ខេត្តកំពត ៖ យ៉ាងហោចណាស់ក៏មានមនុស្សចំនួន៥ទៅ៦នាក់រងគ្រោះ និងរងរបួសធ្ងន់ស្រាលដោយជួបនឹងហេតុការគ្រោះថ្នាក់ចរាចរមួយបានកើតឡើងលើកំណាត់ផ្លូវជាតិលេខ៣៣ កាលពីវេលាម៉ោង៤និង៤៥នាទីទាបភ្លឺថ្ងៃទី១១ ខែមិថុនា ឆ្នាំ២០១៧ នៅត្រង់ចំណុចខាងកើតផ្លូវបេតុងចូលទៅឃុំកូនសត្វចម្ងាយប្រមាណជា១០ម៉ែត្រ ។
ប្រភពព័ត៌មានពីកន្លែងកើតហេតុបានឲ្យដឹងថា ករណីគ្រោះថ្នាក់ចរាចរខាងលើបានបង្កឡើងដោយ រថយន្តពីរគ្រឿងគឺ រថយន្តទួរីសដឹកអំពៅ និងរថយ ន្តម៉ាកកូរ៉េចំណុះមួយតោនកន្លះដឹកអំបិលក្នុងករណីនេះគេឃើញរថយន្តទួរីសដែលដឹកអំពៅបានបើកក្នុងល្បឿនលឿនរួចទៅបុកគូថរថយន្តកូរ៉េដឹកអំបិលពីក្រោយពេញទំហឹងក្នុងទិសដៅស្របគ្នាបណ្តាលឲ្យ រថយន្តកូរ៉េក្រឡាប់ចាក់អំបិលចោលនៅលើចិញ្ចើមផ្លូវ រីឯមនុស្ស៣ទៅ៤នាក់ដែលជិះក្នុងរថយន្តដឹកអំបិលបានធ្លាក់ពីរថយន្តរងរបួសស្រាលហើយរត់គេចខ្លួនបាត់អស់នៅតែរថយន្តក្រឡាប់លើចិញ្ចើមផ្លូវ និងអំបិលពេញចិញ្ចើមផ្លូវ ។
ចំណែករថយន្តទួរីសដែលបង្កក្រោយពីបុករថយន្តកូរ៉េក្រឡាប់ហើយក៏បានជ្រុលចង្កូតទៅធ្លាក់ប្រឡាយស្នាមភ្លោះផ្លូវដោយ កាប៊ីនរថយន្តគៀបជាប់អ្នកបើកបរ និងថៅកែរថយន្តនៅក្នុងរថយន្តបណ្តាលឲ្យអ្នកបើកបររងរបួសធ្ងន់ និងថៅកែដែលអង្គុយអែបអ្នកបើកបរបានស្លាប់នៅនឹងកន្លែងកើតហេតុក្នុងរថយន្ត ។
សមត្ថកិច្ចចរាចរស្រុកទឹកឈូបានឲ្យដឹងថា ជនរងគ្រោះក្នុងហេតុការខាងលើសមត្ថកិច្ចដកស្រង់ឈ្មោះបានតែភាគីខាងរថយន្តទួរីសទេដោយសារតែរងរបួស និងស្លាប់ជាប់ក្នុងរថយន្ត ។ ។ រថយន្តទួរីសខាងលើពណ៌សំបកឪឡឹក ពាក់ផ្លាកលេខ ភ្នំពេញ2A-5978 ខូចខាតមួយសំណុំមុខអ្នកបើកបរមានឈ្មោះ ណែម ខ្នា ភេទ ប្រុស អាយុ៣៨ឆ្នាំ និងឈ្មោះ ជាល ស្រ៊ាង ភេទប្រុស អាយុ៣៨ឆ្នាំដែលជាថៅកែរថយន្តបានស្លាប់ ។ អ្នកទាំងពីររស់នៅភូមិត្រពាំងក្តារ ឃុំទទុង ស្រុកដងទង់ ខេត្ត កំពត ។ ចំណែករថយន្តម្ខាងទៀតម៉ាកកូរ៉េពណ៌ស ពាក់ស្លាកលេខព្រះស៊ីហនុ 2A-2948 អ្នកបើកបរមិនស្គាល់អត្តសញ្ញាណក្រោយពីកើតហេតុបានរត់គេចខ្លួនបាត់អស់ទាំងព្រូទាំងតៃកុង ។
ជនរងគ្រោះឈ្មោះ ណែម ខ្នា តៃកុងរថយន្តទួរីសបានឲ្យដឹងថា មូលហេតុដែលបណ្តាលឲ្យរថយន្តខ្លួនទៅបុកគូថរថយន្តកូរ៉េនេះមកពីមានភ្លើងហ្វារថយន្តទំនើបមួយគ្រឿងបើកហ្វាចំពីមុខរថយន្តខ្លួន ហើយរថយន្តកូរ៉េដែលបើកពីមុខរថយន្តខ្លួនមិនបានបើកភ្លើងស្តុបពីក្រោយ ពេលនោះខ្លួនមើលមិនឃើញអត់ដឹងថា មានរថយន្តរត់ពីមុខរថយន្តខ្លួនទេទើបបណ្តាលឲ្យបុកតែម្តង ។ អ្នករបួស និងអ្នកស្លាប់ត្រូវបានរថយន្តសង្គ្រោះដឹកទៅកាន់មន្ទីរពេទ្យបង្អែកខេត្តកំពតដើម្បីសង្គ្រោះ ៕
ចែករំលែកព័តមាននេះ