រាជធានីភ្នំពេញ ៖ បុរសរងគ្រោះជាជនជាតិចិនមានវ័យជាង៣០ឆ្នាំម្នាក់ បានរងរបួសបែកក្បាល ហូរឈាមកក្លាក់ស្រោចពេញដងខ្លួនរងរបួសយ៉ាងធ្ងន់ធ្ងរ ដោយសារតែរូបគាត់ទំនងជាបានឈ្លោះគ្នា ជាមួយនឹងជនជាតិចិនដូចគ្នាមួយក្រុមមានគ្នាប្រមាណពី ២ទៅ៣នាក់។ ហើយពួកគេបានទាញកៅអី ដែលធ្វើអំពីឈើ…
រាជធានីភ្នំពេញ ៖ បុរសរងគ្រោះជាជនជាតិចិនមានវ័យជាង៣០ឆ្នាំម្នាក់ បានរងរបួសបែកក្បាល ហូរឈាមកក្លាក់ស្រោចពេញដងខ្លួនរងរបួសយ៉ាងធ្ងន់ធ្ងរ ដោយសារតែរូបគាត់ទំនងជាបានឈ្លោះគ្នា ជាមួយនឹងជនជាតិចិនដូចគ្នាមួយក្រុមមានគ្នាប្រមាណពី ២ទៅ៣នាក់។ ហើយពួកគេបានទាញកៅអី ដែលធ្វើអំពីឈើ និងថ្មម៉ាមមួយវាយសំពងរួចហើយគេចខ្លួនបាត់អស់ ទើបបង្ក ឱ្យមានការភ្ញាក់ផ្អើល ទៅដល់កម្លាំងមានសមត្ថកិច្ចចុះមកអន្តរាគមន៍។ ហេតុកាណ៍នេះដែរបានកើតឡើង នៅវេលាម៉ោង០១ និង១៥នាទី រសៀល ថ្ងៃទី១៦ ខែកញ្ញា ឆ្នាំ២០១៨ នៅចំណុចបន្ទប់លេខ៤០៧ ជាន់ទី៤ ផ្ទះសំណាក់ លី ឡាង ដែលមានទីតាំងនៅចំណុចផ្លូវព្រះមុនីវង្ស កែងនឹងផ្លូវលេខ៣១០ ក្នុងសង្កាត់បឹងកេងកងទី៣ ខណ្ឌចម្ការមន។
ស្ត្រីអ្នកអនាម័យម្នាក់បានប្រាប់ឱ្យដឹងថា មុនពេលកើតហេតុ ខណៈដែលរូបគាត់កំពុងតែ ដើរបោសសម្អាត និងធ្វើអនាម័យនៅជាន់ទី១ និងជាន់ទី២ ខាងក្រោមនោះ ក៏បានឮសំឡេងក្ដុងក្ដាំៗនៅ ជាន់ខាងលើ ដោយរូបគាត់មិនមានការចាប់អារម្មណ៍ឡើយដោយនឹកស្មានតែ ចិនៗផឹកស៊ី និងនិយាយ គ្នាជាធម្មតានោះ។ ទន្ទឹមនឹងនោះ រូបគាត់ក៏បាន ឃើញនារីវ័យក្មេងជនជាតិខ្មែរ ជាស្រីស្នេហ៍របស់បុរស ជនជាតិចិនម្នាក់ បានចុះមកខាងក្រោម រកទិញទឹកផ្លែឈើ រួចក៏បានឡើងទៅលើវិញបាត់ទៅ។
លុះបន្តិចក្រោយមក រូបគាត់ក៏បានឃើញបុរសជនជាតិចិនម្នាក់ខាងលើ បានរត់ពីជាន់លើចុះ តាមកាំជណ្តើរជើងមកខាងក្រោម ដោយយកកន្សែងពោះគោរុំ ដៃក្តោបក្បាល និងមានឈាមហូរស្រោច ខ្លួនរត់មកអង្គុយនៅលើសាឡុងនៅក្នុងបន្ទប់ទទួលភ្ញៀវខាងក្រោមនេះតែម្តង។ តាមប្រភពដដែលបាន រៀបរាប់ប្រាប់បន្តទៀតថា បុរសជនជាតិចិនម្នាក់នេះ រួមទាំងនារីវ័យក្មេងជាជនជាតិខ្មែរម្នាក់ (ទំនងជាស្រីស្នេហ៍របស់គេនោះ) ទាំងពីរនាក់បានចូលមកស្នាក់នៅក្នុងបន្ទប់លេខ៤០៧ ជាន់ទី ៤ខាងលើ តាំងពីវេលាមម៉ោងជាង៣ រសៀល ថ្ងៃទី១៥ ម្សិលមិញនេះ ដោយមកជួលស្នាក់ នៅក្នុងរយៈពេលតែមួយយប់ប៉ុណ្ណោះដែលមានតម្លៃ១៥ដុល្លារ ហើយត្រូវចេញទៅវិញនៅរសៀល ថ្ងៃនេះផងដែរ។
