ទីក្រុងហាណូយ ៖ អ្នកជំនាញបាននិយាយក្នុងសន្និសីទមួយដែលប្រារព្ធឡើងកាលពីថ្ងៃសុក្រ នៅខេត្ត Thanh Hoa ថា ការលូតលាស់សេដ្ឋកិច្ចដ៏ខ្លាំងក្លាក្នុងឆ្នាំ២០១៧ កំពុងតែជំរុញដល់ជំនឿចិត្តលើសេដ្ឋកិច្ចវៀតណាមក្នុងឆ្នាំ ២០១៨ ដោយឱកាសវិនិយោគបានលេចឡើងកាន់តែច្រើន ។
សន្និសីទនេះប្រារព្ធឡើងដោយ VTV24 និង BizLIVE ដែលមានការពិភាក្សាពីឱកាសវិនិយោគ និងអាជីវកម្មក្នុងឆ្នាំ២០១៨ លើផ្នែកហិរញ្ញវត្ថុ អចលនទ្រព្យ និងសន្តិសុខ ។
លោក Tran Dinh Thien នាយកវិទ្យាស្ថានសេដ្ឋកិច្ចវៀតណាម និយាយថា បរិស្ថានអាជីវកម្មកំពុងតែល្អប្រសើរឡើង ស្របនឹងការអភិវឌ្ឍវិស័យសេដ្ឋកិច្ចឯកជនដែលបានជំរុញដល់សេដ្ឋកិច្ចជាតិ ។ ប៉ុន្តែគួរផ្តោតសំខាន់លើគុណភាពនៃការលូតលាស់ ។
លោកបន្តថា វាពិតជាសំខាន់ណាស់ក្នុងការពន្លឿនការដោះស្រាយបញ្ហាបំណុលខូច, សមភាពនៃសហគ្រាសរដ្ឋ, ការដោះស្រាយបញ្ហាហ៊ុនធនាគារ និងការប្រើ ប្រាស់មធ្យោបាយលើកតម្កើងក្រុមហ៊ុនក្នុង ស្រុក តាមរយៈការធ្វើឲ្យដំណើរការមានភាពងាយស្រួល និងកាត់បន្ថយការចំណាយសម្រាប់អាជីវកម្ម ។
លោកបន្ថែមថា វិធីសាស្ត្រពិសេសសម្រាប់ទីក្រុងហូជីមិញ និងតំបន់រដ្ឋបាលសេដ្ឋកិច្ច គឺត្រូវតែមានភាពជោគជ័យដើម្បីជំរុញដល់ការលូតលាស់សេដ្ឋកិច្ច ។
លោក Thien បន្ថែមទៀតថា អ្នកចូលរួមសន្និសីទភាគច្រើនព្យាករថា ការលូតលាស់ GDP ក្នុងឆ្នាំ២០១៨ អាចនឹងស្មើពី៦,៧% ទៅ៧%។
ការធ្វើកំណែទម្រង់ប្រព័ន្ធធនាគារកិច្ចបានផ្តល់ទស្សនវិស័យកាន់តែល្អសម្រាប់ការវិនិយោគផ្នែកហិរញ្ញវត្ថុផងដែរ ។
អ្នកជំនាញ Le Xuan Nghia បាននិយាយថា ឆ្នាំ២០១៧ ជាឆ្នាំដ៏ជោគជ័យមួយសម្រាប់វិស័យហិរញ្ញវត្ថុ រួមមាន ផ្នែកធនាគារ, សន្តិសុខ និងធានារ៉ាប់រងជាដើម ។ លោកបន្តថា ស្ថិរភាពអាចនឹងបន្តក្នុងឆ្នាំ២០១៨ ប៉ុន្តែប្រទេសនេះត្រូវតែបង្កើតធនធានដើម្បីកាត់បន្ថយអត្រាការប្រាក់ ។
ប៉ុន្តែលោក Can Van Luc អ្នកប្រឹក្សាយោបល់ក្នុងធនាគារ Bank for Investment and Development of Vietnam និយាយថា ការកាត់បន្ថយអត្រាការប្រាក់មិនមែនជារឿងងាយស្រួលទេ ព្រោះបញ្ហាបំណុលខូចត្រូវការពេលយូរដើម្បីដោះស្រាយ ប៉ុន្តែអត្រាការប្រាក់នឹងមានស្ថិរភាព ៕
ចែករំលែកព័តមាននេះ