ពិធីលែងពូជត្រីរាជចូលទៅក្នុងអាងទឹក នៅតំបន់ទឹកសាបក្បាលឆាយ

ថ្ងៃទី ២៣ ខែ សីហា ឆ្នាំ ២០១៧
ម៉ោង ១៦:២៤
សុវណ្ណ

ខេត្តព្រះសីហនុ ៖ នៅអាងទឹកសាបតំបន់ក្បាលឆាយ នារសៀលថ្ងៃទី២០ ខែសីហា ឆ្នាំ២០១៧ រដ្ឋបាលខេត្តព្រះសីហនុ បានប្រារព្វធ្វើពិធីលែងពូជត្រីរាជចំនួន២០០ក្បាល ចូលទៅក្នុងអាងទឹកតំបន់ទឹកសាបក្បាលឆាយ ស្ថិតនៅក្នុងសង្កាត់លេខ១ ក្រុងព្រះសីហនុ ខេត្តព្រះសីហនុ។ ឯកឧត្តម យន្ត មីន អភិបាលខេត្តព្រះសីហនុ មានប្រសាសន៍ឲ្យដឹងថា ការធ្វើពិធីលែងពូជត្រីរាជ ចូលទៅក្នុងអាង ទឹកសាបតំបន់ក្បាលឆាយនេះ គឺធ្វើឡើងដោយមានការជួយឧបត្ថមគាំទ្រពីមន្ត្រី រាជការ តាមបណ្ដា ស្ថាប័នរដ្ឋ និងឯកជន ក្នុងខេត្តព្រះសីហនុ ដើម្បីបង្កើនផលិតពូជត្រី នៅក្នុងបឹងធម្មជាតិ ក្នុងគោលបំណងលើកស្ទួយជីវភាពរស់នៅ របស់ប្រជាពលរដ្ឋ និងចូលរួមថែរក្សាធនធានជលផល ដើម្បីបង្កើនផលត្រីក្នុងធម្មជាតិឲ្យកើនឡើង សម្រាប់តម្រូវការរបស់ប្រជាពលរដ្ឋ។

ឯកឧត្តម អភិបាលខេត្តព្រះសីហនុ បានចាត់ទុកថា ការលែងត្រី ពូជទៅក្នុងបឹងទឹកសាបតំបន់ក្បាលឆាយ នាពេលនេះ គឺជាកម្មវិធីការងារដ៏សំខាន់ ដែលរាជដ្ឋាភិបាលបានកំ ណត់ឡើង សម្រាប់ជំរុញ ឲ្យចលនាការពារមច្ឆាជាតិ ត្រូវបានលើកកម្ពស់ ហើយការលែងត្រីពូជនេះ គឺជាយុទ្ធសាស្ត្រមួយ ប្រើប្រាស់ដើមទុនតិច មានសារៈសំខាន់ក្នុងការថែរក្សាពូជត្រីក្នុងស្រុកមួយចំនួន ឲ្យបានគង់វង្ស សម្រាប់ផ្ដល់ជាចំណីអាហារ ជូនប្រជាពលរដ្ឋ។ ការលែងពូជត្រីរាជថ្ងៃនេះ ក៏ជាវេទិកាផ្សព្វផ្សាយដល់ប្រជាពលរដ្ឋកម្ពុជាគ្រប់មូលដ្ឋាន ក្នុងការជួយថែរក្សាការពារធនធាន ជលផលគង់វង្ស។

ឯកឧត្តម យន្ត មីន បានអំពាវនាវដល់ប្រជាពលរដ្ឋ ជាពិសេសអ្នកនេសាទកុំឲ្យប្រើប្រាស់ឧបករណ៍នេសាទខុសច្បាប់ ដូចជាឧបករណ៍ឆក់ត្រី ស្បៃមុង និងការបូមទឹកយកត្រី ដែលជាប្រការ ប៉ះពាល់ធ្ងន់ធ្ងរដល់ប្រភព ធនធានមច្ឆាជាតិ។ ស្ថិតក្នុងឱកាសប្រកបដោយបរិយាកាសរីករាយ ឯកឧត្តម យន្ត មីន អភិបាលនៃគណៈអភិបាលខេត្ត ព្រះសីហនុ បានលែងពូជត្រីរាជចំនួន២០០ក្បាល ក្នុងន័យបំផុសចលនាទូទៅឲ្យប្រជាពលរដ្ឋ រួមគ្នាទប់ស្កាត់ការបំផ្លាញមច្ឆាជាតិ តាមរយៈការនេសាទខុសច្បាប់ និងបានបំផុសចលនា ចិញ្ចឹមត្រី តាមសហគមន៍ ដើម្បីបង្កើនសេដ្ឋកិច្ចគ្រួសារប្រជាពលរដ្ឋឲ្យមានការវិវត្តន៍កាត់បន្ថយភាពក្រីក្រ៕