ខេត្តព្រៃវែង ៖ បុរសម្នាក់ត្រូវបានចរន្តភ្លើងអគ្គិសនីឆក់ស្លាប់ភ្លាមៗនៅនឹងកន្លែង ខណៈពេលកំពុងតភ្លើងចេញពីព្រីភ្លើងចូលទៅអាំងវ័រទ័រ ហើយភ្លាត់ស្នៀតត្រូវភ្លើងឆក់ ។ ហេតុការណ៍នេះបានកើតឡើងកាលពីវេលាម៉ោង០៦និង៣០នាទីព្រឹក ថ្ងៃទី២២ ខែមករា ឆ្នាំ២០១៨ នៅលើផ្ទះជនរងគ្រោះដែលស្ថិតក្នុងភូមិត្រចក ឃុំមេបុណ្យ ស្រុកស្វាយអន្ទរ ខេត្តព្រៃវែង ។ ជនរងគ្រោះមានឈ្មោះ ជួប ប៉ាន់ ភេទប្រុស អាយុ៤៦ឆ្នាំ មានទីលំនៅក្បែរផ្ទះកើតហេតុ ។
ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុនេះ ជនរងគ្រោះតែងតែធ្វើការតភ្លើងពីព្រីភ្លើង ដាក់ទៅអាំងវ័រទ័រសម្រាប់បញ្ចូលបន្តទៅអាគុយជារៀងរាល់ថ្ងៃ តែមិនដែលមានបញ្ហាអ្វីទេ ទើបតែព្រឹកថ្ងៃកើតហេតុនេះ មិនដឹងជាមូលហេតុអ្វី ទើបបានជាបណ្តាលឲ្យឆក់ជនរងគ្រោះស្លាប់បែបនេះ ។
ដោយឡែក លោក អ៊ុង ផាន អធិការនគរបាលស្រុកស្វាយអន្ទរបានឲ្យដឹងដែរថា តាមការចុះពិនិត្យកន្លែងកើតហេតុ សមត្ថកិច្ចសន្និដ្ឋានថា ពេលកើតហេតុនោះ ជនរងគ្រោះបានយកខ្សែភ្លើងតភ្លើងចេញពីព្រី.សសរផ្ទះ ហើយយកទៅចាប់បញ្ចូលដុំអាំងវ័រទ័រ តែទំនងជាពេលចាប់ភ្ជាប់ដុំអាំងវ័រទ័រនោះ មិនបានប្រយ័ត្នទើបធ្វើឲ្យឆក់ ហើយភ្លាមៗនោះ នៅលើផ្ទះគ្មាននរណាដឹង និងជួយទាន់ទើបបណ្ដាលឲ្យឆក់រហូតដល់ស្លាប់បែបនេះទៅ ។
លោកអធិការបានបញ្ជាក់ថា ហេតុការណ៍បែបនេះឧស្សាហ៍កើតមានណាស់ នៅស្រុកស្វាយអន្ទរនេះ ដោយសារប្រជាពលរដ្ឋខ្វះការយល់ដឹង ចូលចិត្តធ្វើតាមគ្នាឃើញគេតខ្សែភ្លើងឆក់កណ្ដុរបាន ខ្លួនឯងទៅធ្វើតាមគេដែរ ខ្លះតភ្លើងពីផ្ទះទៅឆក់ត្រីក៏មាន ដល់លទ្ធផលឆក់ទាំងខ្លួនឯងស្លាប់ទៀតច្រើនគ្នាហើយ តែហាក់ដូចជាមិនមានអ្នកខ្លាច ឬរាងចាលសោះ ហើយអាជ្ញាធរ និងសមត្ថកិច្ច ក៏តែងតែធ្វើការផ្សព្វផ្សាយគ្រប់ពេលវេលាដែរ ហាមមិនឲ្យធ្វើសកម្មភាពបែបនេះ តែពលរដ្ឋយើងមួយចំនួនតូចនៅតែរឹងរូសមិនព្រមស្តាប់សោះ ទាល់តែឆក់ស្លាប់បែបនេះ ទើបនាំគ្នាយំស្រែកសុំឲ្យជួយផង ៕
ចែករំលែកព័តមាននេះ