បច្ចេកទេសដាំត្រឡាចនៅលើវាលស្រែក្រោយពេលច្រូតស្រូវ
- តាកែវ
កសិករ ហ៊ី ធី អាយុ៣២ឆ្នាំ មានសមាជិកគ្រួសារ៤នាក់ រស់នៅភូមិត្រពាំងស្រងែ ឃុំអង្គតាសោម ស្រុកត្រាំកក់ ខេត្តតាកែវ ។…
កសិករ ហ៊ី ធី អាយុ៣២ឆ្នាំ មានសមាជិកគ្រួសារ៤នាក់ រស់នៅភូមិត្រពាំងស្រងែ ឃុំអង្គតាសោម ស្រុកត្រាំកក់ ខេត្តតាកែវ ។…
កសិករ ហ៊ី ធី អាយុ៣២ឆ្នាំ មានសមាជិកគ្រួសារ៤នាក់ រស់នៅភូមិត្រពាំងស្រងែ ឃុំអង្គតាសោម ស្រុកត្រាំកក់ ខេត្តតាកែវ ។ គាត់ជាកសិករសហការជាមួយអង្គការសេដាកតាំងពីឆ្នាំ២០០២មកម្ល៉េះ ។ មុនសហការជាមួយសេដាក គាត់មិនបានរៀបចំសួនបន្លែនៅជុំវិញផ្ទះទេ ។ ក្រោយពីសហការ គាត់បានយល់ពីសារប្រយោជន៍នៃបន្លែ ផ្លែឈើ និងចេះនូវបច្ចេកទេសដាំដុះតាមគោលការណ៍ធម្មជាតិ ដោយគាត់មានចំណាប់អារម្មណ៍ក៏បានយកបច្ចេកទេសទាំងនោះ មកសាកល្បងដើម្បីកែប្រែជីវភាពរបស់គាត់ ។ បច្ចុប្បន្ននេះ នៅជុំវិញផ្ទះរបស់គាត់មានសួនដំណាំចម្រុះពណ៌បៃតងស្រស់បំព្រង ហើយគាត់ក៏មានបទពិសោធន៍ច្រើនក្នុងការដាំដុះដំណាំ ជាពិសេសដំណាំត្រឡាចនៅលើដីស្រែ ក្រោយពីការប្រមូលផលស្រូវរូច។ បទពិសោធន៍ដាំត្រឡាចរបស់គាត់ យើងសូមបង្ហាញជូនដូចខាងក្រោម៖
១. ការជ្រើសរើស និងទុកដាក់ពូជ
ដំណាំភាគច្រើនគាត់បានដាំ និងរក្សាទុកពូជដោយខ្លួនឯង ។ ចំពោះត្រឡាច គាត់រក្សាទុកពូជដោយជ្រើសរើសផ្លែធំ វែង រលូនល្អ គ្មានស្នាមសត្វទិចបំផ្លាញ រក្សាទុកនៅដើមរហូតដល់ត្រឡាចទុំល្អ ទើបបេះយកមកពុះប្រមូលគ្រាប់ និងលាងទឹកឱ្យអស់រំអិល រួចបណ្តែតយកគ្រាប់ស្ពៀតចេញ បន្ទាប់មកយកទៅហាលថ្ងៃឱ្យស្ងួត ទើបច្រកដាក់ដបទុក ។
២. ការបណ្ដុះកូនត្រឡាច
មុនបណ្ដុះកូន គាត់បានយកគ្រាប់ទៅត្រាំទឹកក្តៅឧណ្ហៗរយៈពេល១៥នាទី ដើម្បីជួយដាស់ដំណេកគ្រាប់ បន្ទាប់មកយកទៅខ្ចប់ក្រណាត់ស្អាត ហើយយកកប់ទៅក្នុងដីសើមៗរយៈពេល២-៣ថ្ងៃ ដើម្បីឱ្យគ្រាប់ដុះពន្លក ។ នៅពេលដែលគ្រាប់ដុះចេញពន្លកហើយ គាត់បានយកគ្រាប់ត្រឡាចទាំងនោះទៅបណ្ដុះដាក់ក្នុងកន្ទោង ដើម្បីថែរក្សាឱ្យដើមរឹងមាំល្អ ។ នៅក្នុងកន្ទោង គាត់បានរៀបចំដាក់ដីដែលមានជីជាតិ ឬដាក់ជីកំប៉ុស្ដគោក និងធ្វើការស្រោចទឹករយៈពេល៤-៦ថ្ងៃ ទើបយកទៅដាំនៅក្នុងរណ្ដៅ ។
៣. ការរៀបចំដី និងការដាំ
ក្រោយពីប្រមូលផលស្រូវហើយ នៅលើផ្ទៃដី២៥អារ គាត់បានភ្ជួរដីកប់នូវកាកសំណល់រុក្ខជាតិ ឬគល់ជញ្ជ្រាំងទុករយៈពេល១អាទិត្យ ទើបភ្ជួររាស់ឆូតជារង ។ បន្ទាប់មក គាត់យកចំបើង ស្លឹកឈើ ទៅរោយនៅលើរងរួចដុតដើម្បីសម្លាប់មេរោគ និងដើម្បីបានផេះដាក់ធ្វើជីផង។ គាត់រៀបចំរងដាំដែលមានទទឹង៣ម៉ែត្រ ដាំ២ជួរទល់មុកគា្ន ដើម្បីឱ្យដៃត្រឡាចបោះទងបានវែង ។ ចន្លោះពីរណ្ដៅមួយទៅមួយ១ម៉ែត្រ និងទុកចន្លោះពីរងមួយទៅរងមួយ ១ម៉ែត្រសម្រាប់ផ្លូវដើរ ។ នៅលើរង គាត់រែកជីកំប៉ុស្ដ១អំរែក ដាក់ចំនួន៣រណ្ដៅ បន្ទាប់់មក ជ្រំជីកំប៉ុស្ដក្នុងរណ្ដៅឱ្យសព្វ រួចស្រោចទឹកឱ្យជោកទើបដាក់កូនដាំ ។
៤. ការថែទាំ និងដាក់ជី
ក្រោយពីបានយកកូនត្រឡាចទៅដាក់ដាំហើយ ដើម្បីឱ្យកូនត្រឡាចដុះលូតលាស់ល្អ គាត់ស្រោចទឹកព្រឹក ល្ងាច រហូតដល់រយៈពេល១អាទិត្យទើបឈប់ស្រោច ។ ផុតរយៈពេល១អាទិត្យនេះ អាចស្រោច៣ថ្ងៃម្ដង ឬ១អាទិត្យម្ដង ។ ចំពោះការដាក់ជីបំប៉ន ធ្វើឡើងនៅពេលត្រឡាចមានអាយុ១៥ថ្ងៃម្ដង និងលើកទី២ ក្រោយពេលប្រមូលផលលើកទី១ ។ គាត់ដាក់ជីកំប៉ុស្ដនៅតាមចន្លោះគុម្ពត្រឡាច ឬចន្លោះពីរណ្ដៅមួយទៅមួយ១បង្គី កប់ដីលុប ។ ការដាក់ជីបំប៉ននៅពេលប្រមូលផលលើកទី១នេះ ដើម្បីបង្កើនឱ្យត្រឡាចមានផ្លែច្រើន ធំ មិនអន់។ ក្រៅពីការដាក់ជី គាត់ឧស្សាហ៍ពូនគល់ ជម្រះស្មៅ និងក្រាលចំបើងនៅលើរង ដើម្បីឱ្យទងត្រឡាចវារបានល្អ ផ្លែមិនប៉ះផ្ទាល់នឹងដី (កាលណាត្រឡាចប៉ះផ្ទាល់នឹងដីធ្វើឱ្យឆាប់រលួយ) ។
៥. ការប្រមូលផល
ក្រោយពីដាំបានរយៈពេល២ខែកន្លះ គាត់ចាប់ប្រមូលផល ។ គាត់បេះត្រឡាចពី៣ទៅ៥ថ្ងៃម្ដង បេះលើកទី១បាន៥ទៅ៦ឡូ ហើយលើកទី២ ទី៣ ទី៤ និងបន្តបន្ទាប់បានរហូតដល់១០ឡូ ក្នុងពេលប្រមូលផលម្តង ។ នៅលើកចុងក្រោយ បេះបានពី៤-៥ឡូ ។ ការប្រមូលផលនេះ ធ្វើរហូតដល់រយៈពេលពី១ខែទៅ១ខែកន្លះ ។ បើគិតជាសាច់ប្រាក់ ពេលប្រមូលផលម្ដងៗ លក់បានចំនួន ៣៥០០០-៤០០០០ រៀល ។
៦. ការសរុបនូវបច្ចេកទេសសំខាន់ៗ
សរុបមក បច្ចេកទេសដាំត្រឡាចសំខាន់ៗ លើវាលស្រែមាន៖
– ជ្រើសរើសពូជ ធំ ស្រឡូន មិនមានសត្វទិចបំផ្លាញ ទុកឱ្យទុំល្អ
– បណ្ដុះគ្រាប់ឱ្យដុះពន្លកសិន មុនយកទៅដាក់ផ្សាំក្នុងកន្ទោង
– ពេលគ្រាប់ដុះពន្លក យកទៅបណ្ដុះក្នុងកន្ទោងរយៈពេល៥-៦ថ្ងៃ
– កាប់រណ្ដៅដាំលើរងដែលមានទទឹង៣ម៉ែត្រ ដាំសងខាងឱ្យបោះទងទល់មុខគ្នា
– ស្រោចទឹករយៈពេល១អាទិត្យ (ព្រឹកល្ងាច) ក្រោយពីដាំ បន្ទាប់មកបន្ថយនៅ៣ថ្ងៃម្ដង ឬ១អាទិត្យម្ដង រហូតដល់ប្រមូលផល
– ប្រើជីកំប៉ុស្ដដាក់ទ្រាប់ក្នុងរណ្ដៅពេលដាំ និងប្រើបំប៉ន២លើក (ទី១ ក្រោយដាំ១៥ថ្ងៃ លើកទី២នៅពេលប្រមូលផលលើកទី១)
– ក្រាលចំបើងនៅលើរងដើម្បីឱ្យត្រឡាចផ្លែលើចំបើង (កុំឲ្យប៉ះដីផ្លែឆាប់រលួយ)
– ក្នុងពេលបេះប្រមូលផលម្ដងៗ ត្រូវស្រោចទឹកដើម្បីឱ្យផ្លែត្រឡាចចេញក្រោយថ្លោសល្អ និងផ្លែច្រើន ។
សរុបមក ការដាំត្រឡាចក្រោយពេលច្រូតស្រូវរួច អាចជួយបង្កលទ្ធភាពឱ្យកសិករបានប្រាក់ចំណូលបន្ថែម និងជួយគ្របថែរក្សាដីស្រែនៅរដូវប្រាំងថែមទៀតផង ៕
ចែករំលែកព័តមាននេះ