អ្នកគ្រូបង្រៀនជនជាតិអ៊ីតាលីម្នាក់ដែលជាអតីតបវរកញ្ញា និងតារាម៉ូដែលបានទទួលរងនូវការរិះគន់ពីសំណាក់អាណាព្យាបាលសិស្សក្នុងសាលារៀនកាតូលិកដ៏ល្បីឈ្មោះមួយ ដោយបានអះអាងថា នាងបង្ហាញរូបភាពដ៏សិចស៊ីលើសពីស្ថានភាពជាគ្រូបង្រៀន ។
នាងអ៊ីលេអាណា តាក់ហ្គោណេលលី គ្រូបង្រៀនអាយុ២៨ឆ្នាំ បានទទួលការតវ៉ាពីក្រុមអាណាព្យាបាលសិស្ស ក្រោយពីមានរូបភាពអាសអាភាសរបស់គ្រូបង្រៀនរូបនេះ បង្ហាញនៅលើប្រព័ន្ធអ៊ីនធើរណេត ។ ទង្វើខាងលើនេះធ្វើឱ្យអាណាព្យាបាលមួយក្រុមបញ្ជាឱ្យកូនចាកចេញពីសាលារៀនរបស់ពួកគេដែលស្ថិតនៅក្នុងទីក្រុងមីឡាន ប្រទេសអុីតាលី ។
ទោះបីជាយ៉ាងណាក៏ដោយ អាណាព្យាបាលផ្សេងទៀត ជាពិសេសឪពុករបស់សិស្សក្នុងសាលារៀនសានកាឡូ រួមទាំងនាយកសាលាបានផ្តល់ការគាំទ្រដល់អ្នកគ្រូតាក់ហ្គោណេលលី ។ ស្របពេលជាមួយគ្នានេះ ស្ត្រីជាម្តាយដែលឱ្យកូនចាកចេញពីសាលារៀនខាងលើបាននិយាយរិះគន់ថា ៖ «ពួកខ្លួនមានអារម្មណ៍ខ្មាសអៀនចំពោះទង្វើរបស់អ្នកគ្រូតាក់ហ្គោណេលលី ខ្លាំងណាស់ ។ ពួកខ្លួនហាក់ដូចជាចាញ់ល្បិចកល ព្រោះរំពឹងទុកថា សាលាខាងលើមានកេរ្តិ៍ឈ្មោះខ្ពង់ខ្ពស់ និងជាក្តីសង្ឃឹមរបស់សិស្ស» ៕
ចែករំលែកព័តមាននេះ