រាជធានីភ្នំពេញ ៖ ការនាំចេញអង្កររបស់កម្ពុជាទៅបរទេសនៅក្នុងរយៈពេល១១ខែ ឆ្នាំ២០១៧នេះ មានបរិមាណសរុបជាង៥៦ម៉ឺនតោន ពោលកើនឡើង១៧,២០% បើធៀបនឹងគ្រាដូចគ្នាឆ្នាំមុន ។ នេះបើយោងតាមរបាយការណ៍របស់លេខាធិការដ្ឋានច្រកចេញចូលតែមួយសម្រាប់បំពេញបែបបទនាំចេញអង្ករ ។…
រាជធានីភ្នំពេញ ៖ ការនាំចេញអង្កររបស់កម្ពុជាទៅបរទេសនៅក្នុងរយៈពេល១១ខែ ឆ្នាំ២០១៧នេះ មានបរិមាណសរុបជាង៥៦ម៉ឺនតោន ពោលកើនឡើង១៧,២០% បើធៀបនឹងគ្រាដូចគ្នាឆ្នាំមុន ។ នេះបើយោងតាមរបាយការណ៍របស់លេខាធិការដ្ឋានច្រកចេញចូលតែមួយសម្រាប់បំពេញបែបបទនាំចេញអង្ករ ។
របាយការណ៍ដដែលគូសបញ្ជាក់ថា នៅក្នុងរយៈពេល១១ខែកន្លងទៅនេះ ក្រុមហ៊ុនដែលបាននាំចេញច្រើនជាងគេមាន ក្រុមហ៊ុន Cristal Rice មានកំណើន១១,៩៣% តាមពីក្រោយដោយក្រុមហ៊ុន Baitang កើនឡើង១០,០៨% ខណៈក្រុមហ៊ុន Apsara Rice ការនាំចេញកើនឡើង៧,៧៩% ។ ចំណែកប្រទេសទិសដៅ ដែលកម្ពុជាធ្វើការនាំចេញបានច្រើនជាងគេមាន បារាំង មានជាង៧០.៧៤១តោន, ប៉ូឡូញ ៤១.៤៦៩តោន, អង់គ្លេស ២៥.៨៨៩តោន, ហូឡង់ ២៥.០០២តោន, បែលហ្ស៊ិក ១៩.២៤៤តោន និងសាធារណរដ្ឋឆែក ១៥.១៨៧តោន ។
លោកបណ្ឌិត ហ៊ាន វណ្ណហន ប្រធានលេខាធិការដ្ឋានច្រកចេញចូលតែមួយសម្រាប់បំពេញបែបបទនាំចេញអង្ករមានប្រសាសន៍ថា៖ « ក្នុងចំណោមប្រទេសទិសដៅនាំចេញទៅបានច្រើន យើងឃើញថាមានការកើនឡើង ក្រៅពីអឺរ៉ុបមានពីរឬបីប្រទេសដែរ ។ កំណើនទីផ្សារប្រទេសក្រៅពីអឺរ៉ុបនេះ យើងនាំចេញទៅឃើញថាជាចំណុចមួយល្អ និងវិជ្ជមាន ដែលជំរុញឱ្យមានកំណើន »។
លោកបណ្ឌិតបន្តថា ៖« តាមការវាយតម្លៃរបស់ខ្ញុំ ការនាំចេញអង្ករសរុបរបស់កម្ពុជានៅដំណាច់ឆ្នាំ២០១៧នេះ មិនអាចដល់១លានតោនបានទេ គឺបានត្រឹមប្រមាណ៦០ម៉ឺនតោន ច្រើនជាងឆ្នាំ២០១៦ មានប្រមាណតែជាង៥៤ម៉ឺនតោន » ។
ទាក់ទងនឹងការនាំចេញអង្កររបស់កម្ពុជាដែរ អគ្គនាយកក្រុមហ៊ុនអេមរុ រាយស៍ ធ្លាប់មានប្រសាសន៍ថា ៖« កំណើនដែលកម្ពុជាទទួលបាននេះ គឺផ្អែកទៅលើការបង្កើនចំនួនកូតាបញ្ជាទិញរបស់ប្រទេសចិន ។ នៅឆ្នាំមុន ចិនបានទិញអង្ករពីកម្ពុជាតែ១០ម៉ឺនតោនទេ តែក្នុងឆ្នាំ២០១៧ គឺបានទិញកើនរហូតដល់២០ម៉ឺនតោន » ។
លោកឧកញ៉ា សុង សារ៉ន បន្តថា ៖« នៅ២ខែចុងក្រោយនេះ គ្មានចំណុចណាមួយដែលអាចធ្វើឱ្យប៉ះពាល់ដល់ការនាំចេញអង្កររបស់កម្ពុជាទេ ដោយសារប្រទេសចិនបានបញ្ជាទិញកើនឡើង ។ ដូច្នេះ អ្វីដែលចិនបញ្ជាទិញ គាត់នឹងទិញ ហើយយើងរង់ចាំតែវេចខ្ចប់ឱ្យគាត់ប៉ុណ្ណោះ អីចឹង គ្មានហេតុផលអ្វីដែលការនាំចេញអង្ករត្រូវថយចុះទេ » ។
ចំណែកនាយកក្រុមហ៊ុនវង្សប៊ុនហេង រ៉ាយស៍ លោក ឧកញ៉ា វង្ស ប៊ុនហេង មានប្រសាសន៍ថា៖« ក្នុងឆ្នាំ២០១៧នេះ ខ្ញុំមើលអត់ឃើញថា មានចំណុចណាដែលថាការនាំចេញអង្ករថយចុះទេ គឺមានតែកើនឡើង ។ បើយើងគិតពីចំនួនកូតាចិនកើនឡើងរហូត ក្នុង១ឆ្នាំកើនឡើង១០ម៉ឺនតោនៗ ហើយទីផ្សារអឺរ៉ុបជាទីផ្សារមួយថេរ » ។
តាមរបាយការណ៍គូសបញ្ជាក់ថា ក្នុងរយៈពេល១១ខែឆ្នាំនេះ កម្ពុជាបាននាំចេញអង្ករក្រអូបចម្រុះជាង១៥,៩ម៉ឺនតោន, នាងម្លិះជាង២ពាន់តោន, សូមាលីជាង១,៦ពាន់តោន, ផ្ការំដួល ឬផ្លាម្លិះជាង១៦,២ម៉ឺនតោន, អង្ករសរីរាង្គជាង៨,៥ពាន់តោន និងអង្ករភ្លឺ១១៨តោន ។ ដោយឡែក ប្រភេទអង្ករសគ្រាប់វែង មានអង្ករចម្រុះគ្រាប់វែង ជាង១៤,១ម៉ឺនតោន និងអង្ករប្រណីតគ្រាប់វែងមានជាង៨,១ពាន់តោន ៕
ចែករំលែកព័តមាននេះ