ខេត្ដស្វាយរៀង ៖ ប្រជាកសិកររស់នៅស្រុកកំពង់រោទ៍ កំពុងព្រួយបារម្ភអំពីតម្លៃស្រូវដែលធ្វើបានហើយគ្មានទីផ្សារលក់ និងគ្មានហាងឆេងពិតប្រាកដដោយសារឈ្មួញវៀតណាមជាអ្នកដាក់តម្លៃ និងមានឈ្មួញកណ្តាលដើរបញ្ចុះតម្លៃស្រូវធ្វើឱ្យស្រូវចេះតែចុះថោកពីព្រោះគ្មានឈ្មួញទិញ ។ ពេលច្រូតកាត់រួចស្រូវត្រូវគរទុកចោល២-៣ថ្ងៃទម្រាំរកម៉ូយទិញបានក្នុង១គីឡូក្រាមតម្លៃ៧០០រៀល គឺមិនរួចលើការចំណាយថ្លៃដើមដូចជាជី ថ្នាំកសិកម្ម ប្រេង និងឈ្នួលពលកម្មទេ ។
លោក កើត សុខា ជាកសិករស់នៅភូមិត្រពាំងថ្នា បានឲ្យដឹងថា ពួកគាត់ជាកសិករពឹងផ្អែកលើរបរធ្វើស្រែដើម្បីចិញ្ចឹមជីវិត និងលក់យកកម្រៃសងថ្លៃដើមខ្លះ ទុកឱ្យកូនរៀនខ្លះ តែអកុសលឆ្នាំនេះធ្វើស្រូវហើយគ្មានឈ្មួញមកទិញ ពេលច្រូតរួចហើយទាល់តែ២-៣ថ្ងៃទើបរកម៉ូយទិញបាន ។ លោកថា ឆ្នាំនេះស្រូវលក់បានថោកណាស់ក្នុង១គឺឡូក្រាមតម្លៃ៤.០៥០ដុង (ប្រាក់វៀតណាម) ស្មើ៧០០រៀល គឺថោកជាងឆ្នាំ២០១៥ ដែលលក់បានថ្លៃហើយសំបូរអ្នកទិញទៀតដោយក្នុង១គឺឡូក្រាមតម្លៃ៤.៥០០ដុងស្មើនឹង៩០០ទៅ១.០០០រៀល។ ចំណែកឆ្នាំ២០១៦នេះ ដោយមានភាពរាំងស្ងួតនៅដើមខែវស្សាធ្វើឱ្យទិន្នផលស្រូវធ្លាក់ចុះដែលគិតជាមធ្យមក្នុង១ហិកតាទទួលបានត្រឹមតែ៤ទៅ៥តោនប៉ុណ្ណោះ ដោយសារឆ្នាំនេះស្រូវមិនសូវល្អហើយច្រូតកាត់ក្នុងទឹកទៀត ។
លោក កើត សុខា បានបន្តថា ប្រជាកសិករកំពុងព្រួយបារម្ភអំពីការងារបង្កបង្កើនផលស្រូវឆ្នាំនេះដែលធ្វើបានហើយរកទីផ្សារលក់មិនបាន ណាមួយមានតែឈ្មួញវៀតណាមជាអ្នកមកទិញ ។ ដូច្នេះហាងឆេងគឺនៅលើមាត់ឈ្មួញវៀតណាមជាអ្នកកំណត់ គេចង់ដាក់តម្លៃប៉ុន្មានក៏បានដោយសារគ្មានឈ្មួញខ្មែរទិញ ធ្វើឲ្យប្រជាពលរដ្ឋជ្រួលច្របល់នាំគ្នាលក់ចេញទោះបានតម្លៃថោកក្ដី ។ ម្យ៉ាងទៀតរកផ្លូវដឹកជញ្ជូនមិនបាន ដោយសារបច្ចុប្បន្នផ្លូវជាច្រើនខ្សែនៅស្រុកកំពង់រោទ៍ត្រូវខូចអស់ ហើយអាជ្ញាធរកំពុងឈូសឆាយជួសជុល ។
ប្រជាពលរដ្ឋបានបញ្ជាក់ថា បានជាពួកគាត់នាំគ្នាបង្ខំចិត្តលក់ព្រោះ ទី១យកលុយសងថ្លៃជី ទី២អាកាសធាតុមិនអំណោយផល ទី៣តម្លៃស្រូវពីមួយថ្ងៃទៅមួយថ្ងៃឈ្មួញវៀតណាមដើរបញ្ចុះតម្លៃធ្វើឱ្យពួកគាត់ភ័យព្រួយខ្លាចតម្លៃស្រូវចេះតែចុះថោកទៀតទើបតម្លៃប៉ុន្មានក៏លក់ដែរ ។ ចំណែកនៅស្រុកស្វាយជ្រំវិញ មានការទិញស្រូវប្រកួតប្រជែងគ្នា ខាងឈ្មួញវៀតណាមដើរបញ្ចុះតម្លៃស្រូវក្រសាំងទាបដោយទិញ១គីឡូក្រាមតម្លៃ៤.០៥០ដុងស្មើ៧០០រៀល ។ រីឯសហគមន៍កសិករចំបក់គុយប្រមូលទិញស្រូវក្នុងសហគមន៍ឲ្យតម្លៃខ្ពស់ជាងឈ្មួញវៀតណាម ដូចជាស្រូវក្រសាំងទាប១គីឡូក្រាមតម្លៃ៤.៣០០ដុង ស្មើនឹង៧៦០រៀលជាដើម ។
ប្រជាកសិករបានអំពាវនាវដល់រាជរដ្ឋាភិបាលកម្ពុជាមេត្តាជួយរកទីផ្សារជូនកសិករដោយកំណត់តម្លៃស្រូវឲ្យបានសមរម្យដើម្បីឱ្យកសិករអាចរស់បានផងចៀសវាងពួកគាត់ធ្វើចំណាកស្រុក ៕
ចែករំលែកព័តមាននេះ