រាជធានីភ្នំពេញ ៖ បុរសចំណាស់ម្នាក់បានបាត់គោឈ្មោល១ក្បាល ខណៈដែលគាត់ចងវាឲ្យស៊ីស្មៅក្បែរភូមិ ពេលនោះគាត់បានតាមរក ហើយបានប្រទះឃើញនៅក្បែរម៉ុងខ្មោចមួយកន្លែង ដោយចោរបានលួចដឹកយកទៅចងនៅទីនោះជាមួយនឹងមេគោ១ក្បាលទៀត ត្រៀមដឹកចេញបន្តពីកន្លែងនោះទៅលក់ឲ្យទីសត្តឃាត(កុងស៊ីកាប់គោ) ពេលយប់។ ក្រោយពេលរកឃើញ…
រាជធានីភ្នំពេញ ៖ បុរសចំណាស់ម្នាក់បានបាត់គោឈ្មោល១ក្បាល ខណៈដែលគាត់ចងវាឲ្យស៊ីស្មៅក្បែរភូមិ ពេលនោះគាត់បានតាមរក ហើយបានប្រទះឃើញនៅក្បែរម៉ុងខ្មោចមួយកន្លែង ដោយចោរបានលួចដឹកយកទៅចងនៅទីនោះជាមួយនឹងមេគោ១ក្បាលទៀត ត្រៀមដឹកចេញបន្តពីកន្លែងនោះទៅលក់ឲ្យទីសត្តឃាត(កុងស៊ីកាប់គោ) ពេលយប់។ ក្រោយពេលរកឃើញ ម្ចាស់គោឈ្មោលបានដឹកយកទាំងគោរបស់គាត់ និងមេគោនោះទៅផ្ទះវិញ ដើម្បីប្រគល់ជូនលោកមេភូមិ ឲ្យជួយដឹងឮ និងប្រកាសរកម្ចាស់មេគោ នោះឲ្យទៅទទួលយកមេគោរបស់ខ្លួនទៅវិញ ព្រោះមិនបានដឹងថាមេគោ១ក្បាលនោះត្រូវបានចោរលួចដឹកយកពីកន្លែងណាឡើយ ចំណែកចោរបានគេចខ្លួនបាត់ស្រមោលតាំងពីមុនពេលម្ចាស់តាមរកគោឃើញម្លេះ។ ម្ចាស់បានតាមរកគោឈ្មោលរបស់ខ្លួនឃើញ កាលពីវេលាម៉ោង៣រសៀលថ្ងៃទី២០ ខែធ្នូ ឆ្នាំ២០១៧ នៅទីលានបញ្ចុះសពដែលមាន ទីតាំងស្ថិតនៅខាងជើងវត្តតាភេម ក្នុងភូមិតាភេម សង្កាត់កំបូល ខណ្ឌពោធិ៍សែនជ័យ រាជធានីភ្នំពេញ។ ម្ចាស់គោឈ្មោលខាងលើឈ្មោះ អឿន លី ភេទប្រុស អាយុ៥៦ឆ្នាំ មានទីលំនៅក្នុងភូមិស្នួលខ្ពស់ សង្កាត់កំបូល ខណ្ឌពោធិ៍សែនជ័យ រាជធានីភ្នំពេញ។
គោរបស់គាត់១ក្បាលនោះមានតម្លៃប្រមាណជាង៣លានរៀល និងជាកម្លាំងអូសទាញយ៉ាងសំខាន់បំផុត សម្រាប់កសិករដូចជារូបគាត់ ក្នុងការបង្កបង្កើនផលធ្វើស្រែចម្ការ ។ ចំណែកមេគោ១ក្បាលទៀតដែលត្រូវចោរលួចដែរ មិនទាន់ត្រូវបានស្គាល់ម្ចាស់នៅឡើយទេ តាមការប៉ាន់ស្មានវាមានតម្លៃប្រហែល៣លានរៀលចុះក្រោម។ អ្នកភូមិនិយាយថា នៅវេលាព្រឹកថ្ងៃកើតហេតុ លោកតា អឿន លី បានប្រើកូនឲ្យដឹកគោឈ្មោលសម្បុរក្រហម១ក្បាល និងស១ក្បាល យកទៅចងឲ្យស៊ីស្មៅនៅវាលស្រែខាងកើតភូមិ បន្ទាប់ពីចងរួចរាល់ កូនរបស់គាត់បានដើរត្រឡប់មកផ្ទះវិញ ហើយបានធ្វើការងារផ្ទះ រហូតដល់វេលាម៉ោង១២ថ្ងៃត្រង់ ទើប ត្រឡប់ទៅមើល និងក្នុងបំណងផ្លាស់ទៅចងនៅកន្លែងផ្សេងទៀត ដែលស្ថិតនៅជិតៗនោះ ដែរ។ ប៉ុន្តែពេលទៅដល់ស្រាប់តែភ្ញាក់ព្រើត ព្រោះបាត់គោ១ក្បាលឈ្មោល១ក្បាលសម្បុរក្រហម គឺបាត់ទាំងខ្សែថែមទៀតផង នៅសល់តែ១ក្បាលសម្បុរសដែលចេះជល់ ហើយចោរខ្លាចអាសនេះជល់ទើបអត់ហ៊ានដឹកយក និងបានយកតែអាក្រហម១ក្បាលទៅ ហើយដោយសារតែបែបនេះកូនម្ចាស់គោបានសន្និដ្ឋានភ្លាមៗថា គោរបស់ខ្លួនប្រាកដជាត្រូវចោរ លួចដឹកយកទៅព្រោះបាត់ទាំងខ្សែបែបនេះ ប្រសិនបើគោដាច់ ឬរបូតខ្សែនោះមិនអាចបាត់ទាំងខ្សែ បែបនេះឡើយហើយវាក៏មិនអាចទៅណាឆ្ងាយពីគ្នាដែរ។
ប្រភពដដែលបានបន្តទៀតថា ពេលនោះម្ចាស់គោរួមជាមួយកម្លាំងប្រជាការពារភូមិ ក៏បានតាមរកហើយត្រូវបានអ្នកស្គាល់គ្នាប្រាប់ថា បានឃើញមនុស្សប្រុសម្នាក់ដឹកគោ២ ក្បាលយកសំដៅទៅទិសខាងកើត ពេលនោះម្ចាស់បានតាមរករហូតដល់ចំណុចទីលាន បញ្ចុះសព ស្ថិតនៅខាងជើងវត្តតាភេម ក៏បានប្រទះឃើញគោ២ក្បាល គឺគោឈ្មោលរបស់គាត់១ក្បាល និងមេគោ១ក្បាលទៀត ដែលត្រូវបានចោរចងនៅទីនោះ ដើម្បីដឹកយកចេញទៅលក់នៅពេលយប់។ បន្ទាប់មកម្ចាស់គោឈ្មោលបានដឹកទាំងគោរបស់ខ្លួន និងមេគោនោះទៅផ្ទះ ព្រមទាំងប្រគល់មេគោជូនលោកប្រធានភូមិ និងប្រជាការពារភូមិរក្សាទុក ព្រមទាំងប្រកាសស្វែងរកម្ចាស់របស់ វា ឲ្យទៅទទួលយកត្រឡប់ទៅផ្ទះវិញ ប៉ុន្តែរហូតដល់វេលាយប់ថ្ងៃដដែលនៅមិនទាន់រកម្ចាស់ឃើញនៅឡើយ ប្រហែលជាម្ចាស់នៅ ឆ្ងាយមិនមែននៅជិតៗនោះទេ ហើយគាត់ក៏មិនបានប្ដឹងនគរបាលដែរ៕
https://youtu.be/ImXzTFD6iAQ
ចែករំលែកព័តមាននេះ