ខេត្តកំពង់ឆ្នាំង ៖ ដោយសារបញ្ហាសុខភាពបច្ចុប្បន្នកំពុងប៉ះពាល់ដោយសារចំណីអាហារមានជាតិគីមីនោះ ប្រជាកសិករដាំដំណាំដែលគ្មានជាតិគីមីនៅខេត្តកំពង់ឆ្នាំង បានអំពាវនាវឲ្យប្រជាកសិករគ្រប់រូបចូលរួមដាំដំណាំដោយមិនប្រើប្រាស់ជាតិគីមីដើម្បីសុខភាពប្រជាពលរដ្ឋទូទៅ ក៏ដូចជាក្នុងក្រុមគ្រួសារដែលនិយមពិសាបន្លែបង្ការជារៀងរាល់ថ្ងៃ ។
លោក ចាន់ ផល្លី ជាប្រជាកសិកររស់នៅភូមិព្រៃពួច ឃុំជ្រៃបាក់ ស្រុករលាប្អៀរ បានបញ្ជាក់ថា សំខាន់សូមគិតពីសុខភាពរបស់ខ្លួន ចំពោះការពិសាបន្លែ ដែលបច្ចុប្បន្នសម្បូរដោយជាតិគីមី ។ លោកសូមអំពាវនាវដល់ប្រជាកសិករគ្រប់រូបសូមបញ្ឈប់ការប្រើប្រាស់ជីគីមីលើដំណាំគ្រប់ប្រភេទ ដែលធ្វើឲ្យប៉ះពាល់សុខភាពប្រជាពលរដ្ឋអ្នកបរិភោគ ហើយងាកមកដាំដំណាំបន្លែបង្ការដោយប្រើប្រាស់ជីធម្មជាតិវិញ ។
លោកបានឲ្យដឹងដែរថា បច្ចុប្បន្ននេះលោកមានដីចម្ការមួយកន្លែងដែលជាដីខ្សាច់គ្មានជីជាតិសោះ តែលោកនៅតែអាចដាំដំណាំបាន ហើយទទួលបានផលល្អដោយមិនប្រើប្រាស់ជីគីមីឡើយ គឺអនុវត្តទៅតាមការណែនាំរបស់មន្ទីរកសិកម្មខេត្ត ក៏ដូចជាអង្គការនានាជាដៃគូរបស់មន្ទីរ ។
ជាក់ស្តែង ដំណាំដែលនៅក្នុងចម្ការរបស់លោកសព្វថ្ងៃមាន ត្រសក់ ពោតបារាំង ម្រះ ត្រប់ និងសណ្តែកកួជាដើមបានទទួលលទ្ធផលល្អណាស់ ប្រជាពលរដ្ឋពេញនិយមទិញបន្លែរបស់គាត់ដល់ចម្ការមានទីផ្សារល្អ និងបានតម្លៃខ្ពស់ហើយអាចកម្ម៉ង់មុនបានទៀតផង ។ សព្វថ្ងៃនេះ ប្រជាពលរដ្ឋដែលបានដឹង បានមកជួយទិញបន្លែរបស់គាត់ដល់ចម្ការ និងមានអាជីវករតាមផ្សារក៏កុម្ម៉ង់ទិញច្រើន ព្រោះតែគាត់ធានាថាគ្មានជាតិគីមីឡើយ ។ ចំពោះការដាំវិញ គឺគាត់ប្រើប្រាស់តែជីធម្មជាតិ និងបចេ្ចកទេសកសិកម្មតែប៉ុណ្ណោះ ចំណែកឯការសម្លាប់សត្វបំផ្លាញវិញ ក៏ដូចគ្នាដែរ គឺប្រើប្រាស់តែថ្នាំបុរាណ មានដូចជា ដើមស្តៅ ម្ទេស គល់ស្លឹកគ្រៃ ជាដើម ដែលមានជាតិហឹរ ល្វីង ចត់ ដើម្បីបំផ្លាញវា ហើយសេសសល់ខ្លះ គឺបេះបំផ្លាញចោលដោយដៃដោយគាត់មិនប្រើថ្នាំពុលឡើយ។
ជាមួយគ្នានេះដែរ លោក ងិន ហ៊ុន ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ឆ្នាំង បានឱ្យដឹងដែរថា ដំណាំក្នុងចម្ការ លោក ចាន់ ផល្លី ពិតជាគ្មានជាតិគីមី និងមិនប្រើប្រាសថ្នាំពុលប្រាកដមែន ដោយគាត់ជាម្ចាស់ចម្ការប្រើប្រាស់តែជីធម្មជាតិ និងថ្នាំផលិតពីធម្មជាតិដើម្បីសម្លាប់សត្វបំផ្លាញតែប៉ុណ្ណោះ ដោយសារតែហេតុនេះហើយទើបកសិផលរបស់គាត់មានតម្លៃទីផ្សារខ្ពស់ជាងតម្លៃធម្មតាហើយកន្លងទៅមន្ទីរកសិកម្មធ្លាប់បានដឹកនាំកម្មសិក្សាទស្សនកិច្ចដល់ចម្ការនោះជាច្រើនដងហើយដែរ ៕
ចែករំលែកព័តមាននេះ