រាជធានីភ្នំពេញ ៖ អាជ្ញាធររាជធានីភ្នំពេញ បានអះអាងថា ការប្រារព្ធពិធីបុណ្យចូលឆ្នាំចិន-វៀតណាម នៅរាជធានីភ្នំពេញ របស់បងប្អូនដែលមានជាប់សែស្រឡាយចិន-វៀតណាម បានប្រព្រឹត្តទៅដោយក្តីសប្បាយរីករាយ និងសុវត្ថិភាព ដោយមានការយកចិត្តទុកដាក់…
រាជធានីភ្នំពេញ ៖ អាជ្ញាធររាជធានីភ្នំពេញ បានអះអាងថា ការប្រារព្ធពិធីបុណ្យចូលឆ្នាំចិន-វៀតណាម នៅរាជធានីភ្នំពេញ របស់បងប្អូនដែលមានជាប់សែស្រឡាយចិន-វៀតណាម បានប្រព្រឹត្តទៅដោយក្តីសប្បាយរីករាយ និងសុវត្ថិភាព ដោយមានការយកចិត្តទុកដាក់ និងបង្កលក្ខណងាយស្រួលពីសមត្ថកិច្ចដែលជាការផ្តល់ឱកាសដល់ប្រជាពលរដ្ឋធ្វើពិធីតាមប្រពៃណីទំនៀមទំលាប់ និងជំនឿរៀងៗខ្លួន ។
ចាប់ពីថ្ងៃដំបូង នៃពិធីបុណ្យចូលឆ្នាំចិន-វៀតណាម ថ្ងៃទី១៥ ខែកុម្ភៈ រហូតមកដល់ថ្ងៃទី១៨ ខែកុម្ភៈ ឆ្នាំ២០១៨ នេះ នៅតាមដងវិថីនានាក្នុងរាជធានីភ្នំពេញ បញ្ហាចរាចរមានភាពធូរស្រាលពុំមានបញ្ហាកកស្ទះនោះទេ ដោយសារបងប្អូនប្រជាពលរដ្ឋខ្លះបានចេញដំណើរទៅលេងនៅរមណីយដ្ឋានទេសចរណ៍នានាតាមខេត្តក្រុង និងបងប្អូនខ្លះទៀតបានជួបជុំបងប្អូនគ្រួសារ ឪពុកម្តាយ សែនព្រេនតាមផ្ទះរៀងៗខ្លួន ។
នៅរមណីយដ្ឋានវត្តភ្នំ ពិសេសក្នុងព្រះវិហារលោកតាព្រះចៅ តាំងពីថ្ងៃដំបូងមក គេសង្កេតឃើញបងប្អូនប្រជាពលរដ្ឋដែលជាប់សែស្រឡាយចិន-វៀតណាម បានទៅដុតទៀនធូបថ្វាយផ្កាផ្ញីរបួងសួងសុំសេចក្តីសុខ ចម្រុងចម្រើនទៅតាមប្រពៃណីទំនៀមទំលាប់របស់បងប្អូនយ៉ាងច្រើនកុះករ និងប្រកបដោយភាពសប្បាយរីករាយ ។
ទាក់ទិន្នទៅនឹងពិធីបុណ្យចូលឆ្នាំខាងលើនេះ លោក ម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញ បានឲ្យដឹងថា ថ្វីត្បិតតែបុណ្យនេះមិនមែនជាបុណ្យចូលឆ្នាំថ្មីប្រពៃណីជាតិខ្មែរ តែអាជ្ញាធរគណៈបញ្ជាការឯកភាពរាជធានីភ្នំពេញ បានយកចិត្តទុកដាក់លើកកម្ពស់ការពង្រឹងសន្តិសុខ សណ្តាប់ធ្នាប់របៀបរៀបរយសាធារណៈជូនបងប្អូន មិនថាតាមលំនៅដ្ឋាន, ទីផ្សារនានាក៏ដូចរមណីយ៏ដ្ឋានជាច្រើនកន្លែង ទៀតក្នុងទីក្រុង ហើយធ្វើឲ្យបទល្មើសនានាពុំមានកើតឡើងគួរឲ្យកត់សម្គាល់នោះទេ គឺមានតែឆេះផ្ទះមួយករណីនៅជ្រោយចង្វារ ។
លោកបន្តថា ចំណុចដែលគួរឲ្យកត់សម្គាល់ទៀតនោះ នៅថ្ងៃសែនចូលឆ្នាំចិនឆ្នាំនេះ ពុំបានឮសំឡេងផាវផ្ទុះដូចរៀងរាល់ឆ្នាំនោះទេ នេះបង្ហាញឲ្យឃើញពីការចូលរួមរបស់បងប្អូនប្រជាពលរដ្ឋ ក៏ដូចអាជ្ញាធរដែនដីក្នុងការអនុវត្តយ៉ាងខ្ជាប់ខ្ជួនតាមសេចក្តីណែនាំរបស់រដ្ឋបាលរាជធានីភ្នំពេញ ក្នុងគោលបំណងរួមចំណែករក្សាសន្តិសុខ សុវត្ថិភាព និងរបៀបរៀបរយសាធារណៈឲ្យបានល្អប្រសើរ ។
យោងតាមឯកសារបានបង្ហាញថា បុណ្យចូលឆ្នាំចិន ជាថ្ងៃឈប់សម្រាកដ៏សំខាន់បំផុតសំរាប់ជនជាតិចិន មានប្រជាជនចិននៅក្រៅប្រទេសបានហៅពិធីបុណ្យនេះថា បុណ្យចូលឆ្នាំច៍ន្ទគតិថ្មី ជាប្រពៃណីពិធីបុណ្យនេះ ចាប់ផ្តើមនៅថ្ងៃទី០១ នៃខែទី០១ តាមច័ន្ទគតិ ក្នុងប្រតិទិនចិន ហើយបញ្ចប់ទៅវិញនៅថ្ងៃទី១៥ ដែលគេហៅថាពិធីបុណ្យបង្ហោះគោមពេលល្ងាចនៅថ្ងៃបុណ្យចូលឆ្នាំចិន ត្រូវបានគេឲ្យឈ្មោះថា ជូស៊ី ពាក្យនេះមានន័យថា ពេលល្ងាចឆ្លងឆ្នាំ ។
ពិធីបុណ្យចូលឆ្នាំចិន ត្រូវបានចាត់ទុកថា ជាថ្ងៃដ៏វិសេសវិសាល និងមានសារសំខាន់សម្រាប់ប្រជាជនចិន ហើយវាក៏មានឥទ្ធិពលទៅលើពិធីបុណ្យចូលឆ្នាំថ្មី របស់ប្រទេសជិតខាងផងដែរ ជាពិសេសចំណងវប្បធម៌ជាមួយប្រជាជនដែលជនជាតិចិនធ្វើអន្តរកម្មជាមួយ ។ ក្នុងឱកាសបុណ្យចូលឆ្នាំចិននៅរាជធានីភ្នំពេញឆ្នាំនេះ គេបានកត់សម្គាល់ឃើញថា ប្រជាពលរដ្ឋរាជធានីភ្នំពេញ ស្ទើរតែ១០០ភាគរយ បានធ្វើពិធីអបអរសាទរ និងទទួលបុណ្យចូលឆ្នាំចិន-វៀតណាម ទៅតាមជំនឿ និងទំនៀមទំលាប់ទាំងនេះ បានបង្ហាញឲ្យឃើញពីកម្រិតជីវភាពរបស់ប្រជាពលរដ្ឋកាន់តែប្រសើរឡើង ប្រជាពលរដ្ឋមានឱកាសប្រកបរបរចិញ្ចឹមជីវិតក្នុងសុខសន្តិភាព ក្រោមការដឹកនាំរបស់រាជរដ្ឋាភិបាលកម្ពុជា ដែលមាន សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ជាប្រមុខដឹកនាំប្រកបដោយឧត្ដមកិត្តិ ៕
ចែករំលែកព័តមាននេះ