ខេត្តព្រះសីហនុ ៖ សេចក្តីរាយការណ៍ឱ្យដឹងថា បុរសជាកម្មករសំណង់ម្នាក់ ត្រូវបានប្រពន្ធ និងក្រុមសាច់ញាតិ ដឹកបញ្ជូនមកកាន់មន្ទីរពេទ្យបង្អែកចំការចេក កាលពីវេលាម៉ោង១០ និង៣៥នាទីយប់ថ្ងៃទី០៤ មិថុនា ដើម្បីសង្គ្រោះបន្ទាន់ ក្រោយពីជនសង្ស័យ២នាក់បងប្អូននៅផ្ទះជាប់គ្នាកាប់នឹងពូថៅជាច្រើន បណ្តាលឱ្យរងរបួសធ្ងន់ ដោយសារតែហៅផឹកជាមួយ គាត់មិនព្រម ។
ជនរងគ្រោះឈ្មោះឌុល ថន អាយុ៤៧ឆ្នាំ ជាកម្មករសំណង់មានទីលំនៅក្នុងភូមិ០១ សង្កាត់លេខ០១ ក្រុងព្រះសីហនុ ត្រូវបានអ្នកនៅផ្ទះក្បែរកាប់ជាច្រើនពូថៅ ខណៈដើរត្រឡប់ពីងូតទឹកវិញ ។ រីឯជនបង្កទាំង២នាក់ ម្នាក់ឈ្មោះតយ និងឈ្មោះឈ្មោះបូណា ហៅអាតិន កំពុងគេចខ្លួន ។
ប្រភពពីប្រពន្ធថា នៅមុនកើតហេតុហេតុ បន្ទាប់ពីប្តីគាត់មកពីធ្វើការសំណង់ និងហូបបាយរួច បានដើរសំដៅកន្លែងងូតទឹកដែលនៅមិនឆ្ងាយពីផ្ទះនោះទេ រហូតបានប្រហែលជិតមួយម៉ោង ក៏បានដើរត្រឡប់មកវិញ ជិតដល់ផ្ទះទៅហើយ ស្រាប់តែជនបង្កឈ្មោះតយដែលអង្គុយផឹកជាមួយឈ្មោះបូណា ហៅអាតិន បានស្រែកហៅប្តីគាត់ ឱ្យចូលផឹកជាមួយ តែប្តីគាត់មិនបានចូលផឹកនោះទេ ។
ដោយសារ គាត់អស់កំលាំងមកធ្វើការសំណង់ ប៉ុន្តែនៅពេលប្តីរបស់គាត់ដើរមិនបានប៉ុន្មានផង ក៏ស្រាប់តែឈ្មោះតិន និងឈ្មោះតយ បានទាញពូថៅរត់មកកាប់ប្តីគាត់ពីក្រោយដេកដួលនៅលើដីតែម្តង ឃើញដូច្នោះគាត់បានស្ទុះទៅ ជនសង្ស័យបានរត់គេចខ្លួនបាត់តែម្តង ។ បច្ចុប្បន្ន ជនសង្ស័យទាំង២នាក់ ត្រូវសមត្ថកិច្ច កំពុងតាមចាប់ខ្លួន ។
ចែករំលែកព័តមាននេះ