ខេត្តសៀមរាប ៖ ប្រជាពលរដ្ឋរស់នៅសង្កាត់ស្លក្រាម ក្រុងសៀមរាប បានសម្តែងការមិនពេញចិត្តជាខ្លាំងចំពោះលោកមេប៉ុស្តិ៍ស្លក្រាមដែលមើលឃើញតែលុយ និយាយឱ្យចំគឺមើលមនុស្សសិនទើបទទួលពាក្យបណ្ដឹង
ខេត្តសៀមរាប ៖ ប្រជាពលរដ្ឋរស់នៅសង្កាត់ស្លក្រាម ក្រុងសៀមរាប បានសម្តែងការមិនពេញចិត្តជាខ្លាំងចំពោះលោកមេប៉ុស្តិ៍ស្លក្រាមដែលមើលឃើញតែលុយ និយាយឱ្យចំគឺមើលមនុស្សសិនទើបទទួលពាក្យបណ្ដឹង មិនតែប៉ុណ្ណោះជាញឹកញាប់មន្ត្រីប៉ូលិសនៅក្រោមឱវាទរបស់គាត់ហាក់មិនសូវអើពើនឹងការទទួលពាក្យបណ្តឹងរបស់ប្រជាពលរដ្ឋឡើយ ។
ជាក់ស្តែងកាលពីយប់ថ្ងៃ២៣ មិថុនា ២០១៥ ជនរងគ្រោះម្នាក់ឈ្មោះឆេង ណា ភេទប្រុស អាយុ២៥ឆ្នាំ មុខរបរលក់ដូរ មានស្រុកកំណើតនៅភូមិកន្លែងចក ឃុំមាន ស្រុកអូររាំងឪ ខេត្តកំពង់ចាម បច្ចុប្បន្នស្នាក់នៅភូមិវត្តបូព៌ សង្កាត់សាលាកំរើក ក្រុងសៀមរាប ត្រូវចោរលួចយកទៅបាត់ម៉ូតូ១គ្រឿង ម៉ាកវ៉េវ ពណ៌ខ្មៅ ស៊េរីឆ្នាំ២០១៤ ពាក់ស្លាកលេខ សៀមរាប 1P-4061 កាលពីយប់ថ្ងៃទី២៣ មិថុនា ហើយបានទៅដាក់ពាក្យបណ្តឹងនៅប៉ុស្តិ៍នគរបាលសង្កាត់ស្លក្រាមទាំងយប់ ប៉ុន្តែខាងនគរបាលប៉ុស្តិ៍មិនបានទទួលពាក្យបណ្តឹងរបស់គាត់ទេ ដោយប្រាប់ថា ចាំម៉ោង៧ព្រឹកចាំមកដាក់ពាក្យ ។ លុះព្រឹកឡើង ជនរងគ្រោះ២នាក់ប្តីប្រពន្ធក៏ទៅដាក់ពាក្យបណ្ដឹងនៅប៉ុស្តិ៍ស្លក្រាមម្តងទៀត ប៉ុន្តែខាងប៉ូលិសបានយកក្រដាសសមួយសន្លឹកមកឲ្យជនរងគ្រោះសរសេរពាក្យបណ្តឹងដោយខ្លួនឯង ដោយពួកគាត់(ប៉ូលិស)នាំគ្នាដើរទៅក្រៅអស់ ប្រហែលជាង៣០នាទីក្រោយមកទើបឃើញពួកគាត់មកវិញ ក៏មិនអើរពើសួរនាំអ្វីបន្តិចសោះ ។
ជុំវិញករណីដែលពលរដ្ឋចោទប្រកាន់ខាងលើនេះ លោកញ៉ឹក សុផល មេប៉ុស្តិ៍សង្កាត់ស្លក្រាម មិនអាចទាក់ទងសុំការពន្យល់បានទេនៅយប់ថ្ងៃទី២៤ ខែមិថុនា ឆ្នាំ២០១៥នេះ ដោយទូរស័ព្ទរបស់លោកនៅក្រៅតំបន់សេវា ។
លោកវរសេនីយទោទិត្យ ណារ៉ុង អធិការក្រុងសៀមរាប បានប្រាប់«កោះសន្តិភាព»តាមទូរស័ព្ទនៅយប់ថ្ងៃទី២៤ ខែមិថុនានេះថា លោកជាប់រវល់ទៅខេត្តកណ្តាល មិនបាននៅកន្លែងទេ ប៉ុន្តែលោកប្រាប់ថា លោកបានលឺរឿងនេះតាមវិទ្យុ ABC ដែរ ។ លោកបន្តថា លោកបានទូរស័ព្ទទៅប្រាប់មេប៉ុស្តិស្លក្រាមឈ្មោះញ៉ឹក សុផល ឲ្យទទួលពាក្យបណ្តឹងផង ។ លោកបន្ថែមថា ដោយជនរងគ្រោះទៅដាក់ពាក្យបណ្តឹងនៅប៉ុស្តិ៍ស្លក្រាម តែមេប៉ុស្តិ៍មិនព្រមទទួល ចាំស្អែកឲ្យជនរងគ្រោះ ទៅដាក់ពាក្យបណ្តឹងនៅការិយាល័យនគរបាលព្រហ្មទណ្ឌកំរិតស្រាលខេត្តទៅ ។
ពាក់ព័ន្ធនឹងបញ្ហាមិនព្រមទទួលពាក្យបណ្ដឹងនេះដែរ លោកវរសេនីយ៍ឯកថង សាគុណ ស្នងការរងនគរបាលទទួលបន្ទុកកណ្តាលយុត្តិធម៌ នៃស្នងការដ្ឋាននគរបាលខេត្តបានប្រាប់«កោះសន្តិភាព»តាមទូរស័ព្ទនៅយប់ថ្ងៃទី២៤ មិថុនានេះដែរថា ចាំស្អែកហៅជនរងគ្រោះទៅជួបជាមួយលោកដោយផ្ទាល់ ដើម្បីលោកមានវិធានការចំពោះមន្ត្រីថ្នាក់ក្រោមរបស់គាត់ ដែលមិនទទួលយកពាក្យបណ្តឹងរបស់ប្រជាពលរដ្ឋដែលជាជនរងគ្រោះ ។
គួរបញ្ជាក់ផងដែរថា មជ្ឈដ្ឋាននានាបានរិគន់លោកអនុសេនីយ៍ឯកញ៉ឹក សុផល មិនដាច់ពីមាត់ថា បើមានលុយទើបឲ្យកូនចៅទទួលពាក្យបណ្តឹង តែបើគ្មានលុយទេកុំបាច់ទៅប្តឹងអី គេមិនទទួលពាក្យបណ្ដឹងទេ ព្រោះកន្លងមកក៏មានពលរដ្ឋបានប្រាប់ទៅលោកអធិការជាច្រើនដងដែរ តែមេប៉ុស្តិ៍រូបនេះហាក់ដូចជាធ្វើព្រងើយ គ្មានខ្លាចថ្នាក់លើ ឬច្បាប់បន្តិចណាសោះ ប្រហែលគាត់ជាមានខ្នងបង្អែកធំហើយមើលទៅ ៕
ចែករំលែកព័តមាននេះ