តែដោយមិនដឹងថា រូបគាត់មានរឿងអ្វីបានជាទៅមានជម្លោះជាមួយនឹងក្រុមបុរសៗ ជនជាតិចិនដូចគ្នាផ្សេងទៀត ទើបបានជាពួកគេវាយទៅលើរូបគាត់បណ្តាលឲ្យបែកក្បាល ហូរឈាមបែបនេះឡើយ?។ តាមប្រភពព័ត៌មានពីនគរបាលប៉ុស្តិ៍បឹងកេងកងទី៣ បានប្រាប់ឱ្យដឹងថា ក្រោយពីទទួលបានដំណឹងថា មានជនជាតិចិនឈ្លោះគ្នា និង ឈានទៅដល់ហិង្សាបង្កឱ្យមានអ្នក របួសនោះ កម្លាំងរបស់លោកក៏បានចុះមកដល់ផ្ទះសំណាក់ (លី ឡាង) កើតរហេតុខាងលើនេះ។ ពេលដែលកម្លាំងរបស់លោកបានចុះមកដល់ក៏បានប្រទះឃើញបុរសរងគ្រោះជាជនជាតិ ចិនម្នាក់នៅអង្គុយលើសាឡុងក្នុងបន្ទប់ទទួលភ្ញៀវខាងក្រោមតែម្នាក់ឯង ដោយមានរងរបួសត្រង់ក្បាលហូរឈាមស្រោចពេញខ្លួន រងរបួសយ៉ាងធ្ងន់ធ្ងរបែបនេះតែម្តង។
តាមប្រភពដដែលបានប្រាប់បន្តទៀតថា ក្នុងពេលនេះដែរកម្លាំងរបស់ លោកក៏បានចុះមកដល់ កន្លែងកើតហេតុ ធ្វើការសាកសួរទៅលើក្រុមបុគ្គលិកជនជាតិខ្មែរចំនួន២នាក់ដែលកំពុងបម្រើ ការងារនៅក្នុងផ្ទះសំណាក់ខាងលើនេះពួកគេបានបញ្ជាក់ថា បុរសរងគ្រោះបានឈ្លោះគ្នាជាមួយ នឹងជនជាតិចិនដូចគ្នា មួយក្រុមមានគ្នាពី២ទៅ៣នាក់ផ្សេងទៀតនៅជាន់ខាងលើ ទើបឈានទៅដល់ការ វាយតប់គ្នា និងបង្ករបួសស្នាមរួចពួកគេនាំគ្នាចុះរត់គេចខ្លួនបាត់អស់តែម្តង។
ពាក់ព័ន្ធទៅនឹងករណី នេះដែរ កម្លាំងរបស់លោកមិនទាន់បានដឹងថា កើតឡើងដោយសារតែមូលហេតុអ្វី ហើយក្រុមជនដៃដល់ ជាអ្នកណាឲ្យច្បាស់លាស់ដែរ? ដោយរង់ចាំរកអ្នកបកប្រែទៅធ្វើ ការសាកសួរជនរងគ្រោះជាមុនសិន ទើបបានដឹងរឿង។ ក្រោយពេលកើតហេតុ បុរសជនជាតិចិនរងគ្រោះត្រូវបាននារីវ័យក្មេងជនជាតិខ្មែរ ជាស្រីស្នេហ៍ បានបញ្ជូនតាមឡាំប្រឺតា យកទៅកាន់មន្ទីរពេទ្យ ដើម្បីធ្វើការព្យាបាលរបួស ហើយកម្លាំងមានសម្ថកិច្ចក៏កំពុងតែធ្វើការស្រាវជ្រាវរកមូលហេតុ និង រកចាប់ខ្លួនក្រុមជនដៃដល់ដែលបង្ក របួសស្នាមខាងលើយកមកធ្វើការផ្តន្ទាទោសទៅតាមផ្លូវច្បាប់ជាបន្តទៅទៀត៕
ចែករំលែកព័តមាននេះ