ខេត្តតាកែវ ៖ មានការភ្ញាក់ផ្អើលមួយកាលពីថ្ងៃទី៥ ខែមិថុនា ឆ្នាំ២០១៧ ស្ថិតនៅក្នុងភូមិរកាពក ឃុំត្រពាំងក្រសាំង ស្រុកបាទី ខេត្តតាកែវ មានករណីដើមឈើមួយដើមបានដួលរលំដោយសារខ្យល់កន្ដ្រាក់ ស្រាប់តែពេលនេះគល់ឈើមួយនេះអាចងើបឈរឡើងវិញធ្វើឲ្យបងប្អូនប្រជាពលរដ្ឋពីទីជិតទីឆ្ងាយផ្អើលមកមើលហើយអុជធូបសុំលាភសុំជ័យភ្លូកទឹកភ្លូកដី ។
លោក ឃាន វ៉ន អាយុ៤៩ឆ្នាំ រស់នៅភូមិ-ឃុំខាងលើដែលជាម្ចាស់កម្មសិទ្ធគល់ឈើនោះបានរៀបរាប់ប្រាប់ថាដើមឈើ១ដើមនេះមានឈ្មោះដើម «ឈ្នួល» ទំហំ៣ទៅ៤ឮឱប ប្រវែង២៥ម៉ែត្រ ហើយមានអាយុ៧០ឆ្នាំមកហើយ ទើបតែបានដួលអំឡុងខែវិច្ឆិការ ឆ្នាំ២០១៦ បើគិតទៅវា៧ទៅ៨ខែមកហើយ តែការដួលនេះដោយសារខ្យល់កន្ដ្រាក់ភ្លៀងបោកបក់ទើបរលំ ហើយរលើងគល់បាស់ធ្យូងទៅលើស្រែរបស់គេរួចគាត់ក៏បានឲ្យគេអារកាត់ជាកង់ៗរមៀលដើមដាក់លើទួលរួចគល់នេះនៅដួលដដែល ។
លោកបានបន្តទៀតថា ស្រាប់ព្រឹកមិញនេះគាត់បានយកគោមកចង ស្រាបតែឃើញងើបឈរឡើងដូចដើម ទើបមានការភ្ញាក់ផ្អើលពេញភូមិរហូតលេចឮដល់អ្នកជិតឆ្ងាយមកបួងសួងអុចធូបសុំលាភសុំជ័យ និងទឹកមន្ដប្រោះព្រហ្មទៅលើខ្លួនប្រាណជាច្រើននាក់យ៉ាងកុះករបែបនេះទៅ ។
បើយោងតាមសម្ដីរបស់សមត្ថកិច្ច និងអជ្ញាធរស្រុកបាទីបានអះអាងថា វាមិនមែនជាអភូថហេតុអ្វីចម្លែកទេ គឺវាមានភ្លៀងដក់ក្នុងស្រែឬម្ខាងធ្ងន់វាទាញមកវិញទៅ ឬក៏ឬសកែវរបស់វារស់ឡើងវិញក៏ថាបាន រួចម្ចាស់ឈើនេះចេះតែផ្អើលឆោឡោដើម្បីឆ្លៀតឪកាសនេះយកធ្វើអាជីវកម្មព្រោះអ្នកភូមិអ្នកស្រុកគេមកមើលហើយគេបួងសួងដាក់លុយបានចំណូលទៀតផង ៕
ចែករំលែកព័តមាននេះ