ចេញរួចហើយ បានសម្តែងការអបអរសាទរចំពោះចម្លើយតបវិសាមញ្ញនេះរបស់បណ្តាសម្ព័ន្ធមិត្ត ។ ប្រមុខការទូតអង់គ្លេសលោក BORIS JOHNSON និយាយថា នេះជាចលនាធំមួយនៃការចាប់បណ្តេញពួកភ្នាក់ងាររុស្ស៊ីយ៉ាងច្រើនជាប្រវត្តិសាស្ត្រ ។
យោងតាមបណ្តាសមាជិកសភារុស្ស៊ីថា ចម្លើយតបរបស់រុស្ស៊ីចំពោះការចាប់បណ្តេញអ្នកការទូតរបស់ខ្លួនពីប្រទេសលោកខាងលិចជាច្រើននឹងធ្វើដោយសមាមាត្រ ក៏ប៉ុន្តែរឿងបំពុលលោក SKRIPAL ជាការបង្កហេតុមួយ ព្រមទាំងជាផ្លែផ្កានៃការសម្រេចចិត្តរួមរបស់អង់គ្លេស និងអាមេរិក ។
ក្រសួងការបរទេសរុស្ស៊ីថ្លែងនាថ្ងៃទី២៦ មីនា ថា ការបណ្តេញបណ្តាអ្នកការទូតរុស្ស៊ីជាជំហរអមិត្តមួយ ហើយក្រុងមូស្គូនឹងឆ្លើយតបវិញ ៕
ចែករំលែកព័តមាននេះ