ខេត្តព្រះសីហនុ ៖ នៅស្នងការដ្ឋាននគរបាលខេត្តនាព្រឹកថ្ងៃទី១០ ធ្នូ សន្និសីទសារព័ត៌មានមួយត្រូវបានធ្វើឡើងភ្លាមៗដើម្បីបង្ហាញមុខជនជាតិចិនចំនួន៣នាក់ ដែលប្រើប្រាស់កាំភ្លើងខ្លី និងកូនកាំបិតធ្វើសកម្មភាពចាប់ជំរិតទារប្រាក់ពីជនជាតិចិនដូចគ្នាចំនួន៨០ម៉ឺនដុល្លារ ។ សូមបញ្ជាក់ផងដែរថា ប្រតិបត្តិការបង្ក្រាបក្រុមឧក្រិដ្ឋជនចាប់ជំរិតទារប្រាក់នេះ គឺនគរបាលខេត្តបានប្រើប្រាស់ថិរវេលាអស់១១ម៉ោង ក្នុងការបំបែកសំណុំរឿងនេះ ក្រោមការដឹកនាំផ្ទាល់របស់លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្ត ។
នៅក្នុងសន្និសីទសារព័ត៌មានដែលបានធ្វើឡើងដោយលោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តបានបញ្ជាក់ឲ្យដឹងថា បទឧក្រិដ្ឋជំរិតទារប្រាក់បានបង្កឡើងដោយជនជាតិចិនវ័យក្មេង និងជនរងគ្រោះជាជនជាតិចិនដូចគ្នា បានកើតមាននៅក្នុងទឹកដីខេត្តព្រះសីហនុជាលើកទីមួយ ។ លោកឧត្តម សេ នីយ៍ទោបានបញ្ជាក់ថា ក្នុងករណីខាងលើ ត្រូវបានកងកម្លាំងនគរបាលខេត្តព្រះសីហនុ បង្ក្រាបបានទាំង ស្រុងក្នុងប្រតិបត្តិការ ដែលបញ្ជាដឹកនាំផ្ទាល់ ដោយរូបលោក កាលពីវេលាម៉ោង១៨និង៣០នាទីថ្ងៃទី៩ ធ្នូកន្លងទៅនេះ ស្ថិតនៅផ្ទះជួលមួយកន្លែងក្នុងបុរីប៊ីអេស(BS) ក្រុមទី១ ភូមិ៥ សង្កាត់លេខ៤ ក្រុងព្រះសីហ នុ។ ក្នុងប្រតិបត្តិការនេះ ក៏មានការចូលរួមសម្របសម្រួលផ្លូវច្បាប់ពីលោក កៀង សុន្ទរោ ព្រះរាជអាជ្ញារងអមសាលាដំបូងខេត្តផងដែរ ។
លោកឧត្តមសេនីយ៍ទោ ជួន ណារិន្ទ បានបន្តឲ្យដឹងថា អំពេីចាប់ជំរិតរបស់ជនជាតិចិននេះ បានកើតឡើងនៅវេលាម៉ោង១២និង៣០នាទីអធ្រាត្រឈានចូលថ្ងៃទី៩ ធ្នូ នៅចំណុចអាងស្តុកទឹកស្អាតជិតឆ្នេរអូរឈើទាល ស្ថិតក្នុងភូមិ៥ សង្កាត់៤ ក្រុងព្រះសីហនុ ដោយក្រុមជនសង្ស័យបានរៀបផែនការយ៉ាងល្អិតល្អន់ក្នុងការតាមឃ្លាំមើលជនរងគ្រោះពេលធ្វេីដំណើរ។ លោកថ្លែងថា ខណៈពេលជនរងគ្រោះបេីករថយន្ដម៉ាកPORSCHE ម្នាក់ឯងមកដល់កន្លែងស្ងាត់ ចំណុចខាងលើ ក្រុមជនសង្ស័យដែលមានគ្នា៣នាក់បានបេីករថយន្ដ Lexus ស្ទាក់កៀរឱ្យឈប់ ។ ពេលនោះជនរងគ្រោះបានឈប់រថយន្តដេីម្បីសួរនាំក៏ត្រូវពួកជនចាប់ជំរិត ដកកាំភ្លើងខ្លីភ្ជង់ចាប់ក្រៀកដាក់រថយន្តពួកគេ ដោយសង្កត់ក្បាលចុះក្រោមចងដៃដោយខ្សែរឹត(ខ្សែស៊ីល) ហេីយនាំខ្លួនយកមកបង្ខាំងទុកនៅផ្ទះជួលមួយកន្លែងក្នុងបុរីBS ក្រុមទី១ សង្កាត់លេខ៤ ក្រុង ព្រះសីហនុ ។ បន្ទាប់មកពួកគេបានទុកគ្នាវាម្នាក់ឲ្យយាមចំណាប់ខ្មាំង ។ រីឯបក្សពួក២នាក់ទៀត បានបេីករថយន្តរបស់ជនរងគ្រោះម៉ាក PORSCHE យកទៅប្លុងចោលនៅចំណតរថយន្តចាស់ ជិតស្នាក់ការសាលាកាំកុងត្រូលដើម្បីបំបាត់ដាន ។
លោកឧត្តមសេនីយ៍ស្នងការ ជួន ណារិន្ទ បានបញ្ជាក់់ទៀតថា ជនរងគ្រោះក្នុងករណីចាប់ជំរិតទារប្រាក់ឈ្មោះ Lifujie ភេទប្រុស អាយុ៤៧ឆ្នាំ ជាពាណិជ្ជករ ។ តាមការរៀបរាប់របស់ជនរងគ្រោះឲ្យដឹងថា ក្រោយការចាប់ខ្លួនរួចហើយ ប្រមាណជិត២ម៉ោងក្រោយមកក្រុមឧក្រឹដ្ឋជនបានទូរស័ព្ទ ជំរិតទារប្រាក់ពីប្អូនរបស់គាត់ចំនួន៨០ម៉ឺនដុល្លាររ ។ ដោយសារតែប្អូនខ្លាចក្រុមឧក្រឹដ្ឋជនសម្លាប់បងទើបរូបគាត់បានបញ្ចូលប្រាក់(យន់)តាមគណនី បើគិតជាលុយដុល្លារប្រមាណជាងមួយមុឺនដុល្លារអាមេរិក ឲ្យទៅក្រុមឧក្រឹដ្ឋជន និងសន្យាថារកប្រាក់បញ្ចូលទៅក្នុងគណនីឲ្យគ្រប់ចំនួន ។ ជាមួយនឹងការទាក់ទងជាមួយឧក្រឹដ្ឋជននោះ ប្អូនជនរងគ្រោះក៏បានប្តឹងមកសមត្ថកិច្ចនគរបាលផងដែរ ។
បន្ទាប់ពីទទួលបានពាក្យបណ្តឹងប្អូនជនរងគ្រោះនិងដោយអនុវត្តទៅតាមបទបញ្ជារបស់ លោក យន្ត មីន អភិបាលខេត្តនិងជាប្រធានគណៈបញ្ជាការឯកភាពខេត្តក៏ដូចជាការអនុវត្តន៍ ទៅតាមបទបញ្ជាដ៏មុឺងម៉ាត់របស់លោកនាយឧត្តមសេនីយ៍ អគ្គស្នងការនគរបាលជាតិ ក្នុងការអនុវត្តគោលនយោបាយភូមិ-ឃុំមានសុវត្ថិភាព របស់ប្រមុខរាជរដ្ឋាភិបាល កម្លាំងនគរបាលនៃស្នងការដ្ឋានបានបើកការសុីបអង្គេត យ៉ាងក្តៅគគុកតែស្ងៀមស្ងាត់ដើម្បីសុវត្ថិភាពចំណាប់ខ្មាំង ។ លោកស្នងការ ជួន ណារិន្ទ ក៏បានបន្តថា ជាមួយគ្នានេះយើងបានពង្រាយកម្លាំងពួនស្ទាក់គ្រប់ច្រកល្ហក ។ លុះដល់វេលាម៉ោង១៨និង៣០នាទីថ្ងៃទី៩ ធ្នូ បន្ទាប់ពីការសុីបអង្កេតយ៉ាងម៉ត់ចត់ ទើបដឹងថា ក្រុមឧក្រឹដ្ឋជនជួលផ្ទះស្នាក់នៅក្នុងបុរីប៊ីអេស ព្រមទាំងចាប់ចំណាប់ខ្មាំងមកបង្ខាំងទុកដើម្បីជំរិតទារប្រាក់នៅទីនោះ ។ ក្រោយពេលកំណត់ទីតាំងច្បាស់លាស់ហើយ កម្លាំងនគរបាលបានឡោមព័ទ្ធបុរីខាងលើជុំជិត ក្នុងប្រតិបត្តិការនេះសូម្បីមានស្លាបហោះក៏គេចមិនរួចដែរ ។ ទីបំផុតសមត្ថកិច្ចបានចាប់ខ្លួនក្រុមឧក្រឹដ្ឋជនចំនួន៣នាក់សុទ្ធតែស្ទាវគឺ១-ឈ្មោះ ZHENG RONGMAO ភេទប្រុស ជនជាតិចិន អាយុ២៦ឆ្នាំ ។២-ឈ្មោះ DAI HONGDA ភេទប្រុស ជនជាតិចិន អាយុ២៣ឆ្នាំ ។៣-ឈ្មោះ LIN JINPEI ភេទប្រុស ជនជាតិចិន អាយុ២៤ឆ្នាំ ។
ជាមួយនៃការចាប់ខ្លួន សមត្ថកិច្ចក៏បានដកហូតវត្ថុតាងរួមមាន កាំភ្លើងខ្លីម៉ាក BERITA STOM ១ដេីម មានបង់២ មានគ្រាប់ចំនួន១០គ្រាប់, កូនកាំបិតមួយ, ខ្សែចងរឹត(ស៊ីល) ២ដុំ,ទូរស័ព្ទដៃ៦គ្រឿង និងរថយន្តឡិចស៊ីស RX300 ចំនួន១ គ្រឿងពណ៌កណ្តុរល្មែះ ពាក់ស្លាកលេខភ្នំពេញ 2AG.4528 ។ លោកឧត្តម សេនីយ៍ទោស្នងការបានបញ្ជាក់ជាចុងក្រោយថា បក្សពួកឧក្រឹដ្ឋជនខាងលើមកពីប្រទេសចិនមានគំនិតមកធ្វើសកម្មភាពចាប់ជំរិត ជនជាតិចិនដូចគ្នាតែម្តង ដោយបានរៀបគម្រោងដូចជាប្រើប្រាស់លិខិតឆ្លងដែនចំនួនពីរផ្សេងគ្នា ។ លិខិតពិតប្រាកដសម្រាប់ការធ្វើទិដ្ឋាការធ្វើដំណើរ និងលិខិតក្លែងក្លាយសម្រាប់ការជួលរថយន្ត និងជួលផ្ទះដើម្បីងាយស្រួលផ្លាស់ប្តូរអត្តសញ្ញាណទីតាំងគេចខ្លួន ខណៈពេលបែកការណ៍ ។ ម្យ៉ាងទៀតបក្សពួកជនខាងលើមកប្រទេសកម្ពុជា ដើម្បីតាមសម្គាល់មើលពាណិជ្ជករ វិនិយោគចិន ដែលមានប្រាក់ច្រើនដែលកំពុងមករកស៊ី ឬវិនិយោគនៅស្រុកខ្មែរ រួចហើយពួកគេកត់យកលេខរថយន្ត ។
តាមការសារភាពថា ពួកគេបានកត់សម្គាល់លេខរថយន្តបាន៦គ្រឿងហើយ សម្រាប់ការធ្វើសកម្មភាព ដែលគ្រោងនិងចាប់ជំរិតទារយកប្រាក់នៅពេលខាងមុខ ប៉ុន្តែទើបតែធ្វើការចាប់ជំរិតជនរងគ្រោះលើកទី១ មិនបានសម្រេចហើយក៏ត្រូវសមត្ថកិច្ចនគរបាលកម្ពុជាធ្វើការឃាត់ខ្លួនបានតែម្តង ។
បច្ចុប្បន្នជនសង្ស័យនិងវត្ថុតាងសមត្ថកិច្ចនគរបាលជំនាញ កំពុងកសាងសំណុំរឿងចាត់ការទៅតាមនីតិវិធីច្បាប់ ។ក្រុងព្រះសីហនុបច្ចុប្បន្នមិនត្រឹមតែក្រុងមាត់សមុទ្រ ឬក្រុងកំពង់ផែអន្តរជាតិទេ តែបានអភិឌ្ឍន៍ជាក្រុងសេដ្ឋកិច្ចពិសេសតាមច្រកសមុទ្រនាំចូល ព្រមទាំងជាតំបន់សេដ្ឋកិច្ចចម្រុះ និងជាតំបន់ដែលបម្រើឱ្យវិស័យទេសចរណ៍ដ៏សំខាន់មួយផងដែរ ។
កំណើនរបស់ជនជាតិចិនក្នុងរយៈពេលប៉ុន្មានខែថ្មីៗនេះ ពិតជាធ្វើឱ្យមានការភ្ញាក់ផ្អើលខ្លាំង រហូតដល់ម៉ៅផ្ទះសំណាក់ សណ្ឋាគារទាំងមូលស្ទើរអស់តែម្តង សម្រាប់ការទទួលភ្ញៀវចិន ទោះបីដេកមិនគ្រប់បន្ទប់ក៏មិនខ្វល់ដែរ ដែលកំពុងចោទជាបញ្ហាសម្រាប់អ្នកទៅលេងកម្សាន្តនៅក្រុងព្រះសីហនុ នាពេលអនាគត ។ ដោយសារតែកំណើនជនជាតិចិនយ៉ាងគំហុកនេះហើយក៏បានធ្វើឱ្យអ្នកទេសចរជាតិអឺរ៉ុបខ្លះបានផ្លាស់ប្តូរការស្នាក់នៅរបស់ខ្លួន ឆ្ពោះទៅខេត្តកំពតឬកែបវិញម្តង ។ ខណៈពេលនេះជនជាតិចិនមានចំនួនកាន់តែច្រើនឡើងពីមួយថ្ងៃទៅមួយថ្ងៃ ហើយក៏ជាមុខសញ្ញាក្រុមឧក្រឹដ្ឋជនផងដែរ ក្នុងការលបលួចចូលមកធ្វើសកម្មភាពផ្សេងៗ ។
ដូចករណីខាងលើដែលបានសារភាពថា ចូលមកដើម្បីធ្វើសកម្មភាពចាប់ជំរិតជនជាតិចិនដូចគ្នាដែលវេចលុយចូលមករកស៊ីនៅស្រុកខ្មែរ ។ ទោះបីជាបែបណា ការបង្ក្រាបមុនព្រះអាទិត្យលិចក៏ជាសារមួយ សម្រាប់ក្រុមឧក្រឹដ្ឋជនចិនឯទៀតគួរតែស្វែងយល់ដែលមិនត្រូវផ្សងព្រេង ធ្វើអំពើខុសច្បាប់ផ្សេងៗនៅស្រុកខ្មែរឡើយ ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