ការទិញលំនៅឋានបន្តនេះ ម្ចាស់លំនៅឋានតែងឃោសនាតែចំណុចល្អៗរបស់លំនៅឋានប៉ុណ្ណោះ ដោយពួកគេចៀសវាងមិននិយាយដល់ចំណុចអាក្រក់ និងការធ្វេសប្រហែសឡើយ។ ដូច្នេះ យើងគួរស្វែងរកការពិតបន្ថែមទៀត ដើម្បីធ្វើការសម្រេចចិត្តទិញលំនៅឋាន។ ព័ត៌មានគួរជ្រាបអំពីលំនៅឋានមានដូចជា ៖ ១-ប្រវត្តិលំនៅឋាន…
ការទិញលំនៅឋានបន្តនេះ ម្ចាស់លំនៅឋានតែងឃោសនាតែចំណុចល្អៗរបស់លំនៅឋានប៉ុណ្ណោះ ដោយពួកគេចៀសវាងមិននិយាយដល់ចំណុចអាក្រក់ និងការធ្វេសប្រហែសឡើយ។ ដូច្នេះ យើងគួរស្វែងរកការពិតបន្ថែមទៀត ដើម្បីធ្វើការសម្រេចចិត្តទិញលំនៅឋាន។ ព័ត៌មានគួរជ្រាបអំពីលំនៅឋានមានដូចជា ៖
១-ប្រវត្តិលំនៅឋាន ៖
គួរតែសាកសួរប្រវត្តិលំនៅឋានពីម្ចាស់ដើម ដូចជា សាងសង់នៅពេលណា, អ្នកណាជាអ្នកសាងសង់, អ្នកសាងសង់ផ្ទះនេះរស់នៅទីណា ហើយអាចទាក់ទងបានក្នុងពេលបច្ចុប្បន្នឬទេ, មានលិខិតអនុញ្ញាតឲ្យសាងសង់ឬអត់, មានប្លង់ត្រឹមត្រូវឬគ្មាន និងការពង្រីកផ្ទះជាដើម ។
ក្រៅពីនេះ គួរសាកសួរអ្នកជិតខាងដែលរស់នៅក្នុងបរិវេណតែមួយ អំពីផ្ទះដែលយើងនឹងទិញ ដើម្បីបញ្ជាក់ការពិតរវាងម្ចាស់ផ្ទះប្រាប់និងអ្នកជិតខាងប្រាប់ ដូចជា ប្រវត្តិម្ចាស់ផ្ទះដើម រហូតដល់រឿងរ៉ាវផ្សេងៗដែលអាចក្លាយជាប្រយោជន៍ដល់ការរស់នៅក្នុងផ្ទះនោះថាល្អ ឬមិនល្អ ។
២-សភាពលំនៅឋាន ៖
យើងក៏ត្រូវសាកសួរពីសភាពផ្ទះដែរ ដូចជា បរិវេណព័ទ្ធជុំវិញ និងសភាពក្បែរៗ តើផ្ទះនេះស្ថិតនៅបរិវេណទំនាប ទឹកលិច ឬមានសំឡេងរំខាន និងក្លិនមិនល្អឬទេ និងមានរោងចក្រនៅជិតៗជាដើម ។
សភាពតួផ្ទះដែលល្អ គឺតួអគារត្រូវតែមិនផ្អៀងខ្លាំងពេករហូតដល់ឃើញច្បាស់ ។ គួរតែមើលផងថា តើមានស្នាមដានជួសជុលឬទេ។ បើអ្នកមិនប្រាកដចិត្ត ចាំបាច់ត្រូវស្វែងរកស្ថាបនិក និងវិស្វករក្នុងផ្នែកពាក់ព័ន្ធផ្សេងៗឲ្យមកជួយពិនិត្យមើល ។
គួរតែពិនិត្យសភាពស្នាមប្រេះនៅលើជញ្ជាំងផ្ទះថា មានលក្ខណៈបែបណា វាបែកទាំងអស់ ឬបែកផ្នែកខ្លះ ។ បើឃើញថា មានស្នាមប្រេះផ្អៀងពីសសរដល់ធ្នឹម ឬប្រេះកន្លែងផ្សេងទៀត យើងគួររកវិស្វករមកពិនិត្យដើម្បីឲ្យប្រាកដចិត្តថា គម្រោង និងផ្នែកសំខាន់ៗរបស់ផ្ទះនៅរឹងមាំ ពីព្រោះលក្ខណៈបែកប្រេះខាងលើអាចបង្កឲ្យកើតគ្រោះថ្នាក់បាន ។
៣-លក្ខខណ្ឌនៃការលក់ និងតម្លៃ ៖
គួរព្រមព្រៀងលក្ខខណ្ឌនៃការលក់ និងតម្លៃឲ្យច្បាស់លាស់ ដូចជា ថ្លៃបង់ពន្ធ អ្នកណាជាអ្នកចាយ តម្លៃជារួមក្នុងផ្ទះមានអ្វីខ្លះ ដូចជា គ្រឿងសង្ហារិម និងម៉ាស៊ីនត្រជាក់ ។ មុននឹងប្រគល់ប្រាក់ គួរពិនិត្យមើលឯកសារសំខាន់ក្នុងការចុះឈ្មោះផ្ទេរកម្មសិទ្ធិថា មានធ្វេសប្រហែសឬអត់ ដូចជា ប្លង់ដី ឬដីជាប់ពាក់ព័ន្ធនឹងអ្វីផ្សេងទៀត ។ បើយើងប្រគល់ប្រាក់ទៅហើយ គេអាចទៅលោះដីនោះមកវិញ ហើយផ្ទេរឲ្យយើងបានឬទេ ។
លិខិតអនុញ្ញាតសាងសង់ជារបស់អ្នកណា ព្រោះលិខិតនេះបង្ហាញពីភាពជាម្ចាស់កម្មសិទ្ធិអគាររបស់អ្នកលក់ ។ ការធ្វើកិច្ចសន្យា ត្រូវបញ្ជាក់ជាមួយអ្នកលក់ឲ្យបានគ្រប់ជ្រុងជ្រោយ និងពេលវេលាឲ្យគេរើចេញ ។ បើរៀបចំវាបានល្អិតល្អិនជាមុន យើងនឹងមិនសោកស្តាយនៅពេលក្រោយ ៕
ចែករំលែកព័តមាននេះ