រាជធានីភ្នំពេញ ៖ ស្ត្រីម្នាក់បានក្លាយខ្លួនជាជនពិការ ចំណែកបុរសជាប្ដីបានរងរបួសធ្ងន់ធ្ងរ ដោយសារតែរថយន្តបែនដឹកថ្ម១គ្រឿង បើកក្នុងល្បឿនលឿន បណ្ដាលឲ្យមានសភាពឃ្លេងឃ្លោង រួចហើយក៏ក្រឡាប់សង្កត់លើអ្នកដំណើរ២នាក់ប្ដីប្រពន្ធ ។ ហេតុការណ៍គ្រោះថ្នាក់បានកើតឡើងកាលពីវេលាម៉ោង១១និង៣៥នាទីថ្ងៃត្រង់ថ្ងៃទី១២…
រាជធានីភ្នំពេញ ៖ ស្ត្រីម្នាក់បានក្លាយខ្លួនជាជនពិការ ចំណែកបុរសជាប្ដីបានរងរបួសធ្ងន់ធ្ងរ ដោយសារតែរថយន្តបែនដឹកថ្ម១គ្រឿង បើកក្នុងល្បឿនលឿន បណ្ដាលឲ្យមានសភាពឃ្លេងឃ្លោង រួចហើយក៏ក្រឡាប់សង្កត់លើអ្នកដំណើរ២នាក់ប្ដីប្រពន្ធ ។ ហេតុការណ៍គ្រោះថ្នាក់បានកើតឡើងកាលពីវេលាម៉ោង១១និង៣៥នាទីថ្ងៃត្រង់ថ្ងៃទី១២ ខែមករា ឆ្នាំ២០១៨ នៅលើកំណាត់ផ្លូវជាតិលេខ២ ត្រង់ចំណុចរង្វង់មូលដីក្រហម ស្ថិតនៅក្នុងភូមិកណ្ដាល សង្កាត់រលួស ខណ្ឌដង្កោ រាជធានីភ្នំពេញ។
ជនរងគ្រោះទាំង២នាក់ប្ដីប្រពន្ធនោះ មិនទាន់ត្រូវបានស្គាល់ឈ្មោះនៅឡើយទេ ពួកគាត់ជិះម៉ូតូ១គ្រឿង សេ១០០កូរ៉េ ពណ៌ក្រហម ស្លាកលេខតាកែវ ១A-២០៤២ ។ ចំណែករថយន្តបង្កពណ៌ស ស្លាកលេខ ភ្នំពេញ៣C-៩៣៦៨ បើកដោយយុវជនឈ្មោះឃុន វិបុល អាយុ២១ឆ្នាំ មានទីលំនៅក្នុងភូមិត្រពាំងថ្ម ឃុំរបើក ស្រុកឈូក ខេត្តកំពត ។
ប្រភពព័ត៌មានបានឲ្យដឹងថា នៅមុនពេលកើតហេតុជនរងគ្រោះទាំងពីរនាក់ប្ដីប្រពន្ធខាងលើបានជិះម៉ូតូសេ១០០កូរ៉េ១គ្រឿងនោះ ទៅឈប់ទិញទឹកសុទ្ធហូបនៅត្រង់ចំណុចកើតហេតុ ដោយមិននឹកស្មានថា មានរឿងអកុសលបែបនឹងកើតឡើងនោះទេ ។ លុះបន្តិចក្រោយមករថយន្តបង្កបានបើកក្នុងល្បឿនយ៉ាងលឿនពីលិចទៅកើតបានទៅដល់ ហើយរថយន្តនោះបានបើកបត់ឡាកួរក្រឡឹងតាមរង្វង់មូល ហើយដោយសារតែរថយន្តដឹកថ្មពេញទ្រុងធ្ងន់ផង ធ្វើឲ្យមានសភាពឃ្លេងឃ្លោងរហូតទប់លំនឹងមិនបានក៏ក្រឡាប់សង្កត់លើជនរងគ្រោះទាំង២នាក់តែម្ដង ។ ខណៈនោះបណ្ដាលឲ្យស្ត្រីជាប្រពន្ធដាច់ប្រអប់ជើងឆ្វេងម្ខាង ចំណែកអ្នកបើករថយន្តមិនបានរងរបួសនោះទេ ហើយបានលូនចេញពីក្នុងរថយន្តប្រុងរត់គេចខ្លួន ប៉ុន្តែត្រូវបាននគរបាល និងប្រជាពលរដ្ឋនៅក្បែរនោះចាប់បាន រួចហើយបាននាំទៅសាកសួរនៅប៉ុស្ដិ៍រលួស ។
ក្រោយពេលកើតហេតុមានការកកស្ទះចរាចរណ៍ផងដែរ ដោយសារតែរថយន្តបានក្រឡាប់នៅកណ្ដាលផ្លូវ ហើយភ្លាមៗនោះកម្លាំងនគរបាលចរាចរណ៍ខណ្ឌដង្កោ បានចុះទៅសម្រួល និងស្ទូចយករថយន្តនោះចេញពីកន្លែងកើតហេតុព្រមទាំងនាំយកជនរងគ្រោះទៅកាន់មន្ទីរពេទ្យ ដើម្បីសង្គ្រោះបន្ទាន់ទើបលែងមានការកកស្ទះ ហើយរថយន្តបង្ក និងអ្នកបើកបរព្រមទាំងម៉ូតូសេ១០០កូរ៉េ ត្រូវនគរបាលនាំយកទៅរក្សាទុករង់ចាំការដោះស្រាយគ្នា ៕
ចែករំលែកព័តមាននេះ