រាជធានីភ្នំពេញ ៖ កម្លាំងសន្តិសុខសាលាខណ្ឌពោធិ៍សែនជ័យ បានឃាត់រថយន្តអេសសាំយ៉ុង២គ្រឿង ដែលកំពុងឈប់ចាប់ម៉ូយនៅតាមផ្លូវ ដែលងាយនឹងមានការកកស្ទះចរាចណ៍ ហើយដែលអាជ្ញាធរបានធ្វើការហាមឃាត់ជារៀងរាល់ថ្ងៃមិនឲ្យចតឡើយ ។ ប៉ុន្តែចំពោះក្រុមរថយន្តតាក់ស៊ី និងរថយន្តឈ្នួលពិបាកណែនាំ និងដេញចេញណាស់ហាក់ដូចជាការវែកចកអញ្ចឹង។
ការឃាត់រថយន្តអេសសាំយ៉ុងទាំង២គ្រឿងខាងលើនោះ ធ្វើឡើងនៅក្នុងខណៈពេលដែលកម្លាំងសន្តិសុខខាងលើ ចុះធ្វើសណ្ដាប់ធ្នាប់កាលពីវេលាម៉ោង១១ព្រឹក ថ្ងៃទី១៩ ខែកុម្ភៈ ឆ្នាំ២០១៨ នៅតាមបណ្ដោយផ្លូវជាតិលេខ៤ ត្រង់ចំណុចខាងលិចរង្វង់មូលថ្នល់បំបែកចោមចៅ ស្ថិតនៅក្នុងភូមិព្រៃជីសាក់ សង្កាត់ចោមចៅ៣ ខណ្ឌពោធិ៍សែនជ័យ ។
តាមប្រភពព័ត៌មានបានឲ្យដឹងថា រថយន្តអេសសាំយ៉ុងទាំង២គ្រឿងនោះ មាន១គ្រឿងពណ៌ស ពាក់ស្លាកលេខ ភ្នំពេញ ២H-៥៩៧១ ចំណែក១គ្រឿងទៀតពណ៌ខៀវ ពាក់ស្លាកលេខ ភ្នំពេញ ២AD-៣៤២៨ ។ ដែលរថយន្តទាំង២គ្រឿងនេះ គឺជារថយន្តឈ្នួលដឹកអ្នកដំណើរ ដែលកន្លងមកតែងតែឈប់ចាប់ម៉ូយនៅទីនោះជារៀងរាល់ថ្ងៃ ប៉ុន្តែដល់ពេលកម្លាំងសន្តិសុខចាប់អ្នកបើកបរនិយាយថា ទើបតែឈប់ម្ដងប៉ុណ្ណោះ ។
ក្រុមសន្តិសុខសាលាខណ្ឌពោធិ៍សែនជ័យនិយាយថា មេ (លោកអភិបាលខណ្ឌ) បានឲ្យរៀបចំសណ្ដាប់ធ្នាប់នៅតាមបណ្ដាផ្លូវនានា ជាពិសេសផ្លូវជាតិលេខ៤ ដេញមិនឲ្យចតរថយន្តទេ ដើម្បីបញ្ចៀសការកកស្ទះចរាចរណ៌ ។ ព្រោះផ្លូវជាតិលេខ៤ ត្រង់ចំណុចជិតរង្វង់មូលថ្នល់បំបែកចោមចៅនោះ មានការកកស្ទះចរាចររាល់ថ្ងៃ ដោយសារការចតរថយន្តឈ្នួលដេញចាប់ម៉ូយគ្មានសណ្ដាប់ធ្នាប់បែបនេះ ។
ហើយសន្តិសុខតែងត្រូវមាត់លោកអភិបាលខណ្ឌជាញឹកញាប់ដោយសារបញ្ហានេះ ម្យ៉ាងទេគន្លងផ្លូវដែលត្រូវឲ្យឈប់ចត ប៉ុន្តែក្រុមរថយន្តទាំងនេះមិនព្រមទៅចតតាមការណែនាំឡើយ ទើបត្រូវឃាត់ប៉ុន្តែក្រោយពីការណែនាំអប់រំរួចក៏បានដោះលែងទៅវិញអស់ហើយ ។
គួរកត់សម្គាល់ផងដែរថា រថយន្តទាំង២គ្រឿងបាននេះបានឈប់ចាប់ម៉ូយនៅលើផ្លូវតែម្ដងដោយមិនខ្វល់ពីការកកស្ទះអ្វីឡើយ ។ លុះពេលត្រូវកម្លាំងសន្តិសុខចាប់អ្នកបើកបរបានអង្វរសុំឲ្យដោះលែងវិញ និងនិយាយថាថ្ងៃក្រោយរាងចាលហើយ ព្រោះពួកគាត់មិនបានដឹងថាទីនោះមិនឲ្យចត ហើយគាត់ទើបតែចតកន្លែងនោះជាលើកទី១ប៉ុណ្ណោះ ក៏ត្រូវសន្តិសុខចាប់បែបនេះ ខណៈនោះដោយសារតែការអង្វរខ្លាំងពេក ទើបសន្តិសុខដោះលែងទៅវិញក្រោយពីការអប់រំរួច ៕
ចែករំលែកព័តមាននេះ