រាជធានីភ្នំពេញ ៖ នៅសុខៗស្រាប់តែមេធាវីពូកែថ្វីមាត់៤ រូប ដែលជាមេធាវីការពារក្តីលោក កឹម សុខា មេដឹកនាំអតីតគណបក្សសង្គ្រោះជាតិ បានសម្រេចដាក់ពាក្យជូនទៅប្រធានសាលាដំបូងរាជធានីភ្នំពេញ សាលាឧទ្ទរណ៍…
រាជធានីភ្នំពេញ ៖ នៅសុខៗស្រាប់តែមេធាវីពូកែថ្វីមាត់៤ រូប ដែលជាមេធាវីការពារក្តីលោក កឹម សុខា មេដឹកនាំអតីតគណបក្សសង្គ្រោះជាតិ បានសម្រេចដាក់ពាក្យជូនទៅប្រធានសាលាដំបូងរាជធានីភ្នំពេញ សាលាឧទ្ទរណ៍ និងតុលាការកំពូលថ្ងៃទី២៤ ខែមេសា ឆ្នាំ២០១៨ បញ្ជាក់ថា ពួកគាត់ទាំង៤រូប «សុំឈប់ការពារក្តី» ឲ្យលោកកឹម សុខា ដែលកំពុងតែជាប់ឃុំ នៅពន្ធនាគារត្រពាំងផ្លុង ខេត្តត្បូងឃ្មុំ ។
មេធាវីការពារក្តីឲ្យលោក កឹម សុខា ទាំង៤រូបរួមមាន ៖ លោកសំ សុគង់ លោកហែម សុជាតិ លោកកែត ឃី និងលោកជួង ជូងី បានដាក់ពាក្យលាឈប់ការពារក្តីជាផ្លូវការជូនអតីតមេដឹកនាំបក្សប្រឆាំងតាមការស្នើសុំរបស់លោក កឹម សុខា តែម្តង ។
មេធាវីទាំង៤រូបបានបញ្ជាក់ថា តាមការប្រាប់ពីមេធាវី២រូបផ្សេងទៀត គឺលោកចាន់ ចេន និងលោកផាន់ ច័ន្ទសាក់ថា «ឯកឧត្តម កឹម សុខា បានបញ្ឈប់យើងខ្ញុំ ការពារក្តីជូនឯកឧត្តមនៅសាលាដំបូងរាជធានីភ្នំពេញ សាលាឧទ្ទរណ៍ និងតុលាការកំពូលទៀតហើយ» ។
សូមរម្លឹកថា លោក កឹម សុខា ត្រូវបានចាប់ខ្លួនកាលពីថ្ងៃទី៣ ខែកញ្ញា ឆ្នាំ២០១៧ និងបានចោទប្រកាន់ពីបទសន្និដ្ឋិភាពជាមួយបរទេស «ក្បត់ជាតិ» តាមមាត្រា៤៤៣នៃច្បាប់ព្រហ្មទណ្ឌនៃព្រះរាជាណាចក្រកម្ពុជា ។
ពេលនេះលោកកឹម សុខា កំពុងតែឃុំខ្លួននៅពន្ធនាគារត្រពាំងផ្លុង ក្នុងខេត្តត្បូងឃ្មុំរង់ចាំការជំនុំជម្រះទោស ។ ប្រសិនតុលាការរកឃើញទោសលោកកឹម សុខាអាចប្រឈមការជាប់ពន្ធគារនារពី១៥ដល់៣០ឆ្នាំ ៕
ចែករំលែកព័តមាននេះ